«ӦБЕКЕЛЕРІБІС ЧИРІ» - ЧИР-СУУБЫСТАҢАР ОЙЫН
21.01.2020
Хабарлар
Наа хаалағлар. ХГУ-ның искусство институдының тоғынҷызы Юлия Глухоедова ирткен чылда «Таврида» чиит культура тоғынӌылары аразында иртірілчеткен тиксі Россия форумында «Ӧбекелерібіс чирі» спектакльны чахсы арачылабысхан
Чоохтирға кирек, искусство институды тоғынҷыларының музыка (сарыннардаң паза теелбектердең пӱткен) спектакльын турғызардаңар сағыс хаҷанох полған. Че сағысты чуртасха кирер кізі табылбинчатхан тиирге чарир. Улуғ ӧрініске, ирткен чылда майда Хакас хазна университедінің чиит специализі Юлия Глухоедова, «Таврида» тиксі Россия форумында аралазып, 800 муң салковай грант утып алған. Чиит специалисттің «Ӧбекелерібіс чирі» проекті жюринің хайиин тартхан. Хайди таныхтапча Юлия, искусство институдының хакас чонның кӧг тиріглері оркестрі паза «Шейк» чон теелбегі ансамбльы, хада-пірге тоғынып, наа ойын чайап саларға хаҷанох сағыс тутханнар. Грант утып алған соонаң, октябрьдаң пасти, ӱгретчілернің паза студенттернің маң чох тус пасталыбысхан. Институттың педагогтары ӱгренҷілерінең хада паралар соонаң спектакль турғызарында араласханнар.
«Шейк» чон теелбегі ансамбльының хоос устағҷызы Анна Тиникова ол уғаа маң чох тус полған тіп сағысха кирче. Аның чооғынаң, олар пір ай аразына спектакль турғызыбысханнар. Араласчыларға костюмнар тігілген. Ідӧк ойынға килістіре кӧг паза видео пазылған. Спектакльда 1-4-ҷі курстарның прай студенттері араласханнар. Ноябрьда олар Хакасияның аймах аалларынзар чорыхнаң сыхханнар.
Наа ойыннаң чиит артисттер Таштып, Асхыс, Алтай, Боград аймахтарында пол килгеннер. Прай 10 азыра концерт кӧзіділген. Ирткен чылның халғанҷы кӱннерінде ХГУ-ның улуғ залында Ағбан чуртағҷыларына чир-суубыстаңар ойын кӧзіділген.
«Ӧбекелерібіс чирі» музыка спектакльы пӱӱл ідӧк аймах сценаларда чуртағҷыларны ӧріндірер. Анна Тиникованың таниинаң, ойынзар аймах алызығлар кирілер. Ол санда матырларның саны хозылар. Ойын араласчыларының узын аннаң андар тилідеріне хайығ салылар тіп искірген ол. Аннаңар ойынны кӧріп аларға маңнанмаан улусха пӱӱл студенттернің пастағы улуғ чайаачы тоғызын паалирға оңдай поларох.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы