ЧАЙААЧЫ КӦҢНІЛІГЛЕРГЕ - СЫЙЫХТАР
13.11.2019
Хабарлар
Чиңісчі Мария ЖИГУЛИНА прозаик, поэт, тахпахчы Альбина КУРБИЖЕКОВАНАҢ
Марығ. «Минің тӧреен тілім» республика марии ирт парды. Аның чиңісчілеріне сыйыхтарны Хакасияның литераторлар туразында читіргеннер
Пу марығ Тӱрк пічиинің паза культуразының кӱннеріне чарыдылып иртірілген. Аның пӧгініне чонны тӧреен тілні, чир-суубысты,тархынны, культураны ӱгренеріне кӧніктірері кірче. Ідӧк марығ Россия нациязын піріктірер паза Хакасияның чонын ынағ чуртадар пӧгіннең чуртасха кирілген.
Пӱӱлгі марыға 35 чайаачы тоғыс алылған. Араласчылар хакас алай орыс тілінең кибеліс, чоох, эссе, сочинение пасханнар. Жюри оларны ікі номинацияҷа паалаан: «Тӱрк пічиинің паза культуразының кӱннеріне чарыдылған литература тоғызы»; «Поэт, писатель, драматург М.Е.Кильчичаковтың 100 чазына чарыдылған литература тоғызы». Марығҷылар частары хоостыра 23 часха теере паза аннаң улуғларына чарылғаннар.
Чыылған чонзар алғыстас сӧстерінең Хакасияның национальнай паза территориальнай политика министрі Михаил Побызаков сыххан:
- Изеннер, аарлығ нанҷылар! Полған на кізінің тӧреен тілі пар поладыр. Пос тілін пілгені прайзын пайытча. Мындағ марығлар иртірілчеткені чапсых тоғыстарны ілезіне сығарарға полысча, чайаачы оңдайны асча. Хакасияның литераторлар туразы, культура, ӱгредіг паза наука министерстволары улуғ тоғыс апарғаннар. Республикада хакас тілі ӱгретчілеріне, студенттерге паза пасхазына тілнең айғасчатхан ӱчӱн ахчалығ сыйыхтар пирілче. Аннаңар мындағ мероприятиелерде, гранттар мариинда аралас турарға хығырчам. Пӱӱл тілге, культураа чарыдылған кӧп мероприятие ирткен. Сірер, пу марығда аралазып, чон кибірлерін, ынағлазын хайраллирына хозым итчезер.
Аның соонаң марығ чиңісчілері сыйыхтар алғаннар, пастағы ӱс орынға турысханнары дипломнарнаң таныхтатханнар. «Тӱрк пічиинің паза культуразының кӱннеріне чарыдылған литература тоғызы» номинацияда 23 часха теере чиңісчілер адалғаннар: I орын - Мария Жигулина (Ис пилтірі аал), II орын - Ульяна Коскина (Харатас г.), III орын - Виктория Балаклеец (Харатас г.). 24 частаң улуғлары аразынаң I орынны Инна Тодинова (Ағбан г.) холға кирген, II орында - Клара Сербигешева (Казанов аал), III орында - Зинаида Толмачева (Пилтір аал).
«Поэт, писатель, драматург М.Е.Кильчичаковтың 100 чазына чарыдылған литература тоғызы» номинацияда 23 часха теере сыйыхтатханнар: I орын - Николай Майнагашев (Аршаннар аалы), II орын - Анна Сагалакова (Ағбан г.), III орын - Сабрина Соибова (Хызыл кӧл аал). Улуғлардаң I орын Галина Чебодаеваа пирілген. Ікінҷі паза ӱзінҷі орыннарны Карина Кулумаеванаң (Ағбан г.) Александра Ким (Хубачар аал) алғаннар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы