ИНВЕСТИЦИЯЛАРНЫ ХАЙДИ КИРІП АЛАРҒА?
15.10.2019
Хабарлар
Хакасияның Ӧӧркі Чӧбінің экономика политиказынҷа, промышленностьча, пӱдірігҷе паза транспортча комитеді 10 октябрьда алғыдылған чыылиин иртірген. Чыылығны комитет кнезі Василий Шулбаев апарған.
Чыылығның ӧӧн кӧстее идінҷектерге хабасчаң паза республиканың инвестиция киреен чахсыландырҷаң закон проекттерін ӱзӱрері полған. Аннаңар аның тоғызында Ӧӧркі Чӧп депутаттары, Хакасия правительствозының, аймах-пасха ведомстволарның, идінҷектернің паза халых пірігістерінің кізілері араласханнар. Таныхтирға кирек, ол закон проекттерін Ӧӧркі Чӧп пастағы хығырығда алыбысхан.
Пастап чыылығ араласчылары «Хакас Республикада кічіг паза ортын идінҷек киреен тилідердеңер» закон проектін ӱзӱргеннер. Хакасияның экономика тилізі министрі Николай Евдокимов, закон проектінең таныстырып, ол идінҷектерге хабасчаң ӧӧн закон проекті полчатханын, анда хабазығ кӧрімнері паза оңдайлары кӧзіділ парғанын таныхтаан.
Экономика политиказынңа, промышленностьча, пӱдірігҷе паза транспортча комитеттің кнезі Василий Шулбаев пу закон республикаа тың киректелчеткеніне хайығ салған.
- Мындағ законнар Россияның прай даа субъекттерінде пар, - таныхтаан ол. - Кӧзідімге, Сибирьдегі федеральнай округта мындағ законнар Хакасияда паза Иркутск облазында ла чоғыл.
Чыылығ араласчыларының закон проектінҷе хайзы сизіндіріглер паза сурығлар пар полған. Кӧзідімге, потребкооперацияларға хайдағ хазна хабазии пирілері чарыдылбаанын таныхтааннар. Ідӧк республика бюджедінде пу закон проектіне нинҷе ахча кӧрілердеңер сурығ пирілген. Хакасияның финанстар министрі Ирина Войнова идінҷектерге хабазығ ӧӧнінде налог синін хызырар оңдайнаң пирілчеткенін таныхтаан.
- Піс налог ставкаларын ікі хати тӱзірчебіс, - нандырған Войнова ахча суриинҷа. - Мына ол саринаң идінҷектерге ахчалығ хабазығ полча. Аннаң пасха федеральнай бюджеттең аймах гранттар пирілче. Пӱӱл республика пу кӧстегҷе 200 миллион салковай алып алған. Килер чылға сағам ахча ӱлестірілгелек, че пӱӱлгізінең тӧбін полбас тіп ізенчебіс.
Хакасиядағы идінҷектер праволарын арачылирынҷа уполномоченнай Василий Кудашкин позының чооғында халғанҷы чылларда республикадағы идінҷектернің кирее оой нимес парчатханына хайығ айландырған.
- 2017 чылда кічіг паза ортын бизнесте тоғынчатханнар саны 3,3 процентке хызырыл парған, - искірген уполномоченнай. - 2018 чылда - 5,5 процентке, 2019 чылда - 10 процентке чағын. Полған 47,5 муң кізі, халған 39 муң.
Василий Кудашкин закон проекті хоостыра ӱс чӧп кирген: пастағызы - бизнеснең пірге тоғынарға, ікінҷізі - республика бюджедінде регионның программазына, хайзы идінҷектерге хабасчаң федеральнай программанаң палғалыстығ полбас, ахча кӧр саларға, ӱзінҷізі - кічіг паза ортын бизнесті тилідер тоғысха муниципальнай пӱдістерні ӧткін арах тартары.
Чыылығ араласчылары пастағы паза ӱзінҷі чӧпнең чарасхан ползалар, регионның алынҷа программазына ахча табары ікінҷілестіг полчатханын таныхтааннар, улам килер чылға бюджет ахча саринаң оой нимес полар тіп кӧрілчеткенде.
Анаң чыылығ араласчылары республиканың инвестиция киреен чахсыландырҷаң закон проекттерін ӱзӱріп пастааннар. Ӧӧн закон проекті «Хакас Республикадағы инвестиция политиказынаңар» полған. Хакасияның экономика тилізі министрі Николай Евдокимов пу закон проектінде республиказар инвестиция ахчазын тартар пӧгіннең бизнестегілерге хабасчаң оңдайлар кӧріл парған тіп таныхтаан. Иң ӧӧні - региондағы инвестиция проекті (РИП) араласчызы полыбысханнарға налог льготаларын пирердеңер. Че мында пу сурығҷа таластар пар сыххан.
Тиксі Россиядағы чон фронтының региондағы толдырығлығ комитедінің устағҷызы Евгений Мамаевтің кӧрізінең, ол льготалар пирчеткен законнаң хара тас аныпчатхан разрезтер тузалан сығарға айабас. Анзына оларға наа пірігіс тӧстебізерге паза РИП араласчызы полыбызарға ла кирек. Хакасияның финанстар министрі Ирина Войнова паза Ӧӧркі Чӧптің бюджетче комитедінің кнезі Олег Иванов андағ ниме полбас тіп ізендіргеннер.
Сӧӧ тартыл сыххан таластарны чыылығны апарчатхан Василий Шулбаев тохтатхан. Аның таниинаң, разрезтернең палғалыстығ сурығ кӧп чуртағҷыбысты сағыссыратча, аннаңар мында иптеп паза прай саринаң кӧріп тоғынарға кирек.
- Пу оой нимес сурығ, аннаңар аны пӧгерінде маңзырирға чарабас, - таныхтаан ол. - Паза пасха регионнарның опыдын ӱгрен кӧрерге кирек.
Мыннаң чыылығ тоозылған, че пу халғанҷы чыылығ нимес тіп сағынарға халча. Разрезтер хоостыра таластар, тізең, ам даа парар, неке.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде