СИДІКСІНІСТЕРНІҢ СЫЛТАА - АХЧА ЧИДІСПИНЧЕТКЕНІ
10.12.2019
Хабарлар
Тоғыс чорығы. Хакасияда ирткен неделяда тоғыс чорығынаң Россия президентінің Сибирьдегі федеральнай округча полномочиеліг кізізі Сергей Меняйло пол парған
Пӱӱл Россия президентінің Сибирьдегі федеральнай округча полномочиеліг кізізі Сергей Меняйло Хакасиязар ӱзінҷізін кил парды. Пастағы тоғыс чорығы азынада кӧрілбеен полза, халғанҷы ікі чорых кӧрілген. Теестегі тоғыс чорығының ӧӧн сурии - регионда чылығ пирҷең тусха тимненіс паза аның иртчеткені. Аннаң пасха, Сергей Меняйло Хакасия пазы Валентин Коноваловнаң хада республикада Россия президентінің чахығлары, нацпроекттер толдырылчатханын, регионның пӱӱнгі чон чуртазын паза экономиказын, ідӧк хай пірее сидік сурығларны ӱзӱрген. Алынҷа чыылығ республиканың чурт-коммунальнай хонииның 2019-2020 чылның чылығ пирҷең тузына тимненізіне чарыдылған, хайдар ідӧк республиканың паза муниципалитеттернің ӱлгӱлері, право хайраллаҷаң органнарының паза энергетика предприятиелерінің кізілері хығыртылғаннар.
Чыылығ соонаң Сергей Меняйло Хакасиядағы газета-телевидение хабарҷыларының сурығларына нандырған. Аның таниинаң, чыылығ тузында чурт-коммунальнай хонииның чылығ пирҷең тусха хомай тимненізіне хайығ айландырылған. Пу тусха теере Хакасияның ЖКХ предприятиелерінің 67 % ле чылығ пиреріне тимде. 17 муниципальнай пӱдіс тимде нимес! Олох туста, Сергей Ивановичтің таниинаң, пу кӧзідіг ирткен чылдағызынаң 22 % пӧзік. Алызығлар чахсы саринзар пары чӧпсіндірче. Тыхтағ тоғыстарына кӧрілген 600 азыра миллион салковайның чарымы ла позыдылтыр. Пілдістіг, ахча іди пирілчеткенде, тимненіс тее андағох синде полчатпас па. Мында ӧӧн сидіксіністерні Россия президентінің полномочиеліг кізізі регион ӱлгӱзі пирілген чӧптерні толдыразынаң пӧкпинчеткенінең палғалыстырча. Чыл пасталчатханда республикада Россияның пӱдіріг министерствозының комиссиязы тоғынған паза чурт-коммунальнай хониинда киректерні чахсыландырар ӱчӱн позының чӧптерін тимнеен. Пӱӱнгі тимненіс салтарлары прай чӧптер хайыға алылбаанын ілезіне сығарған. Ол санда муниципальнай предприятиелерні казённай идерінҷе, читіре алылбинчатхан парыстарны айландырарынха, чарытхы ӱчӱн ӧдістер синін хызырарынҷа (2019 чыл тоозылғанҷа чарытхы ӱчӱн тиксі ӧдістер 800 миллион салковайға чит парар) паза пасхазынҷа.
Паза пір сидіксініс - ол чурт-коммунальнай хоных предприятиелерінде істенчеткеннернің чал ахчазынҷа ӧдіс. Пӱӱнгі кӱнде аның сині 4 миллион салковайға тиңнелче. Чал ахчазы пірее предприятиелерде 2 ай тӧлелбеен полза, пасхазында - чарым чылҷа. Сергей Меняйлоның кӧрізінең, кізілерге чал ахчазы тӧлелбинчеткенін кем пӧгерге кирек полчатханынҷа таласпин, пірге тудынып, чарадығ табарға киректелче. Пілдістіг, чал ахчазы тӧлелбинчеткені ӱчӱн предприятие устағ-пастаа нандырча. Тиксі республика ӱчӱн кем нандырығлығ? Пу сурыға нандырығ кирек чоғыл. Че чурт-коммунальнай хонии предприятиелерінің чал ахчазынҷа ла ӧдістер нимес, иң пастағы кредитор Федеральнай налог службазы полча, аннаңар, 4 миллион салковайны таап, предприятиее позытса даа, ол ахча налог службазының ӧдістерін чабарына парыбызар осхас. Налогтарха паза чал ахчазынҷа ӧдістерні чабарына тиксі 14 миллионҷа салковай киректелер.
Хабарҷылар Сергей Ивановичті муниципальнай пӱдістернің айланыстарынаңар киректі чарыт пирерге сурынғаннар. Олар кӱскӱзін аннаң ахча суриин пӧгерге хабазығ сурғаннар. Сергей Меняйлоның нандыриинаң, пӱӱнгі кӱнде Хакасияа 2019 чылның тиксі кирексіністерін чабызар ӱчӱн 1,2 миллиард азыра салковай киректелче. Аның кӧрізінең, республика ӱлгӱлеріне муниципалитеттернің тиксі кирексіністерін санға аларға паза ахча суриинда федеральнай кінге ле ізенмеске кирек. Пӱӱнгі кӱнге республика 428 миллион салковай субвенция федеральнай кіннең сурап алған, халған 900 миллион салковай сурии пӧгілче. Сергей Иванович ідӧк бюджетті орта чарадарына хайығ айландырған. Аның ӧзеніне иң чахсы кӧзідіглерні аларға чарабас теен ол (халғанхы ікі чыл пістің ӱлгӱлер іди итче осхастар), пазағы чылға бюджет ідӧк тимнелзе, чыл андағох касса «ыраанынаң» тоозылар.
Россия президентінің Сибирьдегі федеральнай округча полномочиеліг кізізі Сергей Меняйло, аны муниципальнай пӱдістер пастары сағызалар даа, хабарҷыларның сурығларына чарым часча нандырған.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы