ПОЛЫЗЫҒ ЧОЛ АСЧА
30.08.2019
Хабарлар
Ӱгренҷілерге канцелярия ӱлелген.
Акция. Чайғының халғанчы айында «Ағбан школаа парча» акция ирткен. Спонсорлар полызиинаң алылған канцелярия сидік оңдайларда чуртапчатхан сӧбірелер олғаннарына пирілген
Пу акция 12 - 26 августта ирткен. Улуғ тоғыс апарылған соонаң 28 августта канцелярия товарлары городтың школаларына ӱлестірілген.
Оларға ӱгретчілер кил парғаннар.
«Ағбан школаа парча» акцияны «Ағбанның палалары» фонд тӧстеен, аның устағҷызы Екатерина Гайер полча. Фонд волонтерларнаң хада чуға чуртапчатхан сӧбірелерге палаларын школаа тимнирге полысча.
- «Ағбан школаа парча» акция пӱӱл ікінҷізін иртірілді. Анда город чуртағҷылары паза идінҷектер ӧткін араласчалар. Пылтыр піс школаа парчатханнарға 2244 канцелярия чыындызын читіргебіс. Пӱӱл 3 муң азыра олған оларны алған. Чыындызар тетрадьтар, ручка-карандаштар, линейкалар кірчелер. Кічіглерге сырлар паза альбомнар,ӧңніг карандаштар, картон паза пасха кирек нимелер пирілче, - чоохтаан Е.А.Гайер.
Хайди таныхтапча Екатерина Анатольевна, ӧткін араласчатхан пірігістер чыл сай табылчалар. Ӱгредіг учреждениелері пу киректең ідӧк хыйа турбинчалар. Е.А.Гайер полызығ ӱчӱн прайзына улуғ алғызын читірче.
Канцелярия товарлары чахсы чыыл парча осхас. Рюкзактарны паза кип-азахты аларға кӧп ахча киректелче. Спонсорлар ӧӧнінде канцеляриянаң полысчалар, ахча даа кӧмес чыылчаттыр. Ағбандағы школаларның устағҷылары паза ӱгретчілері нинҷе чыынды киректелчеткеннеңер азынада пічіктер пир салғаннар. Кӧзідімге, 3№ школа директорының воспитатель тоғызынҷа орынҷызы Светлана Кайдаракова 52 палаа андағ чыынды киректелчеткеннеңер пічік пиргебіс теен.
Паза акцияа волонтерлар чахсы полыс пирчелер. Амды городтың общежитиелерінде, пос тураларында чуртапчатхан сӧбірелерге паланы школаа ызарға ниик полар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде