ӰЛГӰ МУНИЦИПАЛИТЕТТЕРНІҢ СУРЫҒЛАРЫН ПӦГЕРГЕ КӰСТЕНЧЕ
03.12.2019
Хабарлар
Муниципалитеттер чӧбі. 29 ноябрьда «Хакасияның муниципальнай пӱдістер чӧбі» ассоциация XII чыылиин иртірген
ЧЫЛДА ПІР ХАТИ РЕСПУБЛИКАНЫҢ ПРАЙ МУНИЦИПАЛЬНАЙ ПӰДІСТЕРІНІҢ ПАСТАРЫ УЛУҒ ЧЫЫЛЫҒ ИРТІРЧЕЛЕР. АНДА ОЛАР ПОСТАРЫНЫҢ СИДІКСІНІСТЕРІН ИСКІРЧЕЛЕР ПАЗА АННАҢ СЫҒАР ЧОЛ ТІЛЕПЧЕЛЕР.
ПӰӰНГІ КӰНДЕ ХАКАСИЯДА 99 МУНИЦИПАЛЬНАЙ ПӰДІС САНАЛЧА, ПУ НААДА ИРТКЕН ЧЫЫЛЫҒДА 112 КІЗІ АРАЛАСХАН. АССОЦИАЦИЯ ЧЫЫЛИИНДА АРАЛАЗАРҒА ХЫҒЫРТЫЛҒАННАРНЫҢ САНЫНДА ХАКАСИЯ ПАЗЫ ВАЛЕНТИН КОНОВАЛОВ ОРЫНҶЫЛАРЫНАҢ ХАДА ПАЗА ХАЙ ПІРЕЕ МИНИСТРЛЕР ПОЛҒАННАР. ІДӦК ТОҒАЗЫҒДА РЕСПУБЛИКАНЫҢ ӦӦРКІ ЧӦП КНЕЗІНІҢ ОРЫНҶЫЗЫ ЕВГЕНИЙ МОЛОСТОВ, КОМИТЕТТЕР УСТАҒҶЫЛАРЫ, КІЗІ, ПАЛА ПАЗА ИДІНҶЕКТЕР ПРАВОЛАРЫНҶА УПОЛНОМОЧЕННАЙЛАР ПАЗА ДАА ПАСХАЗЫ АРАЛАСХАННАР.
Чыылығны пастир алнында ассоциацияның кнезі Абрек Челтыгмашев муниципальнай пӱдістер чӧбін тӧстеен кізілерні алғыстаан паза сыйыхтар читірген. Андағ 16 кізі полған. Олар прайзы ам даа город, аймах алай ба аал пазы полып тоғынчалар.
Ассоциация чыылииның араласчыларынзар Хакасия пазы Валентин Коновалов айланған.
- Муниципальнай пӱдістер чӧбінің чыылии - ол чоох алысчаң ол-пу сурығлар пӧкчең паза салтарлар итчең чахсы орын. Сірернің сидіксіністерің піске пілдістіг, олар сірерни ле нимес, ол правительствоның ағырсымнығ сурии полча. Оларны піс хада-пірге пӧгерге кӱстенерге кирекпіс. Хайди? Пастағызы, ол - национальнай проекттерде паза федеральнай программаларда аралазары. Ікінізі, орында чуртас синін кӧдірерге кӱстенері. Ниме харығ полча оларны толдырарға? Ол - муниципальнай пӱдістердегі специалисттернiң тӧбін квалификациязы. Хай пірее аал чӧптері проект-смета пічіктерін тимнеп полбинчатхан сылтаанда, илееде программада аралазар оңдай чох полча, - таныхтаан чооғында Валентин Олегович.
Ідӧк Хакасия пазы 2019 чылда ӱгредіг киреенде кӧп тоғыс иділ парғаннаңар искірген. Килчеткен чылда олған садтарын паза школаларны пӱдірер тоғыс узарадылар. Ӱгредіг кирее чахсы тиліпчетсе, имнег кирее ӧріндірбинче.
- Чуртағӌыларнаң полған на тоғазығда чон имнег киреене хомзынча. Піс имнег учреждениелерін, ФАП-тар пӱдірчебіс, че анда тоғынар специалисттер чидіспинче. Муниципалитеттер пастарына, специалисттерні постарынзар тартып алар ӱчӱн, чахсы оңдайлар тимнеп саларға кирек, - теен ол.
Ідӧк регион пазы аймахтар пастарын орында парыстанчаң оңдайлар тілирге хығырған.
- Полған на муниципалитете тузаланминчатхан чирлер пар. Республикада 168 муң гектар чир тастал парған. 2020 чылда оларны прай иптеп саларға кирек полар. Ол орындағы бюджетке хоза парыс ағыларға кирек, - хосхан Валентин Коновалов.
Муниципалитеттер пастары прайзы пір орында чыылысханда, Хакасияның пала праволарынча уполномоченнайы Ирина Ауль оларзар айланарға маңзыраан. Ол чоох тудар алнында, кӧбізі аның айланызынаңар сизінген полар. Халғанҷы туста республикада улуғларның салбыр тудынғаны сылтаанда нинҷе-де кічіг паланың чуртазы ӱзілген. Ирина Евгеньевнаның искіриинең, улуғлар ачығ суғ амзапчатханнаңар паза тоғынминчатханнаңар, палалары хайығ чох халчалар. Ирина Ауль полған на аал чӧбі пазынаң андағ сӧбірелерні хайығда тударға сурынған.
Чыылығда ӧӧн искірігнен чоох тутхан ассоциацияның кнезі Абрек Челтыгмашев. Ол орындағы пос устаныстар паза республика ӱлгӱлері халғанҷы чылларда піліспин тоғынчалар тіп таныхтаан. Аның кӧрізінең, Хакасияның правительствозы муниципальнай пӱдістерге читкіӌе нимес ахча позытча.
- 2019 чыл тоозылғанӌа муниципалитеттерге чуртап парыбызарға 1 миллиард 200 миллион артиинаң салковай киректелче. Ол чабылған счеттарны азары, чал ахчазын тӧлирі, ЖКХ полызығлары ӱчӱн саназары паза даа пасхазы, - таныхтаан чооғында Абрек Васильевич.
Чыылығда муниципалитеттер пастары федеральнай ӱлгӱзер айланарға чарадығ алғаннар. Анда олар пу чыл тоозылғанча республикаа 1 миллиард 200 миллион салковай позыдарға сурынчалар.
Пу айланыснаң Хакасияның Оӧркі Чӧп кнезінің орынҷызы Евгений Молостов чараспаан. Хайди ол таныхтаан, Оӧркі Чӧп паза Правительство ахча суриин сыбыра пӧгерге кӱстенчелер. Ағаа хоза, айланыс соонаң федеральнай кін ахча позытса даа, ол пір ле ай чуртирға чидер.
- Мындағ пічікнең айланарға итсе, иң пастап тиксі республиканың таңдағызынаңар, 2020-2021 чыллардаңар, сағынарға кирек, - теен Евгений Викторович.
Муниципальнай пӱдістер пастары федеральнай кінзер айланар чарадығнаң республика устағ-пастаа чарасхан. Ідӧк пу чағында Хакасия пазы Валентин Коновалов орынҷызы Ирина Войнованаң хада Москвазар тоғыс чорығынаң парарға тимненче. Олар анда Россияның финанстар министерствозынаң республикаа ахчалығ полызығ сурарға пӧгінчелер.
Че, таныхтирға кирек, республика бюджедінің сидіксіністері киҷее-пӱӱн пасталбаан. Нинҷе-де чыл изере хазна ӧдізі ӧскеннеңер, муниципальнай пӱдістерге дотация ікі хати хызырылған. Амды, тізең, кирек сала алызып одырча. Валентин Коноваловтың искіриинең, хазна алымы кӧместең хызырылча. Амды муниципалитеттерге дее хабасчаң оңдай пар. Іди килчеткен чылда республиканың аймахтарына 14 миллиард артиинаң салковай позыдылар, ол санда 800 миллион салковай аалларның ағырсымнығ сурығларын пӧгеріне.
Автор :
Оксана СУНЧУГАШЕВА Сом Дмитрий СУНЧУГАШЕВТИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы