ЧОННАҢ ЧООХ АЛЫЗАРҒА КИРЕК
21.01.2020
Хабарлар
Чыылығ. Хакасияның пазы Валентин Коновалов республиканың чурт-коммунальнай хонииның объекттері хысхы туста хайди тоғынчатхан сурығҷа видеоселектор пастыра чыылығ иртірген
Чыылығда Хакасия пазының пастағы орынҷызы Николай Миронов, орынҷызы Юрий Курлаев, республиканың министер-ствоведомстволарының, федеральнай органнарның устағҷылары, прокуратура кізілері паза муниципальнай пӱдістер пастары араласханнар.
Хысхы тусты регионның чурт-коммунальнай объекттері хайди иртірчеткеннеңер искірген Хакасияның пӱдіріг паза ЖКХ министрі Сергей Новиков. Аның чооғынаң, республиканың прай объекттері олаңай режимде тоғынчалар. Харатастың чуртағҷыларына газ пирері тохтадылған полған, іди 43 тура газ чох халған. Амды, прокуратура ара кіріскенде, газ пиріл сыхты.
Топливо прай котельнайларға читкіҷе тартылча, Асхыста, Писхамҷыда ла сурығлар сығысча. Асхыстағы котельнайның хазанын шлактаң арығлир оборудование аларға 300 муң салковайға контракт иділген. Пу чағында ол оборудование килер. Боград, Шира аймахтарына топливо читкіҷе пилетирге ахча позыдылған, анда тоғыс чахсы парча.
Тимненіс паспорттарын аларға тимненчелер Кирбінің паза Пилтірнің аал чӧптері. Министерствозар аймах сурығларҷа 12 айланыс юрген. Оларҷа сыныхтағлар иртірілген, алынҷа сайбағлар табырах тӱзеділгеннер. Ағбанның паза Харатастың хай пірее чуртағҷылары квартираларында чылығ нормаа чидіспинчеткеннеңер искіргеннер. Ідӧк Ағбанда, Харатаста, Абазада, Шира паза Ағбан пилтірі аймахтарында 25 саай суғ-чылығ пирҷен сетьтерде таныхталған. Аймахтарда котельнайларны муниципальнай казеннай предприятиелерге айландырар тоғыс узарадылча.
Чурт-коммунальнай полызығлар ӱчӱн тӧлеглер чыыры республикада 94 процентке тиңнелген. Город-аймахтарҷа пу тоғыс хайди апарылчатханын кӧрзе, ахчаны иң чахсы чыыпчалар Абазада (106 %), Ағбанда (96 %), Таштып аймаанда (96 %), Алтай аймаанда (92 %). Пу тоғысты уйан арах апарчалар Харатаста (87 %), Шира аймаанда (87 %), Ағбан пилтірі аймаанда (86 %), Боград аймаанда (78 %), Асхыс аймаанда (77 %). Че иң хомай тоғынчалар Сорығда, анда полызығлар ӱчӱн чыылчатхан тӧлеглер 40 процентке ле тиңнелче. Прай муниципалитеттер пу тоғысты чахсы апарбинчалар.
Чал ахчазын тӧлирінҷе алымнар республикада 5,1 миллион салковайға тиңнелче, аның 2,6 миллионы Асхыс аймаана килісче.
Валентин Коновалов город-аймахтар пастарына сан пиріс тударға сӧс пирген. Харатастың пазы Василий Белоноговтың чооғынаң, котельнайларда пилетелген хара тас 30 кӱнге чидер. 15 январьда городха газ пирҷең организациянаң контракт ӱзілген, амды тураларға пасха организация газ пиріп пастапча. Коммунальнай полызығлар ӱчӱн тӧлеглер чыыр тоғыс кӧӧлҷе апарылча.
Хайди искірген Сорығның пазы Владимир Найденов, полызығлар ӱчӱн тӧлеглер чыыр тоғыс уғаа сидік парча. Пу сурығҷа чыылығлар иртірілче, чарғы 100-че приказ сығарған, че чарғы приставтары оларны толдырар тоғысты уйан апарчалар. Чарғы приставтары службазын тоғындырарға республика ӱлгӱлерінің полызии киректелче. Пасха саринаң кӧрзе, кізілернің тӧлеҷең ахчазы чоғыл.
Чыылығда пасха даа муниципальнай пӱдістер пастары чурт-коммунальнай сферадағы тоғыс хайди апарылчатханнаңар сан пиріс тутханнар.
Валентин Коновалов пӱдіріг паза ЖКХ министріне Сорығда чарғы приставтарынаң паза муниципалитет тоғынҷыларынаң хада чурт-коммунальнай полызығлары ӱчӱн тӧлеглер чыыр рейдтер иртірерге чахығ пирген.
- Тӧлеглер чыыр тоғысты тӱзімніг апарарға кирек. Амды хысхының чарымы иртіп парды, алныбыста иң сидік чардығы халды. Хатығ соохтар ам даа полар. Чылығ пирӌең прай объекттерде топливо читкіӌе пилетеп салыңар. Сірер чонға чағынзар, чуртағҷыларнаң чоох алызыңар, кирек сурығларны хада чахсы ӱзӱріңер, андада тоғыс таа тӱзімніг парар, - теен Хакасия пазы.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы