ЧИР-ЧАЙААННАҢАР САҒЫССЫРАС
27.11.2019
Хабарлар
Школа-конференция. 21 ноябрьда Н.Ф.Катановтың адынаң Хакас хазна университедінде студенттернің паза чиит ученайларның «Ӱстӱнзархы Си6ирьнің паза хости чирлернiң экологиязы» наука школа-конференциязы ирткен
Пӱӱл пістің республиканың ӧӧн университеді тӧстелгеннең пеер 25 чылын таныхтапча. Аннаңар экология конференциязы ХГУ-ның танығлығ ӱлӱкӱніне чарыдылған. Араласчылар Хакасиядаң, Бурятиядаң, Тувадаң, Хызылчар крайынаң, Новосибирск облазынаң паза пасха даа регионнардаң килгеннер. Аалҷыларны чылығ сӧснең университеттің ректоры, экономика наукаларының докторы, профессор Татьяна Краснова удурлаан:
Мин экологтарның школа-конференциязын пизінҷі хати асчам. Пістің республикада пу чалғыс конференция, хайзы 23 чыл изере иртче. Мин, улуғ форумнарның, конференцияларның тархынын істескенде, чибіргі чыл изере иртірілген мероприятиелерге паза тоғаспаам. Аннаңар, сағынчам, экология конференциязы 25 чылын толдыр салза, пірее рекордтар киндезіне кір парарға айабас. Ол иң тузалығ паза кирек конференция полча.
Сынны чоохтаза, экологияа чарыдылған конференция пістін республикаа уғаа кирек. Аның ӧӧн темазы чылдаң чылға иң ағырсымнығ сурығ полча. Хакасияда хара тас промышленнозы тиліпче, аннаңар чир-чайаанға теелчеткен ағырсымнығ сурығлар пу чыылығда ідӧк кӧдірілчелер. Мында чиит істезігҷілер паза студенттер ӧткін араласчатхан ӱчӱн, пу мероприятиені «школа-конференция» адап салғаннар. Студенттернің кӧбізі ам на науканаң айғазып пастапча, хайзы-да ікілер-ӱзер хати конференцияда аралас парир.
ХГУ-ның ректоры Татьяна Краснова, экологтарның наука конференциязын иртірерге полысхан ӱчӱн, Хакасияның правительствозын паза Ӧӧркі Чӧбін алғыстаан. Ідӧк ол, конференцияа тимненерге, ыраххыдаң килген аалҷыларны удурлирға ахчанаң хабасхан ӱчӱн, Майрыхтағы разрезке алғыс сӧзін читірген. Пу хара тас аныпчатхан компаниядаң конференцияда Нейла Саитовна Янулевич араласхан. Ол Майрыхтағы разрезтің директор орынҷызы полча, экология сурығларын пӧкче.
Хакасияның чир-чайаан ис-пайы паза экология министрі Сергей Арехов, чылығ сӧстерге хозылып, чиит ученайларзар айланған:
- Пӱӱн прайзын Хакасия пазы Валентин Олегович Коноваловтың чахии хоостыра танығлығ кӱннең алғыстапчам. Сынап таа, пу конференция Россияның рекордтары киндезіне кір парарға айабас. Піс, профильнай министерство полып, экологияның ағырсымнығ сурығларын кӧдірчеткен мероприятиелерні иртірерге хайди даа хабазарға кирекпіс. Ідӧк кем позының алнында улам пӧзік пӧгін турғысча, аны министерствозар тоғысха хығырчабыс. Пісте сірер пу конференцияда искірілген сағыстарың толдыр поларзар.
Экологтарның наука конференциязы 1997 чылдаң сығара Н,Ф.Катановтың адынаң Хакас хазна университедінде иртірілче. Аны тӧстеен докторлар, профессорлар пірееде сағысха тӱзібісчелер: «Нинҷе чыл пу конференция иртірілер?», «Кирек пе пу конференция?» Че олар, пу мероприятие тузындағы ӱлӱкӱнні, чылығ хайызығларны кӧріп алзалар, ікінҷілепчеткен сағыстарын хыйа сӱрчелер.
Конференцияның ӧӧн чардығында істезігліг тоғыс тимнеп салған чииттер, секцияларға чарылып, докладтарын хығырғаннар паза удур-тӧдір сурығлар пиргеннер. Полған на араласчаа тоғызын арачылирына 10 минута пирілген. ХГУ-ның студенттері ӧӧнінде хара тас разрезтері тоғыстарынаңар, хайди олар чир-чайаанға теелчелер паза республикадағы сӧп-сап сурии хоостыра істезігліг тоғыстар апартырлар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде