УС КІЗІНЕҢ ТОҒАЗЫҒ
10.09.2019
Хабарлар
Мастер-класс. Ирткен неделяда Ағбандағы 25 № школада Хакас тілі кӱніне чарыдылған улуғ нимес мероприятие ирткен
Школаның хакас тілі ӱгретчізі Наталья Карамчакова постарынзар ХакНИИЯЛИ-ның наука тоғынҷызы Раиса Абдинаны ааллап хығырған. Раиса Петровна - олаңай ла наука тоғынҷызы нимес, ідӧк ус холлығ кізі. Ағбандағы 25 № школаның 3 - 5 класстардағы ӱгренҷілеріне ол мастер-класс иртірген. Хакас кӧгенектер, сигедектер тікчеткен паза поғолар хоостапчатхан ус олғаннарға хакас орнаменттердеңер чоохтаан.
Пастап Раиса Абдина орнаменттер хайдағ полчатханнаңар, хайда оларнаң тузаланарға чарирдаңар искірген. Анаң олғаннар орнаменттер хоостирға ӱгренгеннер. Чапсынчатхан аймах ӧңніг чаҷыннарда орнаменттер хоостап, олғаннар аны ипти хыплааннар. Оолах-хызыҷахтар сіліг тоғыстарына постары даа чапсааннар. Хайзы-да позының орнаментін смартфонына чапсырчатхан, кем-де пеналын паза дневнигін чазапчатхан. Пір оолах орнаментін іҷезіне сыйлап пирерге ибзер апарыбысхан.
Мастер-класс ӱгренҷілернің кӧңніне кірген. Раиса Петровна олғаннарға пос туста орнаменттер хоостап турарға чахаан. «Пазағы чылда сірернең хада пазох тоғазарға килзем, хоостап салған орнаменттеріңні мағаа кӧзідерзер», - ойнап, чоохтанған наука тоғынҷызы.
Мастер-класс соонаң Раиса Петровна Ағбандағы 25 № школаның библиотеказына позының ікі книгазын сыйлап пирген. Олар ідӧк хакас орнаменттерге, кӧгенектерге, сигедектерге паза поғоларға чарыдылғаннар. Хакас тілі ӱгретчізі Наталья Илларионовна школа аалҷызын ідӧк хуруғ позытпаан, удур сыйых читірген.
Таныхтирға кирек, 25 № школада хакас тілі ӧнетін урок чіли иртірілбинче. Наталья Карамчакова факультативтерде олғаннарны пос тіліне ӱгретче. Школада хакас тілі факультативіне тиксі 100 азыра ӱгренҷі чӧрче.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде