ААРЛЫҒ ӰГРЕТЧІЛЕРГЕ - АЛҒЫСТАСТАР, СІЛІГ ЧАХАЙАХТАР
04.10.2019
Хабарлар
5 октябрьда - Ӱгретчі кӱні. Пӱӱнгі кӱнде Хакасияда 5 муң азыра ӱгретчі тоғынча. Олар 72 муң азыра ӱгренӌее піліс пирчелер! Ӱгретчілернің пайрамына удур республика правительствозында ӱгредіг киреенде иң турыстығ тоғынӌыларны алғыстааннар
ЧОНДА ТИДІРЛЕР: «ХУДАЙДАҢ ПІР ЛЕ ПРОФЕССИЯ ПИРІЛЧЕ - ОЛ ӰГРЕТЧІ. ӰГРЕТЧІ, ТІЗЕҢ, ПАСХАЗЫНА ПРОФЕССИЯ АЛАРҒА ПОЛЫСЧА». СЫНАП ТАА, ЧУРТАСТА КІЗІНІҢ ПРАЙ ДАА ЧИДІГЛЕРІ, ОЛ-ПУ ПРЕДМЕТКЕ ХЫНЫЗЫ, ПРОФЕССИЯА ЧОЛЫ ШКОЛАДА
ПАСТАЛЧА. ПУ ИҢ ИРГІ ПАЗА ЧОНДА УҒАА УЛУҒЛАСНАҢ ТУЗАЛАНЧАТХАН ПРОФЕССИЯ ПОЛЧА. ӰГРЕДІГ КИРЕЕНДЕ ЧАЛТЫРАМА ЧИДІГЛЕРГЕ ЧИТКЕННЕРНІ ХАКАСИЯ ПАЗЫ ВАЛЕНТИН КОНОВАЛОВ АЛҒЫСТААН.
- Полған на кізінің пастағы чидіглері школада пасталча. Анда піс пастағы хаалағлар паза пастағы алҷаастар итчебіс. Пу туста олғаннарға ӱгретчілер чахсы хабас пирчелер, аннаң андар парарға хорыхпасха чӧптепчелер, - чооғында таныхтаан Валентин Олегович.
Хакасияның ӱгретчілері, постарының профессионализмін, узын кӧзідіп, республика паза Россия синінде удаа сабланчалар. Ідӧк олар ӱгренӌілерін алнынзар хаалирға кӧстепчелер. Мына мындағ иң кӱстенӌік, пӧзік чидіглерге читкеннері Хакасия правительствозының алғыстас пічиин алғаннар.
Іди таныхтатханнарның санында Асхыс аймаандағы Калининдегі ортымах школаның ӱгретчізі Рустам Канзычаковнаң Пии аймаандағы Куйбышевтегі ортымах школаның ӱгретчізі Клавдия Чебодаева полғаннар. Хакас тілі паза литература ӱгретчілері республикада иртчеткен марығ-конференцияларның тӧреміл араласчылары полчалар паза олғаннарын аймах марығларда араластырчалар, сыйыхтығ орыннарға турысчалар.
Асхыс аймаандағы Ис аалдағы ортымах школаның ӱгретчізі Валерий Сагалаков илееде чыл физкультура ӱгретчізі полып тоғынча. Ол ідӧк аалда спорт секцияларын апарча. Аның олғаннары спорт марығларында сыбыра сыйыхтығ орыннарға турысчалар.
Чиит ӱгретчі Вера Чебодаева Асхыс аймаандағы Катановтағы школада 10 чыл орыс тілі паза литература ӱгретчізі полып істен салған. Ол ӱгренӌілерінең хада Хакасияда ла нимес, ідӧк Москвазар, Санкт-Петербургсар даа аймах конференцияларға, марығларға пар килче.
Мындағ турыстығ ӱгретчілер тоғазығда илееде полған. Полғанының на позының чидии. Ағбандағы лицейнің директор орынӌызы Лидия Петрук ӱгредіг киреенде 50 чыл істен салған. Ағаа «За заслуги перед Хакасией» орден читіргеннер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы