КАВКАЗ РЕСПУБЛИКАЗЫНЗАР ЧОРЫХ
02.10.2019
Хабарлар
Пресс-конференция. Хакас драма театры «Федерация» национальнай театрларның тиксі Россиядағы фестивальында араласхан
Хакас артисттеріне тоғыс хоостыра хайдағ ла чирлерде поларға киліспеен. Че Чечня Республикада пістің чайаачылар пастағызын на ойын кӧзіттілер. Андағ оңдай оларға «Федерация» фестиваль пирген. Фестивальның тӧстегізі Россияның театр деятельлері пірігізі (СТД) полча. Аның ӧӧн пӧгіні - хазнабыстағы аймах тілліг чоннарны піріктірері.
Хайди таныхтаан саблығ ӧменің директоры Владимир Чустеев, Россияда 200 национальнай театр саналча. Амға теере олар тіллер хоостыра чарылаңнар. Кӧзідімге, кавказтағылар пос фестивальларын иртірчелер. Финно-угор тілліглер (андар удмурттар, коми-пермяктар, мансилер, ханттар, саамилер кірчелер) алына чыылысчалар. Тӱрк тіллерінең чоохтасчатханнар кибір хоостыра «Туғанлык» (Уфа) паза «Науруз» (Казань) фестивальларзар чол тутчалар. Чоохтирға кирек, театр пайрамнарының кӧбізі чоннар аразындағы синде иртірілең, че олар Россиядағы национальнай театрларны піріктірбееңнер. Ол читпесті тӱзедер пӧгіннең «Федерация» тӧстелген.
Россияның аймах пулуңнарынаң фестивальның оргкомитедінзер 40 артиинаң сурыныс пічии кіртір. Эксперттер чӧбі программаа 14 ойынны ла таллаан, ол санда Хакас драма театрының «Апсах паза талай» спектакльын. Пістің артисттердең пасха, фестивальда Адыгеяның, Башкортостанның, Дагестанның, Кабардино-Балкарияның, Калмыкияның, Карелияның, Марий-Элның, Татарстанның, Чечняның паза Якутияның театрлары араласханнар. Прай чайаачы ӧмелер ойыннарны пос тіллерінең кӧзіткеннер.
Программа хоостыра чир-суғҷыларыбысха 14.00 часта ойнирға киліскен, аннаңар кӱнӧрте чон чыылыспас тіп чочыныс полтыр. Артисттер таниинаң, олар тиктең сағыссырааннар. Спектакль пасталғанда, залда пос орын халбиндыр. Чоохтирға кирек, режиссер Марас Чеббур ойынны писатель Эрнест Хемингуэйнің повезі хоостыра турғысхан даа полза, ол андар хакас кибірлерін паза кӧглерін кир салған. Анзы чечен кӧрігҷілерінің кӧңніне кірген. Ағаа хоза залдағы улус хакас тілін истіп аларға харастыр. Хакас драма театрының спектакльын Кавказ республиказында чылығ удурлааннар. Итсе-де, чир-суғҷыларыбыс «Федерацияда» постарын турыстыра кӧзідерлер тіп ізеніс полған. Пӱӱл ол спектакль ӱчӱн артисттер Уфада паза Казаньда ирткен фестивальларда пӧзік паалағ алғаннар. Хакасияның чон артизі Виктор Коков, тізең, апсахтың рольы ӱчӱн «Туғанлык» фестивальның президенті Рифкат Исрафиловтың сыйиина турысхан. Пӱӱл «Федерацияда» сыйыхтығ орыннар чох полған, че мыннаң мындар фестиваль марығ оңдайынҷа даа иртер, неке.
Тиксі хазнадағы фестиваль соонда Чечен чирінде «Россиядағы театр. XXI чӱс чыл. Наа кӧріс» форум ирткен. 600 делегат санында СТД-ның Хакасиядағы пӧлиинің кнезі Светлана Чаптыкова, «Читіген» театрның директоры Ирина Чустугешева паза режиссер Саяна Ултургашева полғаннар. Светлана Семёновнаның чооғынаң, форумда национальнай театрларның сурығлары ӱзӱрілген. Че иң ағырысымнығ тіл сурии полтыр. Ол прай чайаачыларны сағыссыратча. Анзы пілдістіг.
Национальнай театрның таңдағызы чоннаң палғалыстығ, тіл чіт парза, чон чох пол парарға айабас. Тархында андағ кӧзідімнер кӧп.
Артисттер Чечнядағы чуртастаңар хысхачахти искір пиргеннер. Кавказ республиказында кибірліг чон чуртапчаттыр. Ипчее ыстан паза хысхаҷах кӧгенек кизерге чарадылбинча. Фестивальға килген абаҷайларға узун кӧгенектерге чазанарға, ӧменең не чӧрерге килістір. Чир-суғҷыларыбысты искенде, пу кізее олар хазнадағы фестивальға нимес, Саудовскай Аравиязар пар килген чіли пілдір парған. Россияның театр деятельлері пірігізі Грозныйда мыннаң мындар «Федерация» фестивальны иртірерге пӧгінче. Кавказ республиказында чылдаң чылға театр пайрамнары иртсе, анда чуртас оңдайлары алызар ни? Театр - илбек искусство, ол кӧрігҷінің сағыс-кӧрізін алыстырар оңдайлығ.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы