АМЫР ХОНЫХТЫ ХАДАРҒАННАР
16.10.2019
Хабарлар
Пресс-конференция.
Ирткен неделяда «Хакасия» газетаның конференц-залында пресс-конференция ирткен. Тоғазығда Ағбан городча Россия УМВД-ның чуртағӌыларның амыр хонығын хадарчатхан полиция пастығының орынӌызы Андрей Петров «Хараағы полиция» профилактика тоғызы чайғызын хайди ирткенінеңер чоохтаан
Ағбанда «Хараағы полиция» тоғызы 17 майдаң 28 сентябрьға теере апарылған. Аның ӧӧн пӧгіні - орамаларда паза чон кӧп чӧрчеткен орыннарда хорғыстар, сайбағлар сығыс килерін азынада сизініп, аны чох идері. Аннаңар Ағбан полиция тоғынҷылары хадарҷаң чардыхтарға чарылған. Пастап «Хараағы полиция» 18.00 - 24.00 частарда тоғынған. Че ол тусты узарадарға киліскен. Анзы изірткіліг суғлар садылчатхан орыннар 1.00 час харааға теере тоғынчатханынан палғалыстығ полған. Аннаңар право хайраллаҷаңнар ідӧк орайға теере служба апарғаннар.
- Минің кӧрізімнең, пістің служба турғызылған пӧгінні чахсы толдырған, - тіпче полиция подполковнигі Андрей Петров. - «Хараағы полиция» хадағда турған туста Ағбанда кізі чуртазына ӱрег ағылчатхан сайбағлар, оғырластар, тудыс-хабыстар полбаан.
Профилактика тоғыстарында полиция тоғынҷылары чуртағҷыларнаң аймах темаларҷа чоохтазығ апарғаннар. Ӧӧн тема кізілер ачығ суғны чон кӧп чӧрчеткен орыннарда амзапчатханына, изірік кізі город аразынҷа субарап чӧрчеткеніне теелген. Ідӧк право хайраллаҷаңнар чуртағҷыларға телефоннар паза Интернет кӱҷӱрлерінеңер чоохтааннар. Пу сынап амғы туста улуғ ағырсымнығ сурығ тіп саналча.
Ағаа хоза, полициядағылар уйан чуртапчатхан сӧбірелерні хайығда тутханнар, ісчеткен іҷе-пабаларнаң, ибдең тизібісчеткен палаларнаң чоохтасханнар.
Право хайраллаҷаңнар садығ тураларын сыныхтаҷаңнар, садығҷылар кізілерге изірткіліг суғны кӧрілген тустың соонда сатпазыннар тіп кӧргеннер.
Полицияа Росгвардия паза ОМОН чахсы хабасхан. Пу кӱс структуралары ӧӧнінде ачығ суғны амзаҷаң орыннарны хадағда тутханнар. Ағбанда иң ай-пораан клубтар «Арсенал» паза «Мята» саналчаттыр. Анда тынанарға чыылысхан чииттер хырыс-табыс, тудыс-хабыс кӧдірерге хынадыр одырлар.
- «Хараағы полиция» профилактика тоғызынаң айғазып, чахсы опыт алындыбыс, - сағызынаң ӱлесче Андрей Петров. - Піс аннаң мыннаң мындар ідӧк ӧткін тузаланарбыс. Пу тоғыстың салтары пар - Ағбан городта сайбағлар саны кӧріндіре хызырылча.
Полиция тоғынҷылары ӧӧнінде Преображенскай, Комсомольскай паза Чиңіс парктарын, скверлерні хайығда тутханнар. Ідӧк олар Щетинкин орамазындағы 59, 60, 63 №№ туралар хыринда ӧткін хайынғаннар. Пу орыннарда чайғызын чииттер чыылызарға хынадырлар. Анаң, суулазып, хатхырызып, изірткіліг суғ амзап, хыриндағы тураларда тынанарға чатхлабысхан чурт ээлеріне чар-хастығ полчалар.
«Хараадағы полиция» тоғыс 2020 чылда чайғызын узарадылар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде