ПОС ТІЛІНЕ ААРЛАС
23.10.2019
Хабарлар
Ағбандағы 22 № школаның ӱгретчізі Елена ТЮКПИЕКОВА олимпиада араласчыларына алғас сӧстерiн читiрче
Ӱгредіг. 21-22 октябрьда Ағбаңда хакас тілінӌе паза литературазынӌа М.И.Боргояковтың адынаң олимпиаданың школа синіндегі чардығы ирткен
Анда республиканың ӧӧн городындағы хакас тілі апарылчатхан школаларның ӱгренҷілері араласханнар - 4 -11 класстағылар. Елена Яковлевна Тюкпиекова 22 № школада хакас тілі уроктарын апарча.
- М.И.Боргояковтың адынаң хакас тілі паза литературазы предметтерҷе олимпиадада пістің ӱгредіг учреждениезінің олғаннары ӧткін араласчалар. Паза пос тілінҷе пілістерінең сыназар кӧңніліг ӱгренҷілер саны чыл сай хозылып одырча. Пӱӱл ле 69 кізі полған! Алындағы чылларда, тізең, иліге дее читпеҷең, - чарытхан ол.
Пу школада ӱр тоғын париған ӱгретчі палалар олимпиаданың мыннаң мындархы тузазын чахсы пілчелер тіпче. Чиңісчілерге, вузтарзар кірчетсе, хоза баллар пирілче нооза. Аннаңар олғаннар пу предметті пір дее ікінҷілебин таллап алчалар. Паза, хайди искірген Елена Яковлевна, пӱӱл олимпиаданың школа синіндегі чардығында пастағызын на 11 класстағы ӱгренҷілер араласханнар.
М.И.Боргояковтың адынаң олимпиаданың кирексіністері хоостыра, школа синіндегі чардыхтың чиңісчілеріне город синіндегі чардыхта аралазарға чол азылча, анаң анда иң артыхтарның санында пол парзалар -тиксі республика олимпиадазында.
- Ирткен чылда пістің ӱгренҷілерібіс Андрей Томочаковнаң Михаил Тюкпиеков город синіндегі олимпиадада артыхтарның санында полғаннар. Пӱӱл дее пістің школаның ӱгренҷілері чиңісчі поларларына тың ізенчебіс, - ӱлескен Е.Я.Тюкпиекова.
Піс тее, 22 № школаның ӱгретчізінің сӧстеріне хозылып, олимпиадада араласчатхан олғаннарға талаан алғапчабыс. Республика олимпиадазына олар хайди даа чидіп алзыннар.
Пу ӱгренҷілерні кӧріп, школа тузы сағысха кір килген. Ӧӧнінде ідӧк хакас тілі паза литературазы предметтерҷе олимпиадаларда араласханы. Че ноға-да чӱрексеенін пір дее оңнап полбинчам. Школа синіндегі, анаң Асхыс аймаа, республика синіндегі олимпиадалар... Чоохтирға сағынчам, чиңісчі полыбысханым сынап таа мағаа чуртазымда чахсы чол ас пирген. Пастап институтсар ӱгренерге кіріп алғам, сыныхтағлар чох. Анаң амды прай чӱреемнең толдырчатхан тоғысха алғаннар. Аннаңар улуғ алғыс хакас тіліне.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы