НАА ЧЫЛҒА - ЧАХСЫ АЛЫЗЫҒЛАР
10.01.2020
Хабарлар
«Хазых хайраллиры» нацпроект. Наа чыл алнында Хакасия пазы Валентин Коновалов тоғыс хоостыра Харатаста полған
Анда ол «Хазых хайраллиры» нацпроектче олған имнег туразында иртірілген тыхтағ тоғыстарын кӧрген. Пурнада Валентин Олегович Советскай орамада орныхчатхан олған поликлиниказында полған. Аны Хакасияның хазых хайраллаҷаң министрі Владимир Костюш паза Харатастағы имнег туразының наа ӧӧн имҷізі Александра Карамчакова удурлааннар.
Матлама тыхтағ тоғыстары соонаң Харатастағы олған имнег туразы кічіг палаларны удурлирға тимде. Пу учреждениезер ікі олған поликлиниказы паза 18 педиатр участогы кірче, андар 16,5 муң пала хазиин сыныхтанарға чӧрче. Олған поликлиниказы 1963 чылда тоғынып пастаан. Ол тустаң сығара анда тыхтағ тоғызы иртірілбеен полған, имҷілерге кабинеттер чидіспеҷең, батареяның таттап парған орыннарынаң суғ ахчаң, имнег тиріглері дее чидіспеҷең.
Амды, нацпроекттер тӱзімніг тоғынчатхан сылтаанда, Наа чыл алнында Харатастағы олған имнег учреждениезінде чахсы алызығлар пол парған. Поликлиникада ам истіг паза чылығ. Коридорларны чарых хоостар чазапчалар. Кічіг палалығ іҷелер имҷізер теесті нымзах одырчыхтарда одырып сахтапчалар. Тыс пілбес олғанахтарға ӧнетін ойнаҷаң орын пар. Час палаҷахтарны азыраҷаң пулуңас парох. Аның алнында іҷелерге коридорда кізілер кӧзіне паланы имҷектирге килісчең.
Амды ағырчатхан паза хазых палалар поликлиниказар алынҷа ізіктерҷе кірчелер. Іҷелер имҷілерзер инфоматча пазынчалар. Олғаннарның амбулаторнай карталары регистратурада наа тасхахтарда хайраллалчалар.
Хакасия пазы Валентин Олеговичке лор паза харах имҷізі кабинеттерін кӧзіткеннер. Ол кабинеттерзер аарлыға турчатхан наа оборудование алылған.
Хазых пала кабинедінде имҷілер іҷелерге чӧптер пирчелер, сурығларға нандырчалар: хайди паланы азырирға, хайди чуурға, нинҷе часта узирға чатырарға. Ідӧк прививкаларның тузазынаңар чоохтапчалар. Прививкалардаңар чоох парыбысханда, таныхтирға сағынчам, Харатастағы олған поликлиниказында вакциналар хайраллаҷаң ӧнетін пӧлік пар. Анда соох, специалисттер андағы температураны тӧреміл хайығда тутчалар.
Олған поликлиниказын нааҷылирына паза наа имнег тиріглерін аларына 4,2 миллион салковай хорадылған.
Анаң Валентин Коновалов Харатастағы олған имнег туразынзар парған. Ол Дзержинскийнің орамазында орныхча. Анда хазых хайраллаҷаң министр Владимир Фёдорович паза ӧӧн имҷі Александра Юрьевна регион пазына рентген, УЗИ паза ФГДС кабинеттерін кӧзіткеннер. Таныхтирға кирек, пу кабинеттерзер аарлығ оборудование алылған.
Пу чахсы саринзар алызығлар имҷілерні паза иркеҷектіг іҷе-пабаларны ӧріндірче. Анзы нааҷылалған имнег учреждениезінде іле кӧрінче.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы