ЫНАРХАС ЧИҢІСЧІ ПОЛЗЫН
18.12.2019
Хабарлар
Мыңдағ фестиваль Хакасияда чуртапчатхан чоннарның аразында ынархасты тыыдар ӱчӱн иртірілче. Ідӧк хакас чонның национальнай спорт кӧрімнерін хайраллир паза хазых чуртас апарар ӱчӱн кирілче. Фестивальда республикадағы нацияларның халых пірігістерінің командалары араласханнар. «Асхыр» хакас чииттернің, «Ине тілі» чӧрімнің, «Аран Чула» республикадағы чилегеліг чоннарның хабарлар кінінің, «Тамыр» Таштып аймааңда чурттығ шорларның халых пірігізінің, «Пелеш» чуваштарның, «Менин Кыргызстаным» хырғыстарның, «Бародари» таджиктернің, «Чосон» кореецтернің паза немецтернің, азербайджаннарның, дагестаннарның командалары кӱстерінен сынасханнар. Тиксі он команда полған,
110 кізі араласхан.
Фестивальны пайрамни азып, Хакасияның спорт министрі Владимир Кретов чоох тутхан:
- Хакасия пазы адынаң мин сірернi чалахай спорт фестивальыңаң алғыстапчам! Национальнай кӱрес олимпиецтернi ӧскірче. Прайзына оң ползын паза чиңістер алғапчам. Ынархас чиңісчі ползын!
- Спорт хаӌан даа чонны піріктірчеткен кирекке саналча, - чооғында таныхтаан Хакасияның национальнай паза территориальнай политика министрі Михаил Побызаков. - Іди піс удур-тӧдір пілізiп одырчабыс. Мыңдағ фестивальлар хазнаның аймах регионнарында иртчелер. Салтарында ынархас утсын тіп сағынчам!
Фестивальның ӧӧн чарғыҷызы Николай Свириденко полған. Марығлар соонаң иң матап «ағырчатхан» ӧме адалар. Аннаңар марығлар пасталғаннаң кӧрігҷілер, сым одырбин, постарының спортсменнері ӱчӱн сығырызып, аахтас турғаннар.
Пастағызын чон алнынзар кӱресчілер сыхханнар. Чарғыҷы «кӱрес» сӧс тӱрк тіллерінде тӧӧй адалчатханнаңар искірген. Хакас кӱресте, тізең, чібек хурнаң хурчанған ооллар харбасчалар. Мында араласхан кӱресчілерге хызыл паза тигір кӧк ӧңніг хурларны палғааннар. «Ине тілінің» командазы «Бародари» таджиктер командазынаң тоғыр сыххан. 80 килограмм паза аннаң аар кӧдірімніглер анда араласханнар.
Пастап хакас ооллар утыр саларлар чіли кӧрінген. Че олар 3:2 саннаң утып алғаннар. Пілдістіг, полғаны ла пос чоны ӱчӱн «ағырған».
«Асхыр» хакас чииттернің командазы Томыҷахтаң килген чуваш оолларнаң кӱрескеннер. Генрих Батцтың адынаң немецтернің диаспоразы азербайджан кӱресчілерінең тоғасханнар. Хайзы-да «ыырҷызын» кинетін сил тастабысчатхан, пасхазы, нинҷе-де тус ибіріліп, мике идерге кӱстенген. Чарым финалға «Асхыр», «Менин Кыргызстаным» паза немецтернің диаспоралары сыхханнар. Хакас оолларны алза, кӱстіг кӱресчілер Денис Кичеев, Борис Мамышев, Михаил Болганов, Феликс Сунчугашев полғаннар. Команда утыр паритчатса, олар чиңіс ағылҷаңнар. Таджик, хырғыс паза азербайджан ооллар чахсы кӱресчеттірлер.
Кӱрес парчатхан туста хости масрестлингче марығ ирткен. Ідӧк иреннер ағас тартханнар. Ікі кізі, удур-тӧдір тоғыр одырып, азахтарын чардыға тіреп, ағасты тартысчалар. Араласчатхан кізілер аны ікі хати тартчалар. Командалар тобит, теннис, дартс ойнааннар, арғамҷынаң урух тастааннар паза тартысханнар. Чиңісчілерге пастағы ӱс орын пирілген.
Кӱресте I орын «Асхыр» хакас чииттернің халых пірігізіне, II орын «Ине тілі» хакас тілін хайраллирынҷа паза тилідерінҷе пірігіске, III орын «Менин Кыргызстаным» пірігіске пирілген.
Арғамҷынаң урух тастирында I орында Чечен Оожак (немецтер культуразының кіні), II орында Максим Сазанаков («Ине тілі»), III орында Максим Хегай («Чосон») полыбысханнар.
Дартста иң кӧп сан «Ине тілі» команда тоғынып алған, олар пастағы орында пол парғаннар. II паза III орыннарны «Аран Чула» паза «Менин Кыргызстаным» алғаннар.
Теннисте ӧӧнінде чиит ооллар паза хыстар араласханнар. Хыстар аразында I орынны Диана Грошева («Пилеш») , II паза III орыннарны Ирина Пак («Чосон») паза Айгуль Давлетова «Менин Кыргызстаным» алғаннар. Ооллардаң I орынны Владимир Сагалаков («Ине тілі») холға кирген. Данил Судухин («Пилеш»), Алмазбек Абдыкадыров («Менин Кыргызстаным») II паза III орыннарда пол парғаннар.
Тобит ойнап, ипчілер аразында пастағы ӱс орынны Алина Чанкова («Пилеш»), Айана Бутанаева («Тамыр»), Айгуль Давлетова («Менин Кыргызстаным») ӱлескеннер. Ооллар аразында чиңісті Виктор Бутанаев («Тамыр») тутхан. II паза III орыннарда Камат Кучугешев («Асхыр»), Василий Сагалаков полыбысханнар.
Масрестлингте иреннер хол кӱзінең сынасчалар. Пу марығда кӧп кізі араласхан. Че «Асхыр» чииттер пірігізі чиңіс тутхан. Фестивальның соонзар прай командалар арғамҷынаң тартысханнар. Мында «Бародари» пірігіс иң кӱстіг команда полыбысхан.
Прай саннарны алза, «Ине тілі» команда, чиңісчі полыбызып, чылдаң холдаң холға пирілчеткен кубокты алған. II орында «Менин Кыргызстаным», III орында «Асхыр» пол парғаннар. Иң артых «ағырғаннар» таджиктернің ӧмезі полыбысхан.
Тиксі алза, фестиваль хынығ ирткен. Кӧрігҷілер пос чоны ӱчӱн матап «ағырғаннар». Хакас национальнай спорт кӧрімнерінҷе фестивальны Хакасияның спорт паза национальнай, территориальнай политика министерстволары иртіргеннер. Мындағ фестивальларны иртір турарға кирек. Чон, чыылызып, удур-тӧдір танысча, ынағласча, хазиин тыытча. Анда араласханнарға даа, кӧрігҷілерге дее чапсых полған тіп санапчам.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы