ӰГРЕТЧЕЕ - ПІР МИЛЛИОН
22.01.2020
Хабарлар
Наа проект. Пу чылдаң Россияда «Земский учитель» проект чуртасха кирілче. Анда Хакасия аралазыбохча
Хайди чарытхан Хакасияның ӱгредіг паза наука министрінің орынҷызы Елена Конева, ол «Земский доктор» проектке тӧӧй. Тоғынарға килген ӱгретчее ідӧк пір хати пір миллион салковай пирілче. Че «Земский учитель» проекттің кирексіністері пасха. Иң пастап, анда аалзар, тоғысчы поселоксар, город оңдайлығ поселоксар алай 50 муңа чағын чуртағҷылығ городсар килер кӧңніліг ӱгретчілерге аралазарға чарадылча. Ікінҷізі, олар 55 часха читкелек поларға киректер.
- Ӧӧн кирексіністер хоостыра, республиканың прай даа муниципальнай пӱдістеріне пу проектте аралазарға ӱлӱс тӱскен. Ағбан, Харатас паза Саяногорск ла араласпааннар. (Оларда чуртағҷылар саны кӧп. - Авт.) Иң пурнада піс аймахтарда паза городтарда хайдағ предметтерҷе ӱгретчілер чидіспинчеткенін ілезіне сығарғабыс. Тиксі 60 вакансия пол парған! Пістің регионға 11 квота сур кӧрерге чарадығ алылған Хомзынысха, Хакасияа тиксі тӧрт ле квота пиріл парған: пӱӱл - пір, пазағы чылға - ікі, 2022 чылға - пазох пір. «Земский учитель» проект ӱс чылға кӧрілче, - чооғын узаратхан Елена Павловна.
Пӱӱнгі кӱнде 2020 чылдағы квота хайдағ ӱгредіг учреждениезіне пиріл парғаны пілдістіг. Ол - Абазадағы 50 .№ ортымах тиксі ӱгредігліг школа. Андар англия тілі ӱгретчізін аларлар.
- Аны таллап алар ӱчӱн, пістің республикада марығ чарлал парған. Ол пис чардыхтаң пӱтче. Пастағызы 10 январьдаң 31 мартха теере иртер. Пу тус аразына аралазарға сағынчатхан ӱгретчілер Хакасияның ӱгредіг паза наука министерствозынзар сурыныс пічіктерін ағыларға киректер. Анаң 1 апрельдең 15 апрельге теере эксперттер комиссиязы чыылған пічіктерні сыныхтир. 16 апрельдең 30 апрельге теере комиссиядағыларға чиңісчіні таллап аларға киректелер. Соонаң, чиңісчі ӱгретчінің кӧңні полза, тоғынар ӱгредіг заведениезінзер - пу чылда Абазазар - пар килерге чарир полар, устағ-пастағдағыларнаң, ӱгретчілернең танызып аларға. Ол тус 1 майдаң 15 майға кӧрілче. Че чиңісчі ӱгредіг заведениезінзер тоғынарға парарға ынапчатханнаңар пічиин 15майға теере ағылбаза, аның орнына ікінҷі орынға сыххан ӱгретчее пір миллион салковай алып алар оңдай пирілер. Іди 1 июньға теере министерство тоғынарға парар ӱг ретчіні таллап аларға кирек, - тӱптестір пирген министр орынҷызы.
Че ноғадаңар Абаза паза англия тілі?
- Хайди прайзы пілче, 2022 чылдаң англия тілі хайди даа тутчаң пірге хазна сыныхтағлар санына киріл парар. Абазадағы пасха даа школаларда, тізең, пу предметче ӱгретчілер чоғыл. Анзынаң пасха, пу улуғ нимес городта, аалларнаң тиңнестірзе, ӱгренҷілер асхынах нимес. Аннаңар кӧп палалығ муниципальнай пӱдісте англия тілін апарза, туза артых ла полар тіп чаратхабыс. Пазағы чылларда школаларны паза предметтерні пуох оңдайнаң таллирбыс, - нандырған Е.П.Конева.
Пу марығда Хакасияның прай муниципальнай пӱдістеріндегі ӱгретчілерге аралазарға чарир. Пасха региондағы даа специалисттер пеер килер оңдайлығлар. Тиксі чоохтаза, прай кирек искіріглерні «Земский учитель» сайтта таап аларға чарир. Хайдағ пічіктер ағылардаңар анда ідӧк прай чарыда пазылых.
Паза, хайди таныхтаан устағҷы кізі, квота алып алған ӱгретчее пір миллион салковайны, чурт аларына ла нимес, пос хынғанни хорадарға чарир! Хозыбызарға кирек, ахчаның 97 %-і федеральнай бюджеттең позыдылча, 3 %-і - регион бюджедінең. Че читіре тоғынмин парыбысса, Хакасияда пис чылдаң асхынах нимес, ол пу ахчаны пӱкӱлеезінең нандыра айландыр пирерге кирек.
- «Земский учитель» федеральнай проект Россия президент Владимир Путиннің чарадиинаң чуртасха кирген. Сағынчам, ол - уғаа тузалығ паза тузындағы проект. Пӱӱнгі кӱнде чииттер, ӱгретчі специальнозын алып алзалар даа, школазар тоғынарға парбинчалар. Мында сылтағлар кӧп. Кем-де олғаннарнаң тіл алызарға сидіксінче, хайзы-да хазна саринаң социальнай полызығлар пирілбинче тіп сылтанча. Че кӧбізі чал ахчазына чӧпсінминче. Аннаңар пу проекттің ӧӧн пӧгіні аал-поселоктардағы школаларзар пӧзік пілістіг ӱгретчілерні тартары полча! Пастап, «Земский доктор» проекттегі чіли, чиит ле специалисттерні аларға сағыс полтыр. Че анаң опыттығларны даа аларға чарадығ алылтыр - 55 часха читкелектерні! - теен Елена Конева.
Хакасияның ӱгредіг паза наука министрi орынҷызының искіриинең, сағамғы туста ӱгретчілер иң кӧп Приморьеде киректелче. Аның ӱчӱн ол регионға квоталар кӧп арах кӧріл парғаннар паза «Земский учитель» проект хоостыра пір хати пирілчеткен ахчаның сині ікі миллион салковайға тиңнелче!
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы