ПІЛІС СООНҶА - ШКОЛАЗАР
30.08.2019
Хабарлар
1 сентябрьда - Піліс кӱні. Пӱӱл Хакасияда пастағы классха 8 муң 500 пала парар. Ағбанда, тізең, парта кистінзер пастағызын на 3 муң олған одырар
ПУ КӰННІ ПАСТАҒЫ КЛАССХА ПАРЧАТХАН ИРКЕҶЕКТЕР ЧИДІКПИН САХТАПЧАЛАР. ПАСТАҒЫ САҢ, ПАСТАҒЫ ӰГРЕТЧІ, ПАСТАҒЫ ЛИНЕЙКА САҒЫСТА ХАҶАНҒА ДАА ХАЛАР. ІҶЕ-ПАБАЛАРЫ ОЛАРНЫ ШКОЛАА ТОЛДЫРАЗЫНАҢ ТИМНЕП САЛҒАННАР. ШКАФТА ЛИНЕЙКАА ПАРҶАҢ КИП-АЗАХ ИПТИ ІЛІЛЧЕ. СТОЛ ӰСТӰНДЕ АХ БАНТТАР. ОДЫРЧЫХТА СІЛІГ КӦРІМНІГ ПОРТФЕЛЬ ЭЭЗІН САХТАПЧА.
Маргарита Доброванаң Елизавета Доможакова ідӧк пастағы классха парчалар. Хызыҷахтар пис чылға чағын Ағбандағы «Торғайах» олған садында «Непоседа» группада хада ойначаңнар. Че иркеҷектернің чоллары чарылар тус читті. Маргарита Ағбандағы 12 № школаның 1 «д» клазынзар ӱгренерге парча, Елизавета - 22 № школаның 1 «г» клазынзар.
Оларның саңай пасха чуртас пасталар. Че ӧӧрелер хайди даа тоғас турарлар.
Таныхтирға кирек, пӱӱл Ағбанның 12 № паза 22 № школазында иң кӧп пала пастағы класста ӱгренер. Ол школаларда алтылар пастағы класс.
Пу хызыҷахтар теелбектенерге хынчалар. Елизавета «Час ханат» эстрада студиязының араласчызы полча, Маргарита - «Айас» хореография студиязының.
Оларнаң чоохтасчатханда, хызыҷахтар школаа тимдезін кӧзіткеннер. Ікізі дее чахсы сарнапча, хығырча. Паза парта кистінде хайди орта одырарын чоохтааннар. Амды оларны хынығ, чарых тус сахтапча. Школада олар кӧп наа піліс аларлар. Чолыңар азых ползын, иркечектер.
Автор :
Ольга ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы