ПЕНСИЯ АХЧАЗЫ ХАЙ СИН ӦЗЕР?
24.12.2019
Хабарлар
Пресс-конференция. Россияның пенсия фондының Хакасияҷа пӧлиинде килер чылда пенсия ахчазы хозыларына чарыдылған тоғазығ ирткен
Пресс-конференцияны ПФР-ның Хакасияҷа пӧлиинің устағҷызы Виктор Филонов иртірген. 2020 чылның 1 январьынаң чазы хоостыра страховой пенсияның сині ӧс парар. Федеральнай закон хоостыра, тоғынминчатхан тынағдағы кізілернің страховой пенсиялары, пір синге тиңнелчеткен тӧлег паза пенсия коэффициенті 6,6 % ӧс парарлар.
- Индексация салтарынҷа, пір синге тиңнелчеткен тӧлег, 352.06 салковайға ӧс парып, 5686,25 салковай полар. Пенсия коэффициент 5,76 салковайға кӧдіріл парып, 93 салковай турар. Хакасияда тоғынминчатхан 108 муң тынағдағы кізінің пенсия ахчазы ӧс парар. Оларның страховой пенсиязының ортымах сині, 972 салковайға кӧдіріліп, 15747 салковайға тиңнелер. Таныхтирға кирек, пу ортымах кӧзідім. Прайзының пенсиязы 6.6 % ӧс парар, че ахчанаң саназа, полғанының на пасхалалар, - таныхтаан Виктор Филонов.
Тоғынчатхан пенсионерлерге, тоғынмин сыхсалар ла, пенсия ахчазын, хатап санап, хозарлар. Пӱӱнгі кӱнге пістің регионда 29439 тоғынчатхан пенсионер саналча.
Аалда 30 чылдаң асхынах нимес тоғын салған кізілерге пір синге тиңнелчеткен тӧлег 25 % кӧп пирілче, аның сині -7107,81 салковай. Пӱӱл аалда кӧп чыл тоғын салған 1941 кізее пу тӧлег пирілген.
1 февральдаң федеральнай льготниктерге ай сай пирілчеткен тӧлегнің (ЕДВ) сині ӧс парар. ЕДВ Илбек Ада чаа араласчыларына, прай кинектерге, техногеннай саайларда чобаға кіргеннерге паза пасхазына тӧлелче. 1 февральдаңох сығара социальнай полызығларның сині 3,8 % ӧс парар.
1 апрельдең социальнай паза хазна пенсияларының ахчазы 7 %-ке ӧс парар. Виктор Филоновтың чооғынаң, ирткен чылларда Хакасияда пір чыл аразына 7 муң азыра кізі пенсияа сыхчаң. Тынаға сығар тус кӧместең ӧскірілчеткенде, пӱӱл пенсияа 3 муңҷа кізі сыхты. Ол санда 908 кізі тынаға азынада парыбысхан, хайдар кірчелер аар оңдайларда паза хазыхха хомай теелчеткен тоғыстарда істенгеннер (521 кізі), опекуннар (148 кізі), 37 чыл тоғын салған ипчілер паза 42 чыл тоғын салған иреннер (45 кізі), 5 паза аннаң даа кӧп палалығ ипчілер (40 кізі), Ыраххы Северде тоғынғаннар (33 кізі).
Килер чылда іҷе капиталы ахчазы 13591 салковайға ӧс парар, аның сині 466617 салковайға тиңнелер.
Автор :
Оксана БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде