ПӰДІРІГ КИРЕЕ АЙНЫПЧА
14.01.2020
Хабарлар
Салтарлар - 2019. Хакасия пазы Валентин Коноваловнаң тоғазығда пӱдіріг паза ЖКХ министрі Сергей Новиков чыл салтарларынаңар паза чағынғы пӧгіннердеңер искірген
Хакасияның пӱдіріг паза ЖКХ министрі Сергей Новиковтың сан пирізінең, алындағы чылнаң тиңнестірзе, 2019 чылда пӱдіріг киреенде ӧзіс таныхталған. Пу кӧзідіге хазнабыста нацпроекттер чуртасха кирілгені чахсы ӧзен полған. Оларны хоостыра республикада ӱс Культура туразы, алты олған сады, ӱс фельдшер-акушер пункты, имнег амбулаториязы паза пасха социальнай пӱдіріглер тимге сығарылғаннар. Аннаң пасха, республикадағы онкодиспансернің радиология корпузының, Тойымдағы психоневрология интернадының 200 орынға чуртаҷаң корпузының пӱдірии пасталған. М.Ю.Лермонтовтың адынаң орыс драма театрын наачылирынҷа тоғыстар узарадылча.
Хакасия пазы Валентин Коновалов ӧӧн пӧгінні хатап таныхтаан - февраль тоозылғанҷа пу чылға кӧрілген пӱдіріглерҷе чӧптезіглерде хол салыларға кирек, март-апрельде пӱдіріг тоғыстары пасталарға, тоғыстар Сибирьде пасталчатхан хысхы тусха тооза толдырылар ӱчӱн.
2019 чылда правительство республикадағы ЖКХ-ның реформазын иртіріп пастаан. Чылығ паза суғ пирчеткен организациялар пиктелчелер паза алыстырылчалар: 11 пірігіс казённайға алыстырылған.
ЖКХ предприятиелері сыныхталғаннар, сайбағлар ілезіне сығарылғаннар, сыныхтағ салтарлары право хайраллаҷаң органнарға пиріл парған. 2020 чылның республика бюджедінде регионның коммунальнай предприятиелеріне читіре албинчатхан парыстарын айландырарына 1 миллиард салковай пирері кӧріл парған. Кӧбізі муниципальнай пӱдістерде хара тасты читірерінҷе паалар рынок синіне тиңнестірілгеннер.
- 2020 чылда тиксі регионда ЖКХ кӧстеен паза чылығ-чарытхы пирчеткен предприятиелернің тоғызын
чахсыландырар ӱчӱн, чурт-коммунальнай хоныхтың реформазын иртірерінҷе программаны чуртасха кирерін, предприятиелерні алыстырарынҷа муниципалитеттернең паза чылығ-чарытхы пирчеткен пірігістернең тоғынарға, ідӧк ирткен чылда пастаан ахча, хоных паза техника сыныхтағларын узарадарға кирек, - таныхтаан Валентин Коновалов.
2019 чылда «Чурт» хазна программазы хоостыра 18 чиит сӧбіре чурт суриин пӧгіп алған, ол, тізең, алындағы чыллардаң кӧп. Пу чылда полызығны 31 чиит сӧбірее пирерге пӧгін турча. Ідӧк ирткен чылда 55 чуртағҷы изелчеткен туралардаң кӧзірілген, пӱӱл ол кӧзідіг ӧскірілер.
«Городта истіг оңдайлар тӧстирі» программаҷа тура ибіркі 41 орын паза чон тынанҷаң 44 орын иптелген,
2020 чылда пу саннар ідӧк ӧскірілер.
Хакасия пазы ведомство устағҷызына паза министерствоның, ведомство холындағы учреждениелер ӧмелеріне 2019 чылда чӧптіг тоғынғаннары ӱчӱн алғызын читірген паза 2020 чыл толдырылған пӧгіннернең паза чуртасха кирілген программаларнаң уламох танығлығ поларына ізенізінен ӱлескен.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы