УЛУҒ ТУЗАЛЫҒ ЧӦРІМ
30.10.2019
Хабарлар
Тіл сурии. Халғанӌы туста хакас тіліне улуғ хайығ салылча. Анзы ноо даа кізіні, уламох ӱгретчілерні, тың ӧріндірче
Піс, ӱгретчілер, хайдағ даа предметті апарзабыс, олғаннарны иң пастап ӧскен чирібіске хынарға, аның ис-пайын арачылирға ӱгретчебіс. Ӧӧн пӧгіннерібіске ідӧк палаларны тӧреен тілібіснең чоохтанарға, ӧбекелернің кибірлерінең тузаланарға кӧніктірері кірче.
Пӱӱн «Ине тілі» чӧрімнің піске уғаа тузалығ тоғызынаңар чоох апарар сағыс пар. Аның пӧгіннері сах андағох нооза. Асхыс аймаандағы Ус чул аалдағы школа анда тӧреміл араласча. Іди 2017 чылда республика мариинда піс 3-ҷі орынға сыххабыс, 2018 чылда, тізең, чиңісчі полыбысхабыс. Сыйыхтар кӧп читірілген, ол санда «Хабар» газетаны тикке алар талон!
Ӱс чулдағы олғаннар командазы пӱӱл дее «Ине тілі» республика фестивальына таллағны чалтырама иртібіскен. Пастағы орынны алып алған! Іди олғаннарыбыс республика фестивальынзар чол асханнар.
Чоохтирға кирек, харбазығ хазыр парған. Прайзы турыстыра тимнен килтір. Хакас кӧг тиріглерінең ойнап сыхханда, кӧрігҷілернің паза чарғыҷыларның кӧңні уламох кӧдіріл турған. Піди ле полза, хакас тілі чітпес тіп сағынчазың. Аннаңар улуғ алғыс читірерге сағынчам Зинаида Андреевна Чертыковаа. Уғаа чахсы паза кирек чӧрімні чуртасха кирген ӱчӱн. 31 октябрьда «Ине тілі» фестиваль республика синінде иртер. Ізенчем, пістің школаның ӱгренҷілері постарын ідӧк турыстыра кӧзідерлер.
Автор :
Виктория ТОМОЧАКОВА, Ӱс чулдағы школаның хакас тілі паза литература ӱгретчiзi
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы