ХАКАСИЯА КИРЕК ПӰДІРӀГ ӰЛГӰНӀҢ ХАЙИИНДА
09.10.2019
Хабарлар
«Хазых хайраллиры» нацпроект. Пу неделяда Хакасия пазы Валентин Коновалов Ағбанда республиканың радиология корпузының пӱдіриин сыныхтаан
НИМЕДІР ОЛ ОНКОЛОГИЯ ПОЛҒАН НА КІЗІ ПІЛЧЕ ПОЛАР. ОЛ 21 ВЕКТІҢ ИҢ ХОРҒЫСТЫҒ АҒЫРИИ ПОЛЧА. АҒЫРЫҒ ААР ИМНЕЛЧЕТКЕНІНЕҢ ХОРҒЫСТЫҒ.
ХАКАСИЯНЫҢ ХАЗЫХ ХАЙРАЛЛАӋАҢ МИНИСТЕРСТВОЗЫНЫҢ ИСКІРИИНЕҢ, РЕСПУБЛИКАДА ПУ АҒЫРЫҒНАҢ 10 МУҢ АЗЫРА КІЗІ ИРЕЕЛЕНЧЕ. ЧЫЛ САЙ 2 МУҢ АЗЫРА КІЗІДЕ ОНКОЛОГИЯ АҒЫРИИ СЫҒЫС КИЛЧЕ. ОНКОЛОГИЯНАҢ АҒЫРЧАТХАННАРНЫҢ 70 - 80 %-i ЛУЧЕВОЙ ТЕРАПИЯНАҢ ИМНИРІН КИРЕКСІПЧЕ. АМДЫ ОНКОЛОГИЯНАҢ ИРЕЕЛЕНЧЕТКЕННЕР СЫНЫХТАҒА ПАСХА РЕГИОННАРЗАР ЧӦРЧЕТСЕЛЕР, НИНӋЕ-ДЕ ЧЫЛ ПАЗЫНАҢ ПУ ПАЗА ПАСХА ДАА ИМНЕГ ПОЛЫЗИИН МЫНДА АЛАРҒА ЧАРИР ПОЛАР. МЫНДАҒ ОҢДАЙНЫ АҒБАНДА ПӰДІРІЛЧЕТКЕН РЕСПУБЛИКАНЫҢ РАДИОЛОГИЯ КОРПУЗЫ ПИРЕР.
Ол 2021 чыл тоозылчатса тоғынып пастирға кирек, амды, тізең, Хакасияа уғаа кирек имнег учреждениезі республика ӱлгӱзінің хатығ хайиинда. Пӱдіріг кирее хайди парчатханын паза тоғыс тудығ чох парар ӱчӱн, прай оңдайлар парын республика пазы Валентин Коновалов позының хайиинда тутча. Іди пу неделяда Валентин Олегович пӱдіріг тоғыстары хайди парчатханын сыныхтаан.
Амды радиология корпузының фундаментін салар тоғыс хыызында парча. Имнег учреждениезі пик турар ӱчӱн, анда 400 тонна металл паза 2500 кубометр бетон урылар. Хакасияның пӱдіріг паза ЖКХ министрі Сергей Новиковтың искіриинең, объектте ікі сменада 45 пӱдірігді істенче паза 10 техника тоғынча. Ол читкіде. Бетонны заводтаң 8 автобетоновоз теестезіп тартча, бетононасос аны корпустың фундаменті ортызынзар урча. Анда, тізең, пӱдірігділер бетонны холнаң иптепчелер. Пӱӱл имнег корпузының подвалы, 1-ғы, 2-ді хадыллары кӧдіріл парарға кирек, ідӧк чылығ пирҷең сетьтер тартылар.
- Сағынчам, республиканың паза хондых регионнарның чуртағҷылары радиология корпузы пӱт парарын чидікпин сағыпчалар. Ол онкология ағырығларын иртеезін іле сығарарға паза орта имнирге оңдай пирер, - таныхтаан республика пазы.
Тӧрт хадыллығ корпуста онкологиянаң ағырчатхан кізілерні рентген, фотоннар, электроннар полызиинаң наа радиотерапия аппараттарынаң имнирлер. Хакасияның хазых хайралладаң министрі Владимир Костюштың искіриинең, пӱӱл радиология корпузынзар оборудование алар чӧптезіглер иділ парғаннар. Имнег учреждениезі пӱдіріл парза, оларны Хакасиязар ағылып пастирлар. Наа оборудование 600 миллион азыра салковайға тур парар.
Ағбанда республиканың радиология корпузы «Хазых хайраллиры» национальнай проект хоостыра пӱдірілче.
Аның пӱдіриине федеральнай бюджеттең 1 миллиард 309 миллион салковай пирілер. Пӱдіріг тоғыстары графиктең 10 кӱнге алнында парча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы