МАРИНА САГАТАЕВА: «ПІСТІҢ ӰГРЕНҶІЛЕР ИҢ АРТЫХ ПОЛЗЫННАР»
30.12.2019
Хабарлар
Гимназияның директоры Марина САГАТАЕВА ӱгренӌілерінең хада
Поғдархас. «Россияның иң чахсы 100 школазы» марығда аралазып, Хакасиядағы ікі ӱгредіг заведениезі - Н.Ф.Катановтың адынаң национальнай гимназия паза Индіркі Тӧӧдегі С.П. Ултургашевтің адынаң ортымах школа - чиңісчілер санында пол парған. Оларның устағҷылары "Чыл директоры-2019" атха турысханнар
ӰГРЕТЧІ ТОҒЫЗЫНЗАР ЧОЛ
Хакас гимназияның директоры Марина Сагатаева ӱгретчі тоғызынзар чолы азых полған тіп таныхтапча. Аның іҷе-пабазы кӧп чыл ӱгредіг киреенде істенгеннер, позы даа, Хакас хазна университедін тоозып, ӱр чыл Чукотскай автоном округындағы Конергинскай ортымах школада математика паза информатика ӱгретчізі полған. Аннаң айланғанда, Хакасияның ӱгредіг паза наука министерствозынзар тоғынарға кірче.
- Министерствоның экономика пӧлиинің иң кічіг должнозынаң пӧлік пастығына теере ӧс парғам. Республиканың тиксі бюджедін алып алза, ӱгредіг киреене 30 процент пирілче. Аннаң пістің пӧлік тоғынҷаң, - чоохтапча Марина Николаевна.
2017 чылда Хакасияның ӱгредіг паза наука министерствозы Марина Сагатаеваны национальнай гимназияның директорына турғысча.
ПРАЙ НИМЕ ПАЛАЛАРҒА
- Чыллар парча, чуртасха наа оңдайлар кирілче. Национальнай гимназия хаҷан даа туснаң тиңе хаалирға кӱстенче. Пеер тоғысха килгенімде, палалар уроктағы нимес тусты тузалығ иртіреріне улуғ хайығ сал сыххам. Іди хазнада шахмат кружоктары тиліп пастаанда, піс тее аны гимназияда чуртасха киріп пастаабыс. Аның тузазынаңар прай даа ученайлар, ӱгретчілер таныхтапчалар. Ідӧк ирткен чылдаң пасти гимназияда математиканы прай класстар тирең ӱгреніп пастааннар. Минің кӧрізімнең, математика иң ӧӧн предмет полча. Ағаа хоза улуғ хайығ салчабыс тіллер ӱгренеріне. Национальнай гимназияда ӱгренҷілер хакас тілін пілбинчелер тіп кӧбізі таныхтапча, че мында пістің не пыробыс нимес. Піссер удаа тіл пілбинчеткен палалар ӱгренерге кірчелер. 5-ҷі классха килгеннернің 70 % тӧреен тілінең чоохтаспинча. Аннаңар мин хаҷан даа тіпчем, амды тілні тилідердеңер нимес, хайраллап халардаңар сағыссырирға кирек. Пу тоғысты палаларнаң иң пурнада сӧбіреде, школа алнындағы учреждениелерде паза пасталығ класстарда пастирға кирек.
Национальнай гимназия хакас тілін хайраллир тоғысты сыбыра апарча. Іди, уроктар тоозылза, ӱгренҷілернең воспитательлер тоғынып пастапчалар, олар пос тілінең чахсы чоохтасчалар.
Хакас тілінең пасха, ӱр ниместең гимназияда хыдат тілін ӱгреніп пастабысхабыс. Федеральнай хазна стандарттары школаларға ікінҷі хазна тілін ӱгренерге чахығ пирче. Гимназияда англия тілін ӱгренҷеңнер, амды, тізең, хай пірее класстар хыдат тілін предмет чіли ӱгреніп пастабысханнар, хайзында факультатив чіли. Сизінгенде, палаларға хыдат тілін ӱгренерге чапсых. Оларға пу тілні пілгені хаҷан полза туза ағылар тіп санапчам.
Олох туста, ӧӧн ӱгредігдең пасха, олғаннарға ідӧк хоза ӱгредіг пирерге кӱстенчебіс. Іди піс ирткен чылда региондағы ДОСААФ-наң чӧптезіг ит салғабыс. Амды піс гимназия ӱгренҷілерін водитель правазына ӱгредіп пастабысхабыс. Улуғ класстардағылар анда хынып ӱгренчелер.
Піс олғаннарны прай саринаң тимнеп школадаң сығарарға кӱстенчебіс. Олар пасхазынаң артых, хыйға паза ӧткін ползыннар...
САҒЫНҒАН САҒЫСТАР ТОЛЗЫН
Килчеткен чылларда искірігліг технологияларға кӧп хайығ салылар. Хакасияның ӱгредіг паза наука министерствозы хабазиинаң пістің ӱгредіг заведениебіс «Цифровые образовательные системы» переченьге кір парған. Аны хоостыра 2020 чылда гимназияа наа компьютер оборудованиезі пирілер. Ідӧк чағдапчатхан чылда наукаа улуғ хайығ саларға пӧгінчебіс. Аның сылтаанда физика паза химия кабинеттерін нааҷылап аларға кӱстенербіс. Ағаа хоза 2020 чылда национальнай гимназияа 75 чыл толар. Тимненіс амох парча.
Мин национальнай гимназияның паза пасха даа ӱгредіг учреждениелерінің ӱгретчілерін, ӱгренҷілерін паза оларның іҷе-пабаларын чағдапчатхан Наа чылнаң алғыстапчам! Полған на іҷе-пабаа паланың чидии иң артых сыйых полча. Аннаңар олар пістең артых чуртазыннар, чидіглері улам улуғ ползын. Піс, тізең, оларға иң чахсы піліс пирерге кӱстенчебіс.
Автор :
Пазып алған Оксана СУНЧУГАШЕВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде