ХАЗЫХ ЧУРТАС ОҢДАЙЫНА ТУДЫНЫҢАР
03.12.2019
Хабарлар
Пресс-конференция. Тиксі тилекейде 1 декабрьда СПИД-таң тоғыр кӱресчең кӱн таныхталча. Пістің республикада ол кӱнге удур аймах-пасха профилактика мероприятиелері иртірілче
Ӱр ниместе «Хакасия» газетаның пресс-центрінде специалисттернең кибірге кір парған тоғазығ иртірілген. Хабарҷыларнаң Хакасияның хазых хайраллаҷаң министрінің орынҷызы Елена Андрейчикова, СПИД-таң тоғыр кӱрезіг паза профилактика апарчатхан республика кінінің ӧӧн имҷізі Николай Конгаров паза Роспотребнадзорның Хакасияҷа управлениезінің эпидемиология пӧлии пастығының орынҷызы Ирина Каплярова тоғасханнар. Олар ВИЧ-чуғынҷах ағырығнаң республикада нинҷе кізі ағырчатханнаңар паза санға алылғаннаңар искіргеннер. Ідӧк хайдағ имнег, профилактика тоғыстары апарылчатханнаңар чоох парған.
Хакасияда ВИЧ-чуғынҷах ағырығнаң ағырчатханнар прай муниципальнай пӱдістерде ілезіне сығысчалар. Республикада ол ағырығнаң ағырчатханнар 2753 кізі санға алылған. 2019 чылның он айы аразына Хакасияда ла ВИЧ-чуғынҷах ағырығнаң ағырыбысхан 319 кізі сығысхан, ирткен чылда - 405 кізі.
Хакасияның хазых хайраллаҷаң министрінің орынҷызы Елена Андрейчикова искірген:
- Пӱӱл сентябрь айға теере ВИЧ-чуғынӌах ағырығнаң ағырчатхан 1321 кізі диспансерде санға алылған. Оларның 850 ле кізізі имненче, ол тиксі ағырчатханнарның 65 проценті пол парча. ВИЧ-чуғынӌах ағырығнаң ағырчатханнарға чуртас тооза сыбыра имнер ізерге киректелче. Ағырчатхан кізілер, специалисттернің чӧптеріне тудынмин, имнерні сыбыра іспин салчалар. Анзы сидіксініске ағылча.
СПИД-таң тоғыр кӱрезіг паза профилактика апарчатхан республика кінінің ӧӧн имҷізі Николай Конгаровтың чооғынаң, ВИЧ-чуғынҷах ағырығдаң имненіп алҷаң им чоғыл, че аны тузында ілезіне сығарып имнензе, аның чуғынҷағы чох иділер. Ол кізі чуртазын узах идер.
- ВИЧ-чуғынҷах ағырығ хан пастыра паза ікі кізі узыбысса, чух парча, ідӧк ағырығ іӌе ыңааӌаана имӌектеп чухтыр салча. Аннаңар чуғынӌахты ал чӧрчеткен кізіні, ілезіне сығарып, имнирге кирек. Ағырчатхан кізее, хазиин сыныхтанып, тузында санға турып имнензе, уламох чахсы полар. Имненчеткен кізінің чуғынҷағы чох иділче, аннаңар пасхазына ол хорғыс ағылбиныбысча.
Полған на кізі чурты хоостыра имнег поликлиникаларында вирусха сыныхтағ иртібізер оңдайлығ, - искірген Николай Конгаров.
Ідӧк специалисттернің таниинаң, Хакасияда ВИЧ-чуғынҷах ағырығнаң ӧӧнінде 30 - 39 частығлар ағырыбысханы ілезіне сығысча, ол прай ағырчатханнарның - 45 проценті. 40 час ас парғаннар - 35 %. Олғаннар паза саарбахтар - 20 %. ВИЧ-чуғынҷах ағырығны чухтырғаннарның 70 азыра %-і ирен паза ипчі аразында полчатхан палғалыстар ӱчӱн, 25 %-і наркотиктернең тузаланған сылтаанда чухтыр салған.
Имҷілерні паза эпидемиологтарны ӱрӱктірче, 20 чыл аразына пастағызын на палаларның аразында ВИЧ-чуғынңах ағырығнаң тӧрт пала ағырыбысханы ілезіне сығысхан. Ікі ыңааҷахты ағырығ іҷе сӱдінең чухтыр салған, ікі саарбах ирен паза ипчі аразында полчатхан палғалыстар ӱчӱн ағырыбысхан.
Имҷілер араға іспеске, наркотиктернең тузаланмасха, хазых чуртас оңдайын апарарға чӧп пирчелер. Ідӧк ВИЧ-чуғынҷах ағырығнаң ағырыбыспас профилактика оңдайларына тудынарға чӧп пирчелер. Ағырығнаң ағырыбыспас ӱчӱн, хайралланыңар паза палаларыңа профилактика оңдайларынаңар толдыразынаң чарыдарға ундубин турыңар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде