ТӦРЕЕН ЧИР КӰС ПИРЧЕ
01.11.2019
Хабарлар
Чылығ тоғазығ. Хакас чирінің саблығ писательлері Валентина Шулбаеванаң Анатолий Султреков Чыланнығ аалзар чир-суғӌыларынаң тоғазарға кил парғаннар
Пӱӱл Валентина Гавриловна пайрамнығ тӧреен кӱнін таныхтаан.
Позының чайаачы чуртазында ол кӧп чидіге читкен. Че анын ӧӧн чидии - ол чонның хынызы. Валентина Шулбаеваның произведениелері кізінің чӱреен тибіретчелер, чуртаста сын чолҷа парарға ӱгретчелер.
Аннаңар ол чайаан тоғыстар чонға чағын, пілдістіг. Пӱӱн ол прозаик, Хакасияда пастағы ипчі-драматург, Россияның писательлер пірігізінің кізізі, Россияның паза Хакасия культуразының саблығ тоғынҷызы, Хакасия искусствозының саблығ тоғынҷызы, Н.Ф.Катановтың адынаң Хакас Республиканың хазна сыйииның лауреады полча.
Анатолий Егорович ідӧк пу чылда тоғылах чазын толдыр салған. Минің кӧрізімнең, сағам ол чайаачы чолында иң кӱстіг тузында. Аннаңар аның чітіг сағызынаң ам даа кӧп турыстыра тоғыс тӧрир. Пу чазына читіре Анатолий Султреков илееде кинде чарыхха сығар салған. Аның ниик холынаң Хакасиябыстың прай даа саблығ кізілерінеңер піліп алчабыс. Анатолий Егоровичтің матырлары пістің арабыста чуртапчатхан, чуртаан саблығ спортсменнер, чайаачы тоғынҷылар. Олған-узахты ідӧк ӧріндірче оларға ӧнетін пасхан чоохтарынаң. 65 чазына чахсы чидіглернең читкен чайаачы ус. Амғы туста аның чуртас чыындызында аттар, сыйыхтар кӧп. Ол СССР-ның журналисттер пірігізінің кізізі, Хакасия культуразының саблығ тоғынңызы, Россияның писательлер пірігізінің кізізі, Хакас Республика пазының литературада Н.Г.Доможаковтың адынаң сыйииның лауреады полча. Амды Анатолий Султрековха чон аразындағы пірее сыйыхха ла сығарға халча тіп сағынчам. Аның чітіг сағызы, тыс пілбес хылии ол пирік тағның пиліне сығарына ізеніс пирче.
Октябрьның сырых наңмырлығ кӱнінде Чыланнығ аал клубында чон толдыра чыыл парған. Саблығ писательлер, чир-суғҷылары, ааллап килчелер нооза. Мындағ тоғазығлар полчатсалар даа, оларнаң хатап чоох алызып аларға, наа хабарлар истіп аларға чапсых нооза. Ағаа хоза амғы туста саблығ, улуғласнаң тузаланчатхан чир-суғҷыларының аалда туған-чағыннары пар.
Хакас чонның кибірі хоостыра Культура туразы алнында хазанда хой иді хайнапчатхан. Улуғ аалҷыларны тосханҷа азырабин хайди удурлир. Пістің чон ырах чолда чорыхчының хоратхан кӱзін хайди даа айландыр пирерге кӱстенче нооза. Итсе, пӱӱнгі кӱнде чазағ чӧрбинчелер. Че, андағ даа полза, кибір пістің чонның ханында, аны чох ит полбассың.
Чарлалған тусха чон-чахсы чыыл парғанда, тоғазығ пасталыбысхан. Пастағы сӧсті аалҷыларға пиргеннер. Улуғ чоохтазығны пастабысхан Хакасияның литераторлар туразының устағҷызы Надежда Афанасьевна Бурнакова. Чайаачы устарнаң хада-пірге тоғынчатхан кізі Валентина Гавриловнаның паза Анатолий Егоровичтің чуртас чолларынаңар, тоғыстарынаңар чоохтап пирген. Клубта одырчатханнарның кӧп сабазы саблығ чир-суғҷыларынаңар чахсы пілчелер. Аннаңар оларның чуртас чоллары ӧӧнінде ӱгренҷілерге, чииттерге чапсых полған. Че пасха кізі нинҷе дее чоохтанза, аалҷының чооғы аарлығ нооза. Сӧс алған Валентина Гавриловна:
- Пістің чирдең артых чир чоғыл. Тиктең нимес минің чоохтарымда, пьесаларымда матырларның аттары прай аалымдағыларның аттарынаң адал парчалар. Пістің улуғ даа нимес аалыӌаабыста уғаа талааннығ чон чуртапча. Мин чирімнең кӱс алчам. Пірееде Пыдырахта тоғазығларда пол парарға килісче. Че мин Чыланнығзар хайди даа читчем, туған-таныстарыма тоғазып алчам.
************************************************************************************
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы