САБЛЫҒ ПИСАТЕЛЬНІ САҒЫСХА КИРІП
15.11.2019
Хабарлар
Писатель М.Е.КИЛЬЧИЧАКОВТЫҢ чайаачызына чарыдылған иир
М.Е.Кильчичаковтың 100 чазына. Михаил Еремеевич Кильчичаков - пістің хакас илбек поэдібіс, писательібіс, хайхыбыс, драматургыбыс, артизібіс. Ағаа 21 ноябрьда тоғылах час толарҷых
Тӧріткен чирім, Хакасиям минің,
Мағаа кӱлінче чарых оттарың.
Чалбах чазыларың, пӧзік тағларың
Пір дее ундулбас минің чӱреемде...
Нинҷе ни хатап пу сӧстер сценадаң истілгеннер? Че полған на сай кізінң хайиин олар тартчалар. Піди кӧрзе, олаңай ла сӧстер, че чӱректі хайди тибіретчелер... Пу кибелістің авторын пілбинчеткен кізі чох таа полар, неке.
Михаил Еремеевич Кильчичаковты аарлап, пӱӱл тиксі Хакасияда аймах мероприятиелер иртірілчелер. Республика, аймах синінде алай кічіг аалда ол танығлығ иирлер апарылчалар, пасхазы чоғыл, прайзы, аны сағысха киріп, улуғ алғыс ағаа читірче, ағаа поғдархапчатханнарын кӧзітчелер.
Ӏди 2 ноябрьда Пии аймаандағы Киндірліг пилтірі аал чуртағҷылары, улуғлар паза олған-узах, М.Е.Кильчичаковтың 100 чазына чарыдылған иир иртірілчеткенін истіп, клубта чыылысханнар. Пу танығлығ иирні А.М.Топановтың адынаң Хакас драма театрының саблығ артисттері Геннадий Николаевич паза Светлана Семёновна Чаптыковтар апарарға кирек полғаннар. Улуғ аалҷыларны чидікпин сахтап одырғабыс. Че, читтілер. Иир пасталча.
Сценаа пастап школа ӱгренҷілері сыхханнар. Пос хакас кип-азаан кис салғанда, олар хайдағ ӧкер кӧрінгеннер, чахайахтарға тӧӧй полғаннар. Ам піске Вика Середкина писательнің чуртас чолын чоохтап пирді. М.Е.Кильчичаков хара кічігдең тахпахчылар, хайҷылар аразында ӧстір. Пабазы нымахтар ысчаң, іҷезі хомыс хахчаң, нымахтар чоохтаңаң, тайызы саблығ хайҷы полтыр. Кічіг оолғы писатель полар тіп пір дее сағынминдырлар, хайҷы полар тіҷең полтырлар.
Амды соон сӱрістіре олғаннар кибелістер хығырчалар: Ангелина Чебодаева - «Хакасиям минің» кибелісті, Ксения Чебодаева - «Тӧреен тілім», Катя Сагалакова - «Ӏҷем», Юля Канзычакова, Саша Сагатаева, Рома Чебодаев - «Кӧк тайғам», Сережа Тюльберов - «Хозанах». Оларны хынып истіп алдыбыс. Хомыснаң чӱрекке теерте Таня Сагатаева ойнап пирді. Айдас оларға!
Аннаң андар Светлана Семёновна писательнің чуртазынаңар, чайаачызынаңар чоох апарған. Ол Михаил Еремеевичнең чахсы таныс полтыр. Ол олаңай чуртаста хайдағ полғанын, хайди тудынғанын чоохтап пирген.
Пу чоохтаан чапсых нимелерні пір дее киндеде таппассың. Геннадий Николаевич, тізең, «Ӏкі кинек» кибелісті хығыр пирген.
Улуғ алғыс чалахай иир ӱчӱн аарлығ ӱгренҷілерге паза чайаачы артисттерге!
Автор :
Надежда САГАЛАКОВА, Киндірліг пилтірі школаның ӱгретчізі
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы