НАЦПРОЕКТТЕРНІ ПОС САЛБАСХА
11.12.2019
Хабарлар
Видеоконференция. Хакасияның пазы Валентин Коновалов 9 декабрьда Россия президентіңдегі Стратегия тилізінӌе паза нацпроекттерҷе чӧп президиумы чыылиинда араласхан. Регионнар пастарынаң хада видеоконференция оңдайынаң ирткен чыылығны Россияның правительство кнезі Дмитрий Медведев апарған
Чыылығның ӧӧн сурығлары «Экология» паза «Чурт паза городтағы чуртас» национальнай проекттер полғаннар. Хайди таныхтаан премьер-министр Дмитрий Медведев, пу ікі нацпроект удур-тӧдір пик палғалыстығ.
- Чыылығның пӧгіні ікі проектче кирек хайди парчатханын ӱзӱрібізері, - искірген Россия правительствозының кнезі. - Ол «Экология» паза «Чурт паза городтағы чуртас». Кӧр кӧрербіс, хайдағ салтарларнаң піс чылны тоосчабыс. Піс тиктең нимес пу нацпроекттерні пір чыылығда ӱзӱрчебіс. Городтағы чуртас - ол ідӧк чахсы экология кирее. Анзын хазнаның прай чуртағҷылары кирексіпчелер.
«Экология» национальнай проектче ӧӧн ӱзӱріг сӧп-сап реформазын чуртасха кирерінҷе парған.
- Пазағы чылдаң сығара прай даа регионнар сӧп-сапнаң тоғынҷаң наа системаа кірібізерге киректер. Амғы туста кӧбізі кірібіскен алай кірерге тимде, - таныхтаан Дмитрий Медведев.
Россия правительствозының кнезі сӧп-сап реформазы графигінең соона халчатхан регионнарның устағҷыларына киректі тӱзедерге чахығ пирген.
«Чурт паза городтағы чуртас» национальнай проектче пӱдірілчеткен чурттың, ол санда иргі изелчеткен туралардаң кӧзірерінҷе программа хоостыра, санын ӧскірҷең сурығлар ӱзӱрілген. Дмитрий Медведев пу нацпроектті ӱзӱрерінде ідӧк ипотека кредиттеріне хайығ салған. Аның искіриинең, ипотека чурт пӱдіриин тибіретчеткен ӧӧн тиріг полча.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы