ПРАВИТЕЛЬСТВОДАҢАР ЗАКОНЗАР АЛЫЗЫҒ КИРІЛЕР
13.09.2019
Хабарлар
Ӧӧркі Чӧп. Президиум чыылиинда депутаттар «Хакас Республика правительствозынаңар» законзар алызығ кирчеткен закон проектін ӱзӱрібіскеннер паза республикаа мал хадарарын оңдайлаңаң постың законын тимнирге киректелчеткенінең чарасханнар
Пастап Ӧӧркі Чӧп президиумы Хакасияның хайди даа итчең имнег страхованиезі чыындызының пу чылға бюджедінзер алызығлар кирер сурығны кӧрген. Хакасия ТФОМС-ынын директоры Любовь Бурнакова алызығлар имнег страхованиезі чыындызының 2019 чылға бюджет парыстары паза хорадығлары ӧскірілген сылтаанда кирілчелер тіп чарытхан. Ӧзіс ӧӧнінде чыындының ирткен чылдаң ахча халғаны (90 миллион салковай) паза чыынды бюджедінзер алында кӧрілбеен ахча (76 миллион салковай) хоза кіргені сылтаанда пол партыр.
Андағ оңдайнаң ТФОМС-тың пу чылға бюджедінің парыстары паза хорадығлары тиксі 166 миллион салковайға ӧскірілчелер. Любовь Бурнакованын таниинаң, ол ахча ӧӧнінде ӱс кӧстеге хорадылар: аарлыға турчатхан имнег оборудованиезін аларына, андағ оборудованиені тыхтирына паза имнег тоғынӌыларының профессиональнай ӱгредиине.
Хакасия правительствозынаңар законзар хайдағ алызығ кирерге киректелчеткенінең Ӧӧркі Чӧп кнезі Владимир Штыгашев таныстырған.
- Республика законынӌа Хакасия пазының пастағы орынӌызы, орынӌылары, республиканың финанстар министрі паза Хакасияның тӧреміл представительлері должностьха Ӧӧркі Чӧп чаратханы хоостыра турғызылчалар, - чарытхан парламент устағӌызы. - Олар пістің толдырығлығ ӱлгӱнің ӧӧркі устағ-пастаа полчалар. Олох туста пу адалған устағӌыларға «тоғызын толдырчатхан» статустьіғ нинӌе тус поларға чарадылчатханы пістің законнаң турғызылбаан.
Пасха субъекттернің законнарында, кӧзідімге Нижегородскай областьта паза Ненец автоном округында, мындағ статустығ «ӱс айдаң артых нимес» поларға чарадылчаттыр. Аннаңар алызығ кирчеткен закон проектінӌе ол право саринаң читпесті тӱзедібізері кӧрілче, республика законынзар «Хакас Республика Ӧӧркі Чӧбінің чарадии пирілгенӌе килістіре кізілер кӧзіділген должностьтарның тоғызын ӱс айдаң артых нимес толдырчалар» хоза пазып. Чарыда чоохтаза, закон алыл парза, республика пазына ӱс ай ирткенӌе турғызылған орынӌызының кандидатуразын Ӧӧркі Чӧптің ӱзӱриине сығарарға килізер.
- Ӱс ай сыныхтирына читкіӌе: чарапча паза сыданча ба ол кізі пу тоғысха?- сағыс-кӧрізінең ӱлескен Ӧӧркі Чӧп устағӌызы.
Владимир Штыгашевтің чооғынаң, халғанӌы туста республиканың устағ-пастаанда «тоғызын толдырчатхан» статустығ кізілер кӧп пол сыххан. Салтарында олар пір дее ниме ӱчӱн нандырбинчалар, анаң парыбысчалар, оларның орнына пасхазы турғызылча тіп таныхтаан ол. Аннаңар Ӧӧркі Чӧп, закондағы читпесті тӱзедіп, ол киректі оңдайлирға пӧгінче. Закон проектін депутаттар чағынғы сессияда ӱзӱрібізерге пӧгінчелер. Сессия 25 сентябрьда иртер, андағ чарадығны президиумдағылар пуох чыылығда алғаннар.
Паза пір сурығ, хайзына президиумдағылар хайығ салғаннар, аалдағыларның малы хадарылбин чӧрчеткенінеңер полған. Пу сурығ сығыс килген Астрахань облазы депутаттарының аал хонии чирлерінеңер федеральнай законзар алызығ кирердеңер Хазна Думазынзар айланызына хабазарын ӱзӱрчеткенде. Айланыста чоох парча аал чуртағӌыларына от сабарына паза мал оттадарына арендаа пирілчеткен чир участогының иң улуғ синін турғызардаңар, амғы федеральнай законда анзы кӧзіділбиндір.
Ӧӧркі Чӧп кнезі Владимир Штыгашев мында аалдағыларның малын хадарар сурығ ағырсымнығ турчатханына хайығ айландырған.
- Пу сурығнаң пірдеезі айғазарға хынминча, аал чӧптері дее, аймахтар ӱлгӱлері дее, - искірген ол. - Пістің чарым миллионӌа мал Хакасияда хадарылбин чӧрче. Чарым миллион! Ол мал чолларзар сыхча. Салтарында машиналар саайға кірчелер, кізілер чуртастарын чідірчелер.
Владимир Штыгашев пу сурығны пӧгер ӱчӱн, республика синінде мал хадарарын оңдайлапчатхан закон тимнирге кирек полчатханын таныхтаан. Президиумдағылар аннаң чарасханнар, пасха регионнарның пу сурығӌа опыдын кӧр кӧрерге паза республика законын тимнеп пастирға чарат салғаннар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы