МОСКВАДА МАХТАТТЫЛАР
18.12.2019
Хабарлар
«Тирегес» олған садының воспитательі Ольга АБУМОВА
Орініс. Москвадағы чоннар ынархазы университетте «Россия чоннарының тіллері паза культуразы: хайраллиры паза тилідері» марығ ирткен
Тиксі хазнабыс синінде иртірілчеткен марығда Россияның 51 регионынаң 261 ӱгредіг заведениезі араласхан. Оларның санынаң 50 азыра учреждение ле азах меетке сығып алған: институттар, техникум-училищелер, школа-интернаттар, гимназиялар паза олған садтары.
Олған садтары аразында пістің «Тирегес» азах меетке сыхханнаңар истіп алғанда, хайди матап ӧріндібіс. Аннаңар Асхыстағы «Тирегес» олған садының устағӌызы Ирина Геннадьевна Селигеева паза мин, воспитатель Ольга Витальевна Абумова, Москвазар чол сығыбысхабыс. Піске анда олған садында ӱгредіг кирее хайди парчатханнаңар проектті арачылирға кирек полған.
Анда піс саблығ модераторлар педагогика наукаларының докторы, «Педагогика» журналның ӧӧн редакторы Руслан Сахитович Бозиевнең паза психология наукаларының докторы, профессор Туяна Цыреновна Дугарованаң танызып алғабыс. Олар пу марығның пастағӌылары полтырлар.
Азах меетке сыххан ӱгредіг учреждениелері пис номинацияа чарылғаннар. Пісті «Алынӌа ӱгредіг учреждениезінің чахсы тоғызы» номинацияа кир салған полтырлар. Университеттің чыылығлар иртірӌең улуғ залында тоғынарға киліскен. Піс анда «Олған садында «Ине тілі» чӧрім - пос кибірли культураа ӱгренер тӧстег» проект хоостыра чоох апарғабыс.
Марығда араласхан дагестан, удмурт, бурят, татар, башкир, тува, алтай паза даа пасха чоннар тіллері чітчеткені хоостыра чыылысхан полтырлар. Чоох тутчатханнарның пір тӧӧй ӧӧн сағыссырас - чиит тӧл пос тілінең чоохтазарға хынминчатханы. Аннаңар тӧреен тілібісті хайди хайраллап халар хайдағ наа оңдайлар тузаланылчатханнаңар кӧні чоохтазығ парған тиирге чарир.
Марығда араласчатхан, чон алнынзар сығып, постарының наа проекттерін арачылапчатхан ӱгретчілерні, воспитательлерні исчетсе, сах андох сизінчезің - прайзының пір тӧӧй ағырсымнығ сурығлар. Олох арада пістің хазнабыс Россия чоннарының аймах тіллерін хайраллап халарына хайдағ полызығ пирчеткенін піліп алзаң, поғдархас, ӧрініс тӧріпче. Паза пістің хазнабыстың аймах-пасха пулуңнарында хайдағ пай пілістіг, улуғ опыттығ ӱгретчілер, воспитательлер тоғынчатханын піліп алчазың.
Минің кӧңніме тың кірген Алтайдаң килген ӱгретчінің чооғы. Ол ӧкіс палаларны музей, архив пастыра постарының ӧбекелерінеңер, родтарынаңар піліп аларға кӧніктірче. Анзы ӱгретчее ӱгренӌілерні тілег тоғыстары тузында тӧреен тілнең, тархыннаң чағын таныстырып алар маңат оңдай пирче.
Москвада ирткен марығда аралазарға пар килген ӱчӱн Асхыс аймааның ӱгредіг управлениезінің устағӌызы Ирина Петровна Кучугешеваа улуғ алғызыбыс читірчебіс. Піс Москвада дипломнаң таныхталғабыс.
Автор :
Ольга АБУМОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде