ПІРГЕ ТОҒЫС ТӰЗІМНІГ ПАРАР
21.01.2020
Хабарлар
Чӧптезіг. Хакасия правительствозы паза хакас чонның республикадағы Улуғлар чӧбі пірге тоғынардаңар чӧптезігде хол салғаннар
Хакасия пазы Валентин КОНОВАЛОВ паза республикадағы Улуғлар чӧбінің кнезі Пётр ВОРОНИН чӧптезігде хол салыбыстылар
КӰРГЕН АЙЫНЫҢ 16-ҷы КӰННДЕ ХАКАСИЯНЫҢ ПАЗЫ - ХАКАСИЯ ПРАВИТЕЛЬСТВОЗЫ КНЕЗІ ВАЛЕНТИН КОНОВАЛОВ ПАЗА РЕСПУБЛИКАДАҒЫ УЛУҒЛАР ЧӦБІНІҢ КНЕЗІ ПЕТР ВОРОНИН ХАКАС ЧОННЫҢ ХІІІ СЪЕЗДІНІҢ РЕЗОЛЮЦИЯЗЫН ТОЛДЫРАРЫ ХООСТЫРА ЧӦПТЕЗІГДЕ ХОЛ САЛҒАННАР. ЧӦПТЕЗІГ ИДЕРІНДЕ ІДӦК ХАКАСИЯ ПАЗЫНЫҢ ПАСТАҒЫ ОРЫНҢЫЗЫ НИКОЛАЙ МИРОНОВ, РЕСПУБЛИКАДАҒЫ УЛУҒЛАР ЧӦБІ ПРЕЗИДИУМЫНЫҢ КІЗІЛЕРІ АНАТОЛИЙ СУНЧУГАШЕВ ПАЗА ВИКТОР ЧЕПЧИГАШЕВ АРАЛАСХАННАР.
Хакас чонның съезді пис чыл пазынаң иртірілче, халғанҷызы 2016 чылда ирткен. Ол съездтің резолюциязынзар 40 мероприятие иртірердеңер чӧптер кірген полған. Оларның санында хакас ааллардағы школаларның пӱдіриин тоозары, культура тураларына паза школаларға национальнай кӧг тиріглерін алары, хакас тілі учебниктерін сығарары паза даа пасхазы. Амғы тусха оларның 22-зі (55 %) толдыразынаң толдырылтыр, 11(27,5 %) - чардыхти, 7 мероприятие - ам даа тоғыста. Андағ оңдайнаң пӱӱнгі кӱнге хакас чонның съездінде алылған резолюция чӧптерінің 82,5 %-і толдырылған тіп искірілген тоғазығ пасталар алнында.
- Пӱӱнгі чӧптезіг - ол Улуғлар чӧбінең пірге тоғызыбыстың салтары, - таныхтаан Хакасияның пазы Валентин Коновалов чӧптезіг иділген соонаң. - Пу пічікте кӧрілген кӧстеглер уғаа кирек. Мин санапчам, чӧптезігде пар полған ӧӧн пӧгіннернің пірсі - регионны экология саринаң хорғыс чох идерінӌе пірге тоғынары. Улуғлар чӧбінің мында нинӌе-де чӧп пар. Піс оларны санға аларға паза чуртасха кирерге тимдебіс. Олох туста удур-тӧдір искіріглернең ӱлезері кирек. Халыхтарнаң палғалыс тудары уғаа кирек ниме, кізілер кӧрзіннер: хайдағ полномочиелер правительствоның пар, нимені ол ит полар паза итче. Искіріглернең ӱлескені, чӧптер пиргені халыхтарның паза ӱлгӱ органнарының пірге тоғызын тӱзімніг идер.
Валентин Коноваловтың искіриинең, республика ӱлгӱлері чағынғы туста пу чӧптезігні чуртасха кирерінҷе тоғысты пастабызарлар.
Пётр Воронин хакас чонның республикадағы Улуғлар чӧбі паза республика правительствозы аразында тоғыс тӧреміл апарылчатханын таныхтаан.
- Чылда ікі хати правительство Улуғлар чӧбі кізілерінең тоғасча, - чоохтаан республикадағы Улуғлар чӧбінің кнезі. - Паза прай сурығларны, хайдағ пістің сығысча, піс теглек стол кистінде ӱзӱрчебіс. Анаң, таразып, ол тоғысты чуртасха кирчебіс.
Иділген чӧптезіг, тізең, хакас чонның ХІІІ съездінің резолюциязын толдырарынҷа тоғысты узаратханы полча. Олох туста пу чӧптезігде наа нимелер пар. Кӧзідімге, Хакасия правительствозы амды, стратегическай планнығ пічіктерін тимнепчетсе, хакас чонның республикадағы Улуғлар чӧбінің регионны экология саринаң хорғыс чох идерінңе сағыс-кӧрістерін санға ал турар.
Таныхтирға кирек, 2020 чыл республикада Хакас тілі чылы полып иртер. Аннаңар пӱӱл хакас тілін хайраллирына паза тилідеріне алынҷа хайығ салылар. Хакас тілі чылына чарыдылған кӧп аймах-пасха мероприятие иртірері кӧріл парған паза, иң ӧӧні, оларны иртіреріне ахча салыл парған тіп таныхтаан Хакасияның пазы.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде