ЧАЙААЧЫ КӦРІСТІГ, ПОС ОҢДАЙЛЫҒ ХООСЧЫ
04.12.2019
Хабарлар
Хоосчы паза сомҷы Лариса БАКАНОВАНЫ алғыстааннар
Пайрам. «Хакасия» газетаның хоос редакторы, сомҷы Лариса Баканова 2 декабрьда пайрамнығ чазын таныхтаан. Редакцияда аның хоостарының кӧзідии ирткен
Халғанҷы чылларда Лариса Баканованың хоостарының кӧзідіглері Ағбандағы хоосчылар галереязында, С.П.Кадышевтің адынаң культура кінінде паза даа пасха учреждениелерде чон алнынзар удаа сығарыладыр. «Хакасия» газетаның хығырығҷылары Лариса Юрьевнаны статьяларға тимнеен хоостары паза сомнары хоостыра хаҷаннаң таныпчалар. Сомнарны фотоаппаратнаң суурып аларға чарир полза, хоосты посха сағын таап чайирға кирек полча. Аннаңар андағ кізіні ікі хати ус полча тиирге чарир.
Лариса Баканова Хакасияның ӧӧн городында тӧреен, Ағбандағы Д.И.Каратановтың адынаң олғаннарның хоосчылар школазында, хоосчы Ф.И.Пронскихтің холында ӱгренген. В.И.Суриковтың адынаң Хызылчардағы хоос училищезін, Н.Ф.Катановтың адынаң Хакас хазна университедінің искусство институдын тоосхан. Лариса Юрьевна хабарҷылар тоғызында пӧзік чидіглерге читчеткен ӱчӱн, Россия журналисттері пірігізінін Аарластығ пічиинең сыйыхтатхан, Хакасия культуразының саблығ тоғынҷызы, Россия журналисттерінің кізізі ат алған. Ідӧк ол Хакасияның Ӧӧркі Чӧбі иртірчеткен «Хрустальный барс» марығның чиңісчізі полча. Хоосчы ипчі пасха даа чидіглері ӱчӱн таныхтатхан.
Хоосчыны пайрамынаң алғыстирға хада тоғынчатхан арғыстары паза ӧӧрелері килгеннер, чылығ сӧстер чоохтап, сыйыхтар читіргеннер. «Пістің Ларисабыс нымзах чӱректіг, пасхазына паарсах, кізее полызаачы, чалахай кӧңніліг, порчо чіли чыл ибіре ӧңненчеткен кізі полча...Піс ағаа часкалығ паза хазых чуртас, наа чайаачы чидіглер алғапчабыс!..» - мындағ алғыстастар читірген прайзы.
- Ползын ол чиит алай илбек хоосчы, че полған на хоосчының позының пасчатхан оңдайы поладыр, - чоох тутхан хоосчы Михаил Саражаков. - Лариса Баканова пос оңдайынӌа хоостапча. Аның ибіркее кӧрізі ідӧк пасхалалча. Анзы чайаачының істіндегі тилекейінің чазыттығ оңдайы полча.
Пу чир ӱстӱнде кізі олаңай ла тӧрібинче полар. Ӧбекелернің чуртазын оларның тӧлі узаратча нооза. Сабға сыххан чайаачылар іҷе-пабаларының на нимес, ідӧк тӧреен чирінің поғдархазы полчалар. Хоосчы Лариса Баканова сомға суурча, компьютер программаларынаң тузаланып, чапсых коллажтар паза графика тоғыстарын тимнепче. Аның тоғыстары писательлернің книгаларын, Илбек чиңіске чарыдылған документальнай сығарыстарны чазапчалар.
Хоосчы пайрамнығ чазына улуғ нимес кӧзідіг тимнеп салтыр. Халғанҷы тоғыстарының пірсі - позының омазын чайап салғаны. Аны кізілернің омазын хап-орта хоостапчатхан ус тіпчелер. Хакас кӧгенектіг ипчілерні, палаҷахтарны омалапча ол. Лариса Юрьевнаның «Тасхыллар пархазы» адалчатхан улуғ тоғызы пар. Анда хызыл кӧгенегестіг хызыҷах онҷааларнаң ойнап одырча, кистінде хус тумзухтығ хайхастығ ат паза нымырха хоосталтыр. Автор ӱзілбес-парбас чуртас тамырын кӧзідерге кӱстенген полар тіп сағынчам. Паланы паайлапчатхан ипчінің омазы «Іҷенің часказы» адалча. Хызыҷахтарны омалапчатхан хоостарда Лариса Юрьевнаның кічігдегі ачыныстығ омазын танирға чарир.
Піс тее Лариса Бакановаа хазых чуртас, пӧзік чидіглер алғапчабыс. Хоостарында чарых кӱннің сустары ойназыннар...
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы