ИЛБЕК ЧИҢІСКЕ ТИМНЕНІС
21.01.2020
Хабарлар
Хумартхылас паза Сабланыс чылы. Хакасия пазы Валентин Коновалов «Чиңіс» тимненіс комитедінің чыылиин иртірген
Пістің хазнада 2020 чыл хумартхылас паза сабланыс танығнаң иртче. Хакасияда Илбек Чиңістің 75 чылын таныхтирына тимненіс узарадылча. Республика пазы Валентин Коновалов «Чиңіс» регионның тимненіс комитедінің теестегі чыылиин иртірген.
Ол комитет кізілерінең хада ӱлӱкӱнге тимненіс хайди парчатханын, Чиңістін пайрамына чарыдылған патриотизм, культура паза спорт мероприятиелері планын, ідӧк ветераннарға паза прайзына, кем ӱлӱзінең Илбек Ада чаанаң палғалыстығ, хайдағ социальнай хабазығлар пирілерін ӱзӱрген. Мындағ хабазығны, республиканың істеніс паза социальнай арачыланыс министерствозы саннарынҷа, пӱӱнгі кӱнде 29370 кізі кирексіпче. Оларның аразында 126 фронтовик, хурчағдағы Ленинградтың 26 чуртағҷызы, концлагерьде полған 22 кізі, 2263 тыл істенҷізі, чат халған паза ӱреен ветераннарның ӧкіс халған 933 ипчізі, ідӧк 26 муңҷа чаа палазы. Хакасия пазы хайығ паза социальнай хабазығ оңдайлары прайзына читірілерге кирек полчатханын таныхтаан.
Хакасияда Чиңістің 75 чылына чарыдылған мероприятиелер иртіреріне 51 миллион салковай салыл парған. 30 миллион артиинаң салковайы пір хати пирілчеткен тӧлеглерге парар.
Хакасияда чаа матырларын хумартхылирынҷа улуғ тоғыс апарылча, чааҷылар сыыраттарын паза мемориаллығ орыннарны иптиріне алынҷа хайығ салылча. «Чиңіс» тимненіс комитедінің пу чыылии салтарларынҷа Валентин Коновалов позының орынңыларына, муниципальнай ӱлгӱлерге паза профильліг министерстволарға 1 майға теере чаа матырларының сыыраттарындағы бюсттарны, хумартхы тастарны паза мемориалларны иптеп саларын сыныхтағда тударға чахаан.
Регион устағҷызы республиканың финанстар министерствозына Ағбанда паза Саяногорскта чаа палаларына хумартхы тастар турғызарына хабас пирерге чахып салған.
Аннаң пасха, чағынғы туста Ағбандағы аэропортха Совет Союзы Матыры Василий Гаврилович Тихоновтың адын пирердеңер сурығ ӱзӱрілер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы