ИҢ ӦӦНІ - АРАЛАСХАНЫ
27.12.2019
Хабарлар
Николай САРАЖАКОВ
Чидіг. Н.Ф.Катановтың адынаң национальнай гимназияның ӱгретчізі Николай Саражаков пӱӱл хазна синіндегі марығда араласхан. Ол Москвада хакас тілінӌе мастер-класс пирген
Хайди чарытхан Николай Тимофеевич, пос тілі ӱгретчiлерiне иң пастап марығның заочнай чардығын иртібізерге киректелген - Интернет пастыра видеоға суурылған урокты ызарға. Анаң хазнаның ӧӧн городындағы эксперттер ол уроктарның иң артыхтарын марығның халғанӌы чардығына таллааннар. «Минің урогым оларның санына киріл парған. Аннаңар мағаа Россиядағы чоннарның пос тілі ӱгретчілерінің хазна синіндегі марығның финалында аралазарға Москвазар чол азылған», - ӱлескен национальнай гимназияның ӱгретчізі.
Ол пу марығның «Пос тіліне урокта ӱгредер иң артых методика паза практика» номинациязының чиңісчілер санына киріл парған. (Комиссиядағылар андар 10 кізіні таллап алғаннар.) Ағаа андағ пӧзік паалағ 7-8 класстағы ӱгренӌілерге кӧрілген «Ат кізінің чуртазында» темаа чарыдылған уроктың методиказы паза конспекті ӱчӱн пирілген.
- Мин ол теманы хаӌаннаңох істезіп пастаам. Аннаңар аны узарадар пӧгіннең марыға ысхам. Хайди мин ол уроктарны апарчам? Иң пастап, олғаннарнаң хада ат тиріглері хайди адалчатханын ӱгренчебіс. Анаң хакас произведениелерінде атнаң, аның тиріглерінең палғалыстығ сӧстерні, чарытхыларны тілепчебіс. Паза даа пасха оңдайларнаң тоғынчабыс. Марыға видеоны піс Ағбандағы ипподромда суурғабыс. Аның устағӌылары чарадығ пиргеннер. Мин позым атты изерлеем, олғаннарға кӧзіткем, - чарытхан Николай Тимофеевич.
(Николай Саражаков, Н.Ф.Катановтың адынаң национальнай гимназияда ӱгретчі поларынаң пасха, аспирантурада ӱгренче. Ол, хайди пілдістіг пол парды, ат тиріглерін істесче. Аның темазы ат чарызынаң паза хакас ойыннарынаң палғалыстығ. - Авт.)
Москвада Николай Тимофеевич пуох темаӌа мастер-класс пирген. Аны анда араласчының сертификадынаң таныхтааннар. Номинацияның сыйыхтығ орыннарына, тізең, Чувашиядағы, Татарстандағы паза Башкириядағы пос тілі ӱгретчілері турысханнар.
Че, хайди тіпчелер, ӧӧні - мындағ синніг марығда араласханы. Ол пос опыдынаң ӱлезерге паза пасхазынаң наа нимее ӱгренерге оңдай пирче нооза.
- Кӧзідімге, мағаа уғаа чапсых полған Пӱрӱт чирінең килген ӱгретчі олғаннарнаң хайди тоғынчатханын кӧріп аларға. Ол урокта палаларны национальнай ас-тамахты - буузы - тимнирге ӱгреткен. Пасхазына даа хакас тілінең чоохтасчатханын истерге чапсых полған. Аннаңар мағаа тың поғдархастығ полған Хакасияның адын анда кӧдірергеі - теен Н.Т.Саражаков.
Николай Тимофеевич национальнай гимназияда ікінӌі чылы тоғын парир. Аннаңар мыннаң мындар аның уламох чахсы чидіглер хайди даа полар тіп сағынчабыс.
Хозыбызарға кирек, Асхыс аймаандағы Пилтір аалның хакас тілі ӱгретчізі Лариса Чебодаева пу марығның заочнай чардығындағы «Хакас тіліне ӱгредерінӌе урокта нимес практика» номинациязының чиңісчізі полыбысхан. Че ол финалға Москвазар чӧрбеен.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы