ПОЛИКЛИНИКА ТЫХТАҒ ТОҒЫЗЫ СООНАҢ
11.12.2019
Хабарлар
Нацпроект. «Хазых хайраллиры» нацпроекттің «Олғаннар хазиин хайраллирын тилідері, ол санда палаларға имнег полызиин пиреріне наа инфраструктура тӧстирі» региондағы программазынӌа пӱӱл Хакасияа федеральнай паза республика бюджеттерінең 161,2 миллион салковай позыдылған. Ол ахча республиканың имнег учреждениелерінҷе ӱлестірілген
Пу кӱннерде Ағбандағы Катя Перекрещенконың орамазында орныхчатхан 3 № олған поликлиниказында тыхтағ тоғыстары тоозылды. Амды имнег учреждениезінзер хазых паза ағырчатхан палалар ікі алынҷа ізіктең кірчелер. Анзы хазых олғаннар чуғынҷах ағырыға хаптыр салбас ӱчӱн иділген. Поликлиникада имҷізер пазынңаң инфоматтар турчалар. Амғы кӱнге теере андағ терминалларнаң МФЦ-да алай банктарда ла тузаланар оңдай полған. Полған на имҷінің кабинедінің ізии ӱстӱнде монитор пар. Анда кӧзіділче хайдағ номерліг кізее имҷізер кірерге чарир. Ол талон инфоматтаң пирілче. Имҷілер дее, іҷе-пабалар даа пу наа цифровой техниканаң тузаланарға ӱгренчелер.
Коридорларда нымзах одырчыхтар турчалар. Час палаларны тонандырҷаң столлар даа прай нымзахтар. Ідӧк коридорларда олғаннарға ойнаҷаң орыннар пар, аннаңар амды іҷелерге иркелерінең хада имҷізер теесті дее сахтирға оой. Палалар, коридорча аар-пеер чӱгӱріс чӧрбин, ойнаҷаң орыннарда ӱтертінчелер.
Ідӧк таныхтирға кирек, коридордағы стенелерде ачых-чарых, ӧңніг динозаврлар хоостал партыр. Олар палалар кӧңнін кӧдірчелер. Иркеҷектер стенелердегі динозаврларны чапсып кӧрчелер.
Ағбандағы 3 № олған поликлиниказында ідӧк чылығ паза суғ пирчең системалар тыхталғаннар, сантехника алыстырылған. Пу имнег учреждениезінзер лаборатория тоғыстарын иртірҷең паза офтальмология тиріглерін алғаннар. Тиксі олған поликлиниказын нааңылирына 14 миллион азыра салковай хорадылған.
Автор :
Татьяна ТЮТЮБЕЕВА
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде
