САБЛЫҒ ТРЕНЕР УНДУЛБИНЧА
11.12.2019
Хабарлар
Саңай тігі пар тӱсті. Че, сағынчабыс позыбыс алынҷа, пістің оол айдас микелернең маңат тузаланчаттыр. Паза ла кӧрзебіс, хакас кӱресчі іди сіліг учуххан полтыр. Кӧңнібіс саңай тӱс парды. Кирек піди парза, ол сыйыхтығ орынға сых полбин халар. Піс, тізең, ағаа тыңох ізенчеткебіс.
«Че, синің сӱмеңні кӧріп алдым, амды минің микемні кӧр хал» теен чіли, хакас кӱресчі анаң на хайындыр чӧре халған - оңнығ махалығ нимес. Пастап ол саннарны тиңнестіріп алған, анаң алнына сых чӧрібіскен. Ағаа хоза чарғыҷы-искірігҷі пісті тың чапсытхан: «Владимир Челтыгмашев ӧӧнінде олаңай кӱреснең айғасча. Амды грек-рим кӱрезінҷе марығда ол позының тимненізін сынирға чарадыбысхан. Амды чиңіс тутса, алтын медаль ӱчӱн харбазар оңдай алар. Пу марығда олаңай кӱреснең айғасчатхан пасха даа саарбахтар пар».
Таныхтирға кирек, М.И.Боргояковтың хумартхызына чарыдылған регионнар аразындағы марығда ӧӧнінде 15-16 частығ кӱресчі оолағастар араласханнар. Ағбандағы Иван Ярыгиннің адынаң Кӱрес туразында Хакасиядаң пасха Хызылчар крайынаң, Кемеров паза Новосибирск областьтарынаң килген саарбахтар постарының устарын сынадылар. Таныхтирға кирек, амғы сидік туста пасха регионнардаң кӱресчілер асхынах чыылысханнар.
Анзын ноға чазырҷаң, минің хайиимда тӧреен-ӧскен чирімнең, Таштып аймаанаң, килген кӱресчі оолағастар полғаннар. Халғанҷы чылларда Пыдырах аалда грек-рим кӱрезі маңат тиліп сыххан. Анда тренер полып тоғынча Константин Тодозаков. Аның ӱгренҷілері аймах-пасха марығларда араласчалар, чиңістер тутчалар, ибзер сыйыхтығ айланчалар.
Іди Оскар Тодозаков спорт узының нормативін толдырыбысхан, Айас паза Айдар Султреков харындастар спорт узына кандидат полчалар. Улуғларына кӧӧгіп, чииттер андағох кӧзідімнерге чидерге харасчалар. Пу марығда Пыдырахтаң килген саарбахтар араласханнарох. Чидіглері хомай ла нимес тіп паалирға чарир.
Іди Александр Тодозаков иң ниик 42 кг кӧдірімде прайзын хыра утхан, Пыдырахсар алтын медальлығ айланған. 45 кг кӧдірімде, тізең, Владислав Султрековты, кибістең кӧдіріп, сас ойда тастахаң оолағас табылбаанына тың ӧрініскебіс. Пыдырахтаңох сыххан Олег Тороков 48 кг кӧдірімде прайзын хыра утхан. Сағам іҷе-пабазы Ағбанда чуртапча, аннаңар ол город ӱчӱн харбасча. Ағаа хоза, пӱӱл март айда Олег Тороков, тиң частығлар аразында Россия мариинда харбазып, позының кӧдірімінде хола медаль утып алған. Уғаа маңат чидіг.
Саарбахтар саблығ тренер М.И.Боргояковтың хумартхызына чарыдылған марығда хайди харбасчатханын кӧріп аларға Хакасияны тиксі сабландыр турған кӱресчілер, чоннар аразындағы класстығ спорт устары Олег Немченко, Иван Голощапов паза Александр Талачев килгеннер. Анзы чиит кӱресчілерге уламох ӧріністіг пілдірген - оларның алныларында постарының пӧзік тимненістерін хайди даа кӧзіт пирерге кирек.
Амғы туста хайдағ даа марығ парчатса, иң пӧзік паалағ 4 санға тиңнелче. Пу арға-мӧрій тузында марығ чарғыҷылары андағ пӧзік паалағ, удаа даа полбаза, пир турғаннар. Че ікі хати, марығ оңдайын сайбаан чіли, иң пӧзік 5 сан пиргеннер. Сынап таа, хайди сіліг, махалығ учухтылар кӱресчілернің «ыырҷылары». Пастағызын андағ паалаға турысхан
Асхыс станциязынаң килген кӱресчі Дмитрий Адежкин. Ікінҷізін махтаға сыххан Владимир Челтыгмашев.
Амды постарының кӧдірімнерінде сыйыхтығ орыннарға сыххан кӱресчілернең таныстырчабыс:
42 кг -
1 орын - Александр Тодозаков, Пыдырах;
2 орын - Марат Боргояков, Ағбан;
3 орын - Ренат Тумояков, Ис пилтірі паза Анатолий Судочаков, Оот пилтірі;
45 кг -
1 орын - Владислав Султреков, Пыдырах;
2 орын - Евгений Комаров, Харатас;
3 орын- Матвей Тюкпиеков, Ағбан паза Данил Асочаков, Куйбышев;
48 кг -
1 орын - Олег Тороков, Ағбан;
2 орын - Михаил Комаров, Харатас;
3 орын - Артем Свириденко, Пии паза Леон Аткнин, Ағбан;
51 кг -
1 орын - Даниил Михайлов, Пии;
2 орын - Дмитрий Назаренко, Табат;
3 орын - Денис Чернов паза Дмитрий Тодыбаев, Ағбан;
55 кг -
1 орын - Владислав Чистобаев, Пии;
2 орын - Игорь Тюдешев, Асхыс станциязы;
3 орын - Дмитрий Адежкин, Асхыс станциязы паза Тимур Чебодаев, Ағбан;
60 кг -
1 орын - Александр Фильшин, Томыхахтар;
2 орын - Анатолий Тишаков, Хызылчар;
3 орын - Денис Шустиков, Катанов паза Данил Трунов, Ағбан;
65 кг-
1 орын - Игорь Глазунов, Ағбан;
2 орын - Азизбек Абдурахимов, Ағбан;
3 орын - Карим Токояков, Ағбан паза Алексей Маганаков, Пилтір аал;
71 кг -
1 орын - Владимир Челтыгмашев, Ағбан;
2 орын - Николай Романенко, Ағбан;
3 орын - Александр Игнатьев паза Данил Саков, Ағбан;
80 кг -
1 орын - Алексей Алексеев, Ағбан;
2 орын - Илья Верхов, Ағбан;
3 орын - Степан Сагалаков паза Александр Судухин, Ағбан.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде