ИМНЕР СЫНЫХТАҒДА ТУДЫЛАР
29.10.2019
Хабарлар
Пресс-конференция. 1 октябрьдаң сығара аарлығ имнерге танығ турғызылча. 2020 чылның 1 январьынаң ол прай имнерге турғызылар. Пу алызығдаңар пресс-конференцияда чоох парған
Аны иртірген Росздравнадзорның Хакасияҷа имнерні хайығда тутчатхан пӧліктің устағҷызы Светлана Кноп. Специалисттің искіриинең, аптекаларда чахсы имнер садылары прайзын даа сағыссыратча, ӧӧнінде имнер алчатхан чонны. Хайдағ имнер аптекаларзар паза имнег тураларынзар ағылчатханын Росздравнадзор сыныхтапча. Олар садыға сын нимес имнер кірчеткенін ілезіне сығарчалар.
Хай пірее имнернің тузазын кӧрчелер паза, хомай имнердеңер хоптар кірзе, сыныхтағлар апарылча.
- Тиксі Россияда тоғыс ай аразына 269 им садығдаң суурылған. Ол имнернің тузазы закон хоостыра кирексіністерге киліспинче. Оларның тӧрті сын нимес тіп ілезіне сығысхан. Хакасияда тузазы чох 60 им табылған, че сын нимес имнер чох полған. Хомай имнернің 75,2 %-і Россияда сығарылған, пасха хан чирінде - 24,8 %, - искірген Светлана Кноп.
Амғы алызығлар хоостыра имнер сығарчатханнар полған на имнің упаковказында штрихкод турғызарға киректер. Кодты упаковказар чапсыр саларға алай тастында печать турғыс саларға чарир. Андағ маркировка итпинчеткеннерге штраф салылар.
Хайди таныхтаан Светлана Кноп, андағ алызығлар имнернің паазына теелбес. Имнерні сығарчатханнарға ол тоғысты тӧстиріне ссуда пирілче.
Ідӧк имнернің качествозын штрихкод полызиинаң сыныхтирына мобильнай телефоннарға приложениелер тимнелче. Аптекаларда ол штрих-кодтарҷа ол-пу имнеңер прай ниме піліп аларға чарир. Амғы туста имнернің качествозын сертификат пастыра алай Росздравнадзорның сайтында сыныхтабызарға чарир.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы