ТУСНАҢ ТИҢЕ ХААЛИРҒА ОҢДАЙ ПИРЧЕЛЕР
30.08.2019
Хабарлар
Нацпроекттер. «Ӱгредіг» нацпроектте пістің республиканың 8 проекті араласча. Оларны хоостыра килер чылда Хакасиядағы ӱгредіг системазында алызығлар пасталар
Хайдағ алызығлар кирілерінеңер піс Хакасияның ӱгредіг паза наука министрінің орынҷызы Юрий Гаврилович Сагалаковнаң чоохтазып алғабыс.
Аның искіриинең, 2020 - 2022 чылларда Хакасиядағы школаларда материально-техническай база нааҷылалар, ідӧк хоза ӱгредіг системазында паза гуманитарнай кӧстеглерде техника алыстырылар. Республикада «Кванториум» олған технопаркы тоғынар. Паза «Кванториум» кӧс чӧрчең олған технопаркы школаларҷа чӧр турар. Нацпроект хоостыра палаларның чайаачызын тилідер кіннер азылары кӧрілче. Паза олғаннарға саннығ ӱгредіг кіні тӧстелер. Хоза ӱгредіг системазында аннаң андар тоғынар модель чуртасха кирілер. Ідӧк кинек палаларның ӱгредиине хайығ салылар. Тиксі ӱгредіг системазынзар проекттерні чуртасха киреріне федеральнай бюджеттең 1 миллиард салковай позыдылар.
Амды полған на проектті алынча кӧр кӧрелер. Ӱгредіг паза наука министрінің орынҷызының чооғынаң, 2020 чылдаң сығара республикада олғаннарға «IT - клуб» саннығ ӱгредіг кіні тӧстелер. Ол кін «Саннығ ӱгредіг средазы» федеральнай программаҷа 2021 чылда тоғынып пастир. Субсидияның сині 12 - 15 млн салковайға чидер. «IT- клубтың» ӧӧн пӧгіні ӱгренчілерні, чииттерні пӱӱнгі наа технологияларнаң чахсы тузаланарға кӧніктірері полча. Килер чылда Хакасияның школаларында паза профессиональная ӱгредіг организацияларында саннығ ӱгредіг средазынзар кӧстег модельін кирерінҷе проект тоғынып пастир. Анда 2020 чылда - 101, 2021 чылда 64 организация аралазар. Пір организацияа 2 млн салковай позыдылар. Тиксі алза, оларға 2020 чылда 225894,70 млн салковай, 2021 чылда 142848,10 млн салковай хорадылар.
Чоохтирға кирек, проект хоостыра ааллардағы ӱгредіг организацияларында Интернет 50 мб/с тоғынар, городтарда, тізең, сала табырах -100 мб/с.
Республикадағы школаларда материально-техническай база нааҷылалар.
Пу проектче «Точка роста» гуманитарнай паза саннығ ӱгредіг кӧстеглері хоостыра 37 кін тӧстирі кӧрілче. Алтай аймаанда 4 ӱгредіг кіні тоғынар, Ағбан пилтірі аймаанда - 12, Шира аймаанда - 2, Асхыс аймаанда - 8, Пии аймаанда - 3, Боград аймаанда - 2, Таштып аймаанда - 6. Полған на кінге 1,6 млн салковай позыдылар. Мындағ оңдайнаң, «Технология», «Информатика, «ОБЖ» предметтерче олғаннар, туснаң тиң хаалап, тирең пілістер аларлар.
Хазии уйан палаларны ӱгретчеткен организацияларда техника нааҷылалары кӧрілче. Пу проектте тӧрт ӱгредіг учреждениезі араласча: уйан исчеткен олғаннарның школа-интернады, харах оды уйан олғаннарның школа-интернады, Ағбандағы 17 № паза 27 № школалар. Нацпроект хоостыра, адалған ӱгредіг учреждениелерінде олғаннарға піліс пирерге киректелчеткен техника нааҷылалар. Тиксі 2020 чылда пу проектке - 7736,90, 2021 чылда -14458,10, 2022 чылда 7808 муң салковай позыдылар.
«Кванториум» олған технопаркы Ағбанда тӱзімніг тоғынча. Ол чахсы салтарлар кӧзітче. Аннаңар 2020 чылда Харатастағы механика паза технология техникумында ікінҷі «Кванториумын» тӧстирі кӧрілче. Технопарктың тоғызы алты квантча апарылар: «Аэроквантум», «Автоквантум», «IT квантум», «Проробоквантум», «Промышленнай дизайн» паза «Хайтек». Пір сӧснен чоохтаза, олғаннарға аймах кӧстеглерҷе устарын тилідерге оңдай полар. Чоохтирға кирек, «Кванториум» ідӧк палаларға соонаң чӱрекке чатчатхан профессияны таллап аларға туза полар. Пу кӧстеге 7 млн артиинаң салковай позыдылча.
2020 чылдаң республикада «Кванториум» кӧс чӧрҷең технопарк тоғызын пастир. Таныхтирға кирек, кӧс чӧрчең технопарк алынҷа салылған маршруттарҷа чорыхха сых турар. Килер чылда ол Ағбан пилтірінде паза Сорскта тоғынып пастир. 2021 чылдаң оларға хоза 3 кӧс чӧрҷең технопарк Хакасияның пасха школаларында тоғынар. Азынада чоохтаза, кӧс чӧрҷең технопарк республиканың полған на школазынзар чит турар. Олар тӧрт кӧстегҷе тоғынарлар: «Кванториум» технология урогы, VR /Промдизайн, ГЕО/Аэрокванториум, IT кванториум, Проробокванториум.
Республиканың 7-ҷі нацпроекті палаларның чайаачызын тилідер кіннер азары полча. Пу проектке 354 миллион салковай позыдылар. 2022 чылда «Альтаир-Хакасия» олғаннарға хабазар республика кіні тӧстелер. Ол Ағбан пилтіріндегі техническай колледжтің туразында орнығар. Пӱӱнгі кӱнде чайаачы олғаннар кіні Н.Ф.Катановтың адынаң национальнай гимназияның структуразының пӧлии полча. Ӱр сахтаан кін азыл парза, ӱгренҷілерге профильнай сменалар тоғын сығар.
Сигізінҷі проект палаларның хоза ӱгредии системазын тилідерінең палғалыстығ.Аннаңар республиканың хоза ӱгредіг кінін тӧстирдеңер пӧгін турча. Ідӧк полған на городта паза аалда хоза ӱгредігнің модельнай кіннері азылар. Оларда олғаннарның хоза ӱгредиинең айғасчатхан ӱгретчілерге устарын тилідерге оңдай полар. Ол пӧгіннерге федеральнай бюджеттең 15760,80 мун салковай позыдылар. Мындағ кіннер азыл парза, республиканың аймах пулуңнарындағы олғаннарға уғаа чахсы полар. Пӱӱнгі кӱнде кӧп аалда олғаннарға хоза ӱгредіг алар оңдай чоғыл. Проект чуртасха кирілзе, іче-пабалар даа матап ӧрінерлер тиирге чарир.
Хайди таныхтапча Юрий Сагалаков, пу 8 нацпроект ӱгредіг системазына улуғ хозым идер. Олар чуртасха киріл сыхсалар, ӱгретчілерге устарын алғыдарға, туснаң тиң хаалап тоғынарға кирек полар. Проекттернін тузазы 2023 чылдаң паалалар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде