ТАРИФТЕР, ТАРИФТЕР...
17.01.2020
Хабарлар
Пресс-конференция. Хакасияның энергетикаҷа паза тарифтерҷе хазна комитедінің кнезі Манук Данданян тарифтер хоостыра ирткен чылның салтарын иткен паза пу чылға алызығларны чарытхан
СӦП-САП РЕФОРМАЗЫ АЛЫЗЫҒЛАРҒА АҒЫЛҒАН
Хайди таныхтаан Манук Амбарцумович, 2019 чыл ниик ле чыл полбаан. Анзы сӧп-сап реформазы чуртасха кирілгенінең палғалыстығ.
- Мының алнында Хакасияда аймах операторлар тоғынған полза, ирткен чылдаң республикада сӧп-сап сығарар ӱчӱн «Аэро-сити-2000» компания нандырып пастаан. Анзы чуртағӌыларның кӧңніне тың на кірбеен. Піс сӧп-сап сығарчатхан ӱчӱн тарифті тӧбін идерге кӱстенгебіс. Іди пӱӱл чуртағҷылар поғыр-похсах сығарған ӱчӱн 2019 чылдағы чіли тӧлирлер, че хай пірее муниципалитеттерде - Саяногорск городта, Пии аймаанда паза Алтай аймааның Новомихайловка паза Очыр аал чӧптерінде - тарифті 3,57 процентке тӧбін тӱзірер оңдай полған, Абазада паза Таштып аймаанда - 0,5 процентке, - таныхтаан Манук Данданян.
Сӧп-сап реформазы полған на кізінің кӧңніне кірбеен полар. Анзы пілдістіг, кем хынадыр за толдырылбинчатхан тоғыс ӱчӱн ахча тӧлирге?! Пу сурығ хоостыра ӧӧнінде аал чуртағҷыларының хомзыныстарын истерге килісче. Анда пірдеезі сӧп-сап сығарбинча, че квитанциялар ай сай килчелер. Хайди чарытхан Хакасияның энергетикаҷа паза тарифтерҷе хазна комитедінің кнезі Манук Данданян, пу сурығ хазнаның прай регионнарында кӧдірілчеткенде, пӱӱл аны федеральнай синде хатап ӱзӱрерге киректер.
- Нинӌе хати сӧп-сап сығарылған, чуртағӌы аның на ӱчӱн тӧлирге кирек, сығарылбаза, тізең тӧлеҷең сылтағ чох ползын, - теен ол.
Таныхтирға кирек, Сибирьдегі федеральнай округты алып алза, Хакасияда сӧп-сап сығарчатхан ӱчӱн иң тӧбін тариф.
ЧАРЫТХЫ СУРИИ ПАЗА ЧЫЛЫҒ ПИРЕРІ
Хазна президенті чыл сай чоннаң кӧні палғалыс иртірче. Анда чуртағҷылар чарытхаа тарифтер пӧзік полчатханын удаа искірчелер. Аның сылтаанда хазна устағҷызы федеральнай антимонопольнай службаа (ФАС) регионнардағы тарифтерні сыныхтирға чахығ пирген. Іди сыныхтағ соонаң ФАС тиксі хазнада тарифтерзер кӧрілбеен хорадығлар кирілгенін ілезіне сығарған!
- Тарифті кӧдірер сурығ ӱзӱрілчетсе, иң пастап аның сылтаан піліп аларға кирек. Піс пу тоғысты прай саринаң кӧріп апарчабыс. Хозылчатхан алай ба хызырылчатхан полған на ахчаны хайығда тутчабыс, - чарытча Манук Данданян.
Кӧзідімге «Абаза-Энерго» компанияны алып аларға чарир. Ирткен чылда пу компания аарлығ хара тас алып алғаннаңар сан пиріс идіп, аның паазын тарифсер кирген. Че сынында хара тас хай-хай тӧбін паанаң алылтыр. Аннаңар пӱӱл 1 январьдаң Абазада чылыға тариф 6 %-ке хызырылча.
- Мындағ сыныхтағ тоғыстарны аннаң андар узарадарбыс. Чуртағӌылар алчатханна чылығ ӱчӱн тӧлирге киректер, - чооғына хосхан ол.
Олаңай чуртағчылардаң пасха, ол-пу предприятиелерге тарифтер алыс парар. Іди тӧбін напряжениенең тузаланчатханнарға тариф 1,7 %-ке хызырылар, ортын напряжениенең тузаланчатханнарға - 1,6 %-ке.
- Ирткен чылда полған на тарифті пір синде тут халарға алай кӧпке хоспасха кӱстенгебіс. Пӱӱл тарифтерде алызығлар поларох, че аны нинҷее хозарға піс ідӧк прай саринаң кӧрербіс. Кӧрілбеен хорадығлар ӱчӱн чон тӧлебес, - чооғын тоосхан Хакасияның энергетикаҷа паза тарифтерҷе хазна комитедінің кнезі Манук Данданян.
Пӱӱл чарытхаа тариф кибірли 1 июльдаң 4,6 %-ке хозылары кӧрілче. Таныхтирға кирек, Хакасия чарытхаа иң тӧбін тарифтіг регионға саналча.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы