86 КУЛЬТУРА ТУРАЗЫ ТЫХТАҒ ТОҒЫЗЫН КИРЕКСІПЧЕ
21.01.2020
Хабарлар
Министрнең тоғазығ. Хакасияның культура министрі Леонид Ерёмин, хабарӌыларны чыып, 2019 чылның салтарларын иткен паза таңдағызына пӧгіннер турғысхан
Мероприятие алғыстастардаң пасталған. Хайди таныхтаан Леонид Валентинович, 2018 чылнаң тиңнестірзе, пылтыр культураа чарыдылған хабарлар саны ікі хати кӧп полған:
- Тиксі алза, 2019 чылда 10 муң артиинаң аймах хабар сыххан. Ол сан пісті чапсытхан, олох туста ӧріндірген. Хакасияның прай СМИ-ларына тӱзімніг тоғыстары ӱчӱн алғызым читірчем. Хабарҷылар, культураны чарыдып, чонға чидіглердеңер ле нимес, читпестердеңер искірчелер. Анзы піске тоғызыбысты чахсыландырарға, кізілернің кирексіністерін піліп алар оңдай пирче.
Министрнің сӧстері чыылған чонның кӧңнін кӧдірген. Че кӧні чоохтаза, ол чидігде Леонид Ерёминнің хозымы пар. 2018 чылда декабрьда Леонид Валентинович культура министріне турғызылғанда, ол хысхаҷах тус аразына республика синінде тоғынчатхан прай СМИ-ларға интервью пирген. Анзын телевидениеде, радиода, газеталарда паза сайттарда сыххан кӧзідіглер, статьялар киречілепче. Ағаа хоза пылтыр Театр паза Писатель чыллары ирткеннер, олар ідӧк журналисттернің хайиин тартханнар. Культура учреждениелерінің пресс-секретарьларын алынҷа таныхтирға кирек.
Олар СМИ-ларға кирек чӧптернең полызарға, сомнар, видео ыс пирерге хаҷан даа тимделер. Сизінгенде, иң ӧткін пресс-секретарьларны хабарҷылар ла нимес, кӧрігҷілер дее чахсы таныпчалар.
Сыйыхтар читірілген соонда тоғазығ пресс-конференцияа айлан парыбысхан тиирге чарир. Журналисттер сурығ пирбеенде истенминчелер нооза. «Хабар» газетаның сурии аалдағы культура тураларына чарыдылған: республикада нинҷе клубха тыхтағ тоғыстары киректелче? Ноға Орджоникидзе аймаанда амға теере аймахтағы Культура туразы пӱдірілбеен? Прай тыхтағ тоғыстарны «Культура» нацпроект хоостыра иртірібізерге чарир ба?
Леонид Ерёмин, пу сурығларға нандырып, аалдағылар сыбыра айланчалар тіп таныхтаан:
- Амғы туста 86 культура туразына тиксі тыхтағ тоғыстары киректелче. Ноға андағ кӧп? Совет тузында клубтар ӱчӱн совхозтар нандырҷаңнар. Олар тыхтағ тоғыстарын тузында иртірҷеңнер. 1990 чыллардаң пасти культура учреждениелері аал чӧптерінiң холында. Оларға піди дее ахча чидіспинче, аннаңар клубтар, тыхталбин, изелчелер. «Культура» нацпроект хоостыра пу сурығны чардыхти пӧгібізер оңдай пар, че ол 2024 чылға теере ле кӧріл парған, пирілген ахча читпес. Аннаңар региондағы программаны хайди даа чуртасха кирерге кирек. Пӱӱл аны тимнеп пастирлар.
Орджоникидзе аймаанда сынап таа аймахтағы Культура туразы чоғыл. Анзы орындағы ӱлгӱлернің пырозы. 1990 чылларда анда наа Культура туразы пӱдірілген. Че аймахтың устағ-пастаа аны хайығда тутпаан сылтаанда тура тастал парған, кізілер аны сайабысханнар. Наа тура пӱдіриине 150 миллион салковай кирек, ол син ахча «Культура» нацпроект хоостыра пирілбес. Пӱӱнгі кӱнде учреждение тоғынчатхан кинозалда орныхча. Сағыс пар кинозалға хоза тура пӱдірібізерге, андада Культура туразы полар. Ол тоғыстарға 40-50 миллион салковай парыбызар.
Шира аймаандағы Культура туразының тиксі тыхтағ тоғыстарына 90 миллион салковайҷа киректелче. Хаҷан-да аны табырахха пӱдірібіскеннер, амды фундамент изелче. Че ол ахчаа наа тура пӱдірібізерге чарир. Пу сурығларны пӧгер оңдай тілирбіс.
Пасха сурығлар туризмге паза форумнарға чарыдылған. Министрнiң чооғынаң, 2019 чылның ноябрьынаң туризм ӱчӱн Хакасияның экономика тилізі министерствозы нандырча. Анзына ікі сылтағ. 2018 чылда туризмҷе федеральнай агентствоны Россияның экономика тилізі министерствозына пирібіскеннер. Регионнарда, ол санда Хакасияда, андағох чарадығ алыбызарға чаратханнар. Ікінҷі сидіксініс - специалисттер чоғыл. Че чорыхчыларның кӧбізі археология хумартхыларын, тигір алтындағы азых музейлерні кӧріп аларға килче, аннаңар ікі министерство хада-пірге тоғынарға пӧгінче.
Форумнардаңар чоохтаза, «Сибер Ил» республиканы ырахха сабландырған. Культура министерствозыныц ол осхас улуғ проект чуртасха кирер сағыс пар, Леонид Ерёмин прай ниме килізер тіп ізенче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы