ІКІЗІНДЕ ВЕТЕРАН
14.01.2020
Хабарлар
Печать кӱні. Пу пайрам пістiң хазнада 13 январьда таныхталча. «Хабар» газетада ӱр чыллар тоғын париған арғызыбыстаңар пӱӱнгі чооғыбыс ана ол ӱлӱкӱнге чарыдылча.
Хабарҷы Николай СУЛТРЕКОВ
Николай Султреков, Ағбандағы ӱгретчілер институдын тоозып, сах андох хабарҷы полыбыспаан. Аның істеніс чолы милицияда пасталған. Чиит оол школа соонаң служба иртібіскен полған, анаң на пӧзік ӱгредіг алған. Аннаңар пу тоғысха кірерге ағаа сидік полбаан.
- Тиксі алза, мин право хайраллаӌаң органнарда 21 чыл істен салғам, - чарытхан ол.
Таныхтирға кирек, Николай Михайлович пу син тус аразына олаңай участковайдаң подполковникке читкен. Чахсы тоғызы ӱчӱн хазна сыйыхтарынаң пір ле хати таныхтатпаан. Пӱӱнгі кӱнде ол Хакасияның істіндегі киректер министерствозының ветераны полча!
Хайди прайзына пілдістіг, право хайраллачаң органнарда служба иртчеткеннер тынаға ирте сығыбысчалар. Николай Михайлович милиция тоғызынаң ідӧк 45 частығда парыбысхан. Ана ол тустаң сығара, 2001 чылдаң, ол «Хакас чирі» газетаның хабарҷызы полыбысхан.
- Редакциязар мин милицияда тоғынчатхандох кір чӧрчеткем. Чир-суғӌым Анатолий Султрековнаң чоох-чаахнаң одырып алӌаңмыс. Ӧӧн редактор полған Анатолий Угдыжековнаң даа чахсы таныс полғам. Милициядағы службам тоозыл парғанда, олар мині ікӧлең хабарҷы тоғызын сынап кӧрерге хығырғаннар. Мин ынабысхам, - кӱлімзіреп ала сағысха кирген хада тоғынчатхан арғызыбыс.
Теестегі суриибыс мындағ полған: «Наа ла килгенде, хайдағ сидіксіністерге урунғазар?»
- Ағбандағы милиция пӧлиинде тоғынғанда, орыс чоннаң кӧп чоохтазарға килісчең. Кирек чаӌыннарны орыстинаңох пасчаңмын. Аннаңар орыс тіліне кӧнік парчатпаспын ма. Че мин институтта хакас филология пӧлиинде специальность алғам нооза. Ағаа хоза, анда хада ӱгренген Алефтина Субракова редакцияда тоғынчатхан. Ол мағаа чахсы полысхан. Полған на сай «Хакас чирі» газетаны пос алынӌа тыыда хығыр турарға чӧп пирген. Іди мағаа 2-3 ай ла кирек полған. Анаң минің редакциядағы тоғызым оой ла пар сыххан. Ӧӧн редактор Анатолий Угдыжеков хайдағ темаларны чарыдарын позың кӧр теен. Мин политикаа чапсыныбысхам. Паза ла кӧрзем, пастых кізі хабарларны чахсы тӱптестіріп пас салчатханымны сизін сыхтыр. Іди мин политика пӧлиинде тоғын сыххам, - чарытхан Николай Михайлович.
Николай Султреков ағаа, редакциядағы істеніс чолын наа ла пастапчатхан кізее, хабасхан-полысханнарның санына ідӧк кирче Алексей Котожековты, Михаил Коковты, Алексей Тохтобинні, Галина Чаптыкованы.
Григорий Абдинні, тізең, ол алынҷа таныхтапча:
- Улуғ опыттығ специалисттер мині улуғ предложениелернең пасчатхан ӱчӱн тӧреміл хырысчаңнар. Чонға хығырарға сидік полар тіҷеңнер олар. Че Григорий Петрович минің алным алчаң. «Ноға чииттерні прай нимені оой идерге ӱгретчезер? Сидік предложениелерні чуртасха кирерге кирегӧк нооза», - хатығ чоохтаныбысчаң ол.
Хакасияның национальнай газетазының ӧӧн редакторы Максим Чаптыков полыбысханда, Николай Султреков право хайраллачаң пӧлікнең устир тіп чарадығ алыл парған.
- Политиканы чон телевизор пастыра кӧріп алча. Син Хакасиядағы киректердеңер пас теен Максим Константинович. Ағаа хоза, милицияда тоғынған опыдың читкіӌе полар право хайраллаӌаң сурығларны чарыдарға. Ам даа мин пу пӧлікнең устап парчам, - чооғын узаратхан Н.М.Султреков.
Мындағ оңдайнаң Николай Султреков чуртазындағы ікінҷі профессиязына читкен. Редакциядағы тоғыста ағаа ідӧк кӧп сыйых, ол санда Хакасия правительствозы синіндегі, сыйлалған. Н.М.Султреков Россияның журналисттер пірігізінің араласчызы полча. Паза пӱӱнгі кӱнде ол «редакцияның ветераны» атха чидіп алды тиирге чарир.
- Мында тоғынып, 20 чылға чит тее парим. Аннаңар ветеран пол парғанымнаң тоғыр поларға киліспинче. Амды мин ідӧк чииттерге, айланзалар, аймах чӧптер пиріп, полыс пирерге кӱстенчем. Прайзынаң арғыстарнаң чіли чоохтасчам. Хайдағ чӧп пирерчікпін оларға? Посты пос ӱгредеріне хайығ айландырарға кирек. Орыс тілінең аны «самообразование» тіп адапчалар. Пілісті алғытпаза, посты даа тилідер оңдай чоғыл нооза. Кӧп хығырзыннар, кӧп ниме пілерге кӱстензіннер. Пір сӧснең, чуртастың прай сариларын пілзіннер. Хайди тіпчелер, прай ниме постаң! Пос ла кӱстензе, прай ниме полар! - чооғын узаратхан ветеран кізі.
Че ниме хомзындырча аны?
- Чуртас полған на сай алысча. Чаӌында сығарылчатхан газета-журналларны хығырчатханнар саны ідӧк табырах хызырылча. Прай ниме электроннай кӧрімге айландырылча. Аннаңар, хайди даа кӱстензебіс, чуртас оңдайларынаң ас полбасха тӧӧйбіс. Пілдістіг, чалғыс хакас газетазын сығарарға, ағаа чонны пазындырарға прай кӱзібіс саларбыс. Че аның таңдағызын ідӧк тус ла кӧзіткей
Ирт парған даа полза, піс Николай Султрековты паза хада тоғынчатхан прай арғыстарыбысты Печать кӱнінең алғыстапчабыс. Чоныбысты чапсых хабарларнаң ӧріндір ле туралар!
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы