«ХАКАС ЧИРІНЕ» ОҢ ПОЛЗЫН!
30.12.2019
Хабарлар
Чағдап килді 2020 чыл. Тилекейдегі аймах чон-чахсы Наа чыл удурлирға тимненче. Полған на хазнаның алай чонның Наа чыл кибір-чозахтары пар. Олар сала пасхалалзалар даа, ӧӧн сағыс-кӧстеглері пір. Прайзы килер чыл часкалығ, хазых паза парыстығ ползын тіп сағынча паза хайдағ-да кибір-чозахтарға тудынча. Піреезі нымахтағы осхас хайхастар даа сағыпча. Толчалар ба олар олаңай чуртаста? Сағынчам, толча поларлар. Че ол хайхастар чуртаста толар ӱчӱн, посха хыймыранарға, турғызылған кӧстеглерні толдырарға кӱстенерге кирегӧк. Мында сағысха кірче пір хормачы чоох алай анекдот: «Пір кізі Ӧӧркілердең сурынча. «Полыс пиріңер мағаа, лотерея ойнап, миллионер полыбызарға». Ӧӧркілер нандырчалар: «Син пастап лотерея даа ал салзаң!»
Нимедеңер мин чоох апарчам? Хайдар хармаам тастапчам? Орта, газетабыс ибіре. Хайдағ даа сурыға, айланысха нандырығ поларға кирек. Аарлығ хығырығчылар, сірернің газетабыстың ады хоостыра ӧменең алай алынча пасхан айланыстарың, редакциязар сығдыратханнарың, ідӧк редакция сығарған сурастырығ купоннары пастыра нандырығларың тик чирге парбады. Піс ол пічіктерні, нинҷе-нинҷе хати хобырып, газетабыстың тӧстегҷілеріне, устағҷыларға читіргебіс. Тиксі 300 азыра айланыстың 99,5 % «Хакас чирі» ӱчӱн. Редакция ӧмезінің чыылии пір ӱннең сірернең чарасчатханын кӧзіткен. Піс Хакас Республикаа, чоныбысха тоғынчабыс. Хығырығҷы чох газетаның тузазы паза кирексінізі чоғох полар.
Ирткен айда Хакас Республика правительствозы «Хабар-Известия» газетаның адын «Хакас чирі» атха алыстырардаңар чарадығ сығарған. Искен дее поларзар, Интернет пастыра ол чоох тараанох. Ідӧк ол сурығнаң улуғ хырлас айының 20 кӱнінде Хакас Республиканың Ӧӧркі Чӧбінің пос устанысча, халыхтар пірігістерінче, чоннар аразындағы теелістерче комитедінде, Ӧӧркі Чӧп президиумының чахии хоостыра, тоғысчы ӧме чыылысхан.
Чыылығда араласханнар Хакас Республика правительствозының кізілері, Ӧӧркі Чӧптің депутаттары, ідӧк Улуғлар чӧбі президиумынын кізілері - Любовь Иосифовна Аёшина, Владислав Михайлович Тутатчиков паза «Алтынай» пірігістің кізілері - Валентина Гавриловна Шулбаева, Евдокия Михайловна Кильчичакова.
Тоғысчы ӧмее піс сірернің айланыстарыңны паза редакция тоғынҷыларының кӧрізін паза чарадиин искіргебіс. Чыылығның араласчылары, чоох тудып, ідӧк прайзы газетаның ады «Хакас чирі» ползын тіп чарасхан.
Амды ол чарадығ Хакас Республиканың Ӧӧркі Чӧбінің килер чылдағы сессиязында алыларға кирек. Таныхтирға кирек, пу сурығ ӱр паза оой нимес пӧгілді. Тус андағ полған - ӧрттер, табығлар, пастыхтар алысханы. Че, хайдағ даа полза, чолны парчатхан на кізі тобырча.
Илееде кізідең истерге киліскен - «Хакас чирін» айландырбазар, газетаа пазынмаспын. Ізенчебіс, ол кізілернің олаңай ла сылтағ полбаан, ам пазынарлар, сӧстеріне турызарлар. Уламох, хаҷан 2020 чыл Хакас Республикада Хакас тілі чылы тіп чарлал парғанда. Пу тема хоостыра наа рубрикалар кирербіс паза Хакас тілі чылы хайди иртчеткені, ниме иділчеткені тӧреміл пістің хайиибыста полар.
Таныхтирға кирек, газетабыста пірееде алҷаастар даа сых парча, піс аның ӱчӱн пыросынчабыс. Че, сынында, алҷаастар хайдағ даа печатнай тоғыста учурапча. Хайди тіпчелер - паспинчатхан на кізі алчаас итпинче. Редакцияның ӧмезі газетабыс туза паза хынығ ползын тіп аннаң андар кӱзін салар.
Ниме таныхтапча «Хакас чирі»? Ол - пістің чир-суубыс, чоныбыс паза тілібіс. Аннаңар чағдапчатхан Наа чылда «Хакас чиріне» оң ползын! Чалғыс газетабысха пазынарға ундубаңар.
Аарлығ чир-суғҷылар! Алғыстапчабыс чағдапчатхан Наа чылнаң!
Килчеткен чылда чуртастағы чидіглерің уламох пӧзік ползын, сағынчатхан сағыстарың прай толзын. Хазииңар пик ползын! Ырыстығ, часкалығ полыңар!
Автор :
Радион СУНЧУГАШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы