ПАСТАҒЫ РУБАИЛЕР ЧЫЫНДЫЗЫ
15.11.2019
Хабарлар
Наа чыынды. Хоос сӧс узы Геннадий Кичеевтің наа тоғызы «Чаным сӧстері» адалча
Кибелісчі андар рубаилерні, iкiлiктернi кир салған. Прай 300 азыра тоғыс.
- Оох жанрларнаң ирткен чӱс чылның тоғызон чылларында айғазып пастаам. Іди хакас поэзиязына пастағызын на сонеттерні киргем. Франческо Петрарканың паза Уильям Шекспирнің сонет формаларынаң пазылған кибелістерімні «Хакас чирі» газетада сығарғам. Соонаң сонеттерні пасха даа авторлар пас сыхханнар. Ідӧк пастағызын на хакас поэзиязына эпиграммаларны кир салғам, - чарытхан автор.
Геннадий Кичеевтің таптырғас эпиграммалар парох. Оларның хай пiреезi кӧнізінең кемге-де теелче. Хормачы тӧртліктері, тізең, саблығ писатель, драматург Илья Топоевке чарыдылчалар. Хайди Г.В.Кичеев аннаң андар чоохтап пирген, тӧртлік-рубаилерні хакас поэзиязына М.Е.Кильчичаков кир салған. Че ол тилібин халған. «Аннаңар мин 20 чыл азыра рубаилер пазып сірендім. Амғы туста тӧртлік-рубаилер пістің поэзияда пик орных парғаннар. Пӱӱн пу жанрда тоғынчатхан кізі паза чоғыл. Ікіліктер, хакас поэзиязына киріліп, ідӧк читіре тилібин халғаннар. Пу даа жанрны ӧңнендір саларға кӱстенчем. Паза таныхтирға сағынчам, амға теере хакас рубаилер чыындызы сыхпаан полған. «Чаным сӧстері» - пастағызы», - тіпче ол.
Геннадий Кичеев пӱӱл 60 чазын толдыр салды. Ана пу пайрамнығ тӧреен кӱніне сыйых иткен оңдайнаң ол 20 чыл азыра пасхан рубаилернің паза ікіліктернің чыындызын 300 экземплярлығ тимнебіскен. Ағаа аны чарыхха сығарарға Хакасияның культура министерствозы паза Чайаачылар туразы чахсы хабас пиргеннер.
- Алынӌа алғыс читірерге сағынчам Надежда Афанасьевна Бурнаковаа. Аның амғы олаңай нимес чуртаста ахча пазына сығар оңданлар таап полчатханы ӱчӱн. Паза алғыс ползын Хакас книга издательствозының тоғынӌыларына. Чыынды анда сығарылған нооза, - ӱлескен поэт Геннадий Кичеев.
Г.В.Кичеев, чыындыдағы пастағы сӧсті алып, мындағ сағыстарынаң ӱлесче: «Пӱӱн дее хакас поэзия чазызы аймах-пасха чахайахтарнаң ӧңненче. 60 чазым чағдап килген дее полза, мин ол чазыдаң, чахайах-кибелістерні хучахха толдыра ӱзіп албаанда, парыбыспаспын тіп сағынчам. Ол чахайах-кибелістерімні сірерге, хығырығҷыларға, сыйлапчам мин. Ит салған тоғызыма ӧӧн паалағны сірерӧк пирерзер нооза».
Аннаңар «Чаным сӧстерін» ідӧк сірер паалирзар, неке, аарлығ хығырығҷылар...
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде