ГАЗЕТА АДЫН АЛЫСТЫРАРЫ - ӰЛГӰ ӰЗӰРИИНДЕ
29.11.2019
Хабарлар
Хакасияның Ӧӧркі Чӧп кнезі Владимир Штыгашевтің устаанынаң президиум 13-ҷі сессия соонаң теестегі чыылыға чыылысхан
Хакасияның Ӧӧркі Чӧбінің президиумы теестегі чыылиинда республиканың сигіс закон проектінең танысхан паза федеральнай закон проекттеріне ӱндескен. Ідӧк президиум ӱзӱриине «Хабар» газетаның айланызы кірген. Газета хығырығҷылары, ӧӧн редакторы Радион Сунчугашев паза тоғынҷылары учредительлерні, Хакасия Правительствозын паза Ӧӧркі Чӧбін, газета адын алыстырарға сурынчалар. «Хабар-Известия» газетаа «Хакас чирі» адын айландырардаңар айланыстар хаҷаннаң ала редакциязар кірчелер. Хакасия пазы Валентин Коновалов тоғызын пастаандох, газетаның хығырығҷылары, аннаң тоғазып, сурыныстарын читіргеннер. Пӱӱнгі кӱнде правительство газета адын алыстырарынаң чарасчатханнаңар чарадығ алыбысхан. Амды сурығнаң танызар Хакасияның Ӧӧркі Чӧбі.
Хакасияның закон проекттері аразында Профсоюзтар федерациязы оларның ис-пайына, Ағбан городтағы Чертыгашевтің орамазындағы профсоюзтар туразына, налог льготаларын пирердеңер сыххан. Федерация кнезі тоғызын толдырчатхан Евгения Ольховскаяның искіриинең, федерацияа 13 кӧстегліг профсоюз кірче, 35 муң араласчы саналча, хайзылары ай сай чал ахчазынаң 1% взнос тӧлепчелер. Ол ахчаның ӧӧн чардығы тоғыстағы саайларны істезеріне, тоғынҷыларнын правозын арачылирына парыбысча. Пӱӱл профсоюзтар тоғынҷыларның тоғыста кинен полған 50 киректі істесчелер, ол санда 12 тоғынҷының ӱреенін. 2018 чылның паза 2019 чылның ӱс кварталы ӱчӱн пу тураа налогча ӧдіс 948 миллион салковайға тиңнелчеттір. Евгения Ольховская, закон пӱӱл алылып, пу чылға льгота саналар тіп ізенген. Че налогтар республика бюджедінің парызы полчатханнаңар, закон проектін правительствоның ӱндезиине ызарға чарадылған. Чағынғы сессия ӱзӱриине ол сығарылбас.
Президиум чыылиина Хакасия правительствозының кізілері кӱн суриина кирілбеен тӧрт закон проектінең сыхханнар, ол санда 2020 чылда тиксі Россиядағы чуртағҷыларны санға аларына муниципальнай пӱдістерні тимнирінеңер паза ол кӧстеге ахча позыдардаңар. Хакасияның экономика тилізі министрі Николай Евдокимовтың таниинаң, федеральнай синде сананыс оңдайлары тимнелгеннеңер закон проектін тимнирі сӧӧ тартыл парыбысхан. Пу закон проекті 14-ҷі сессияда ӱзӱрілер.
Ӱндезіг пирілген проекттер аразында аалдағы чуртағҷыларға тузалығ проекта таныхтирға чарир. Пӱӱнгі кӱнде чуртағҷаа от сабарға чирні, аал чӧбінең чӧптезіп, ӱс чылға арендаа аларға чарир. Соонаң ол чуртағҷы чӧптезігні ӱсче хати узаратча. Аалдағыларға пір сурыныснаң полған на ӱс чыл пазынаң айланмас ӱчӱн, от сабар чирнең тузаланарға чӧптезігнің тузын он чылға ӧскірердеңер алызығлар кирерге сағынча Самарадағы Губернскай Дума. Хакасияның Ӧӧркі Чӧбі пу алызығларнаң чарасхан.
Килчеткен сессия улуғ хырлас айының 11-ҷі кӱнінде 10.00 часта иртер. Депутаттар хайиина «Искірігліг паза телекоммуникациялар технологияларын тузаланып, хазна устанызының тоғызын чахсыландырып, Хакасия чуртағҷыларының чуртас синін кӧдірген тоғыстаңар» искіріг «правительство чазында» сығарылар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы