ХАЙДАҒ ДАА ТОҒЫСТЫ НАНДЫРЫҒЛЫҒ ТОЛДЫРЧА
06.12.2019
Хабарлар
Тоғыр чул аалдағы ӱгретчі Егор ЧЕБОДАЕВ
Кізі паза анын тоғызы. Егор Максимович Чебодаев Шира аймаандағы Тоғыр чул аалдағы школазар 25 чыл мының алнында килген
Аның тӧреен-ӧскен чирі Пии аймаандағы Куйбышев аал полча. Че ортымах ӱгредігні ол Ағбандағы национальнай школада алған. Соонаң чазы чит парған оол, шоферға ӱгреніп алып, армияа парыбысхан. Ағаа ікі чыллығ службаны Ыраххы Востоктағы Артем-5 городта иртерге ӱлӱс тӱскен. Чир-сууна ӧдізін пир салып, Егор іҷезінің чалғыс пиҷезіне Саяногорскта тура пӱдірерге полызып пастаан. Чурт тимге сых парғанда,тізең, кӱзіндегі оол Чукотказар парыбысхан. Анда ол хоза алған специальнозы хоостыра бульдозерист полған.
- Пірсінде Хакасиязар отпускка килгем. Чахсы тынанып, кӱс алынып алғам. Кӧрілген тузым тоозылғанда, нандыра парарға тіп, Ағбанзар чиде салғам. Хабынзам на, биледімні пічіктерімнең хада ибде ундут салтырбын. Хайди поларға? Халғам, пічіктерім ағылғанча. Ана андада арғызым тидір: «Паралар хыстарнаң танызарға?» Ол туста АГПИ-да студенттернің сессиязы парчатхан. Іди мин ипчім Надежда Ананьевна Щетининанаң танызып алғам. Анаң Чукотказар парыбысхам. Пічік алыс сыххабыс. Ӱс чыл пазынаң, тізең, мин он айға отпускка килгенде, хоных тӧстеебіс. Полған ол кирек 1985 чылда, - чооғын узаратхан Егор Максимович.
Че хайди ол хосхан, Чебодаев ирепчі Шира аймаанда чурт салынған.
- Ипчім іӌе-пабазынаң пір чирде чуртирға сағынған. Мин,тізең, читі харындастығ паза пір пиҷеліг кізі, улуғларымны олар кӧрерлер тіп, хада хонғанымнаң чарас салғам, - чарытхан ол.
Сынны чоохтаза, Егор Максимович национальнай школа соонда Хызылчардағы аал хонии институдынзар кіріп алған, че анда ӱгренмеен. Чиит сӧбіре пазына, тоғыстығ полар ӱчӱн, ол ӱгредіг заведениезінзер хатап айланарға киліскен. Іди Егор Максимович, аны заочно тоозып, инженер-механиктің специальнозын алған.
- Надежда Ананьевна андада Марчалғастағы школаның устағҷызы полған. Мин Шира аймаандағы аал хонии киреенде тоғынғам. Аймах кініндегі ПМК-да механик полғам. 1995 чылда Тоғыр чулдағы ортымах школаның устағҷызы Николай Николаевич Коков школада тоғынарға хығырған. Піс ирепчі ынабысхабыс. Аннаң пеер мында тоғын парчабыс, - теен Тоғыр чулдағы ӱгретчі.
Пу аалдағы школада ол пастағызынаң сығара технология паза ОБЖ уроктарын апарча. Устағҷы Надежда Александровна Ботандаева Егор Максимовичті тың махтапча. «Ағаа палаларны чол оңдайларына даа, шахмат таа ойнирға хоза ӱгрет саларға пір дее сидік нимес. Марығларға пар килзелер, олар хаҷан даа сыйыхтығ орыннар ал килчелер», -тіпче ол.
Егор Максимович кізі хайдағ даа тоғыста нандырығлығ поларға кирек тіпче. Ідӧк ол пу аалда 2009 чылдаң сығара грек-рим кӱрезінче секция апарча. Пастап тренировкалар Хызыл чул аалдағы клубта иртірілчеңнер. Анаң, Тоғыр чулдағы школа нааҷылал парғанда, анда кӱресчілерге улуғ нимес орын пирілген. Наа кибісті Хакасияның грек-рим кӱрезінҷе федерациязының кнезі Вадим Топоев сыйлап пирген. Чиит туста ол Егор Максимовичнең хада тренировкаларға чӧртір.
Хайди Егор Максимович искірген, пу спорт кӧрімінең ол национальнай школада айғазып пастаан. «2009 чылда тренерім Геннадий Васильевич Султреков, мині таап алып, аалда секция азарға чӧптеен. Мин тоғыр полбаам. Че кирексіністер хоостыра секция апарарға ӧнетін ӱгредіг киректелген. Аннаңар Н.Ф.Катановтың адынаң Хакас хазна университедінде физкультура ӱгретчізінің специальнозын аларға киліскен. Тиксі алза, пу син чыл тоғын салған аразына мин ӱс дипломға читкем. Ӱгретчілерге полған на сай нимее-де ӱгренерге килісче нооза», - теен ол.
Чоохтирға кирек, Шира аймаанда грек-рим кӱрезінче спорт узына кандидат атха иң пастағызын Егор Максимович Чебодаевтің ӱгренҷізі Данил Чустеев турысхан! «Чахсы кӱресчі ӧскіріп алар ӱчӱн, иң асхынах тӧрт чыл киректелче. Ағаа хоза, аны марығларға удаа ал чӧр турарға. Амғы туста,тізең, пістің андағ оңдай чоғыл. Иң пастағы сылтағ - чол ырах!» - ӱлескен улуғ опыттығ тренер.
Тоғыр чулдағы паза аннаң хости ааллардағы оолағастар грек-рим кӱрезіне хынып чӧрчелер. Аннаңар мыннаң мындар чахсы чидіглер полар ла тіп сағынчабыс. Тренер парда, оларға тилир оңдай парох нооза.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы