ХАКАС ДРАМАТУРГИЯЗЫН ПАЙЫТЧАТХАН УС
16.10.2019
Хабарлар
Пайрамнығ иир. А.М.Топановтың адынаң Хакас драма театры, наа чайаачы сезонын азып, хакас чонның саблығ хызы, драматург Валентина Шулбаеваның 80 чазын таныхтаан
ПАСТАҒЫ ХАКАС ИПЧІ-ДРАМАТУРГ
Ирткен неделяда драма театрында чон тол парған. Кізілер РСФСР культуразының саблығ тоғынҷызы, Россияның писательлер пірігізінің кізізі Валентина Гавриловна Шулбаеваның пайрамнығ чазын таныхтирға чыылысханнар. Изебі чох таланттығ чир-суғҷыбыс чоныбыстың поғдархазы полча, аның ады тиксі Сибирьге сабланча.
Валентина Шулбаева Таштып аймаандағы Чыланнығ аалда тӧреен. Чайаачы чолын 1957 чылда пастаан тізе, саба полбас. Ол чыл национальнай школаның ӱгренҷізі «Тайға хыриндағы аалда» пьеса пас салған. Школадағылар пір пӧліктіг пьесаны, сценада турғызып, Хызылчарда кӧзіткеннер. 1961 чылда чир-суғҷыбыс Ленинградтағы хазна университедінің журналистика факультедінзер ӱгренерге кірче.
Саблығ вузта тирең пілістер алып, чиит специалист «Ленин чолы» газетаның редакциязында, анаң Хакас автоном облазының радиокомитедінде істенче. Хығырығҷылар таланттығ журналисттің статьяларын, кӧзідіглерін пӧзік паалаҷаңнар, оларның сығарын чидікпин сағыҷаңнар. Андағ маң чох тоғыста Валентина Шулбаева драматургиядаңар ундубаҷаң. Пьесалар пазарында узын сынап, ол хакас ипчілернің омазын чарыт пирерге кӱстенген. Че критиктер тоғызына хайдағ паалағ пирерлер ни? 1975 чылда хакас абахайны Москва облазындағы Руза городсар тиксі Союзтағы чиит писательлернің семинарынзар ысханнар.Анда Валентина Шулбаева «Сарналбаан сарын» пьесазы ӱчӱн пастағы орынға турысхан. Ол, чир-суғҷыбыстың на нимес, хакас культуразының улуғ чидии полған.
1975 чылда «Сарналбаан сарын» орыс тіліне тілбестелген, режиссер Василий Ивандаев аны хоостыра Хакас автоном облазының театрында ойын турғысхан. Тыл тоғынҷыларынаңар спектакль кізілернің чӱреен кӧӧреткен, кӧрігҷілер аны илееде тус ӱзӱргеннер.
**************************************************************************************************************
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы