АҒБАН ПИЛТІРІНДЕ - ЧАРЫТХЫ ӰЗӰРЛЕҶЕҢ ФОНАРЬЛАР
22.01.2020
Хабарлар
Чарытхы ӱзӱрлирі. Ағбан пилтірі посёлоктың орамаларында «Чарытхы пирерін чахсыландырары» программаӌа иргі фонарьлар светодиоднайларға алыстырылғаннар
Ирткен чылның декабрьында Ағбан пилтірі посёлок чуртағҷыларының ікі танығлығ кирек полған - «Городта истіг оңдайлар тӧстирі» программаҷа ікі сквер пӱдірии тоозылған паза «Чарытхы пирерін чахсыландырары» программаҷа 876 иргі светильник чарытхы ӱзӱрлеҷең светодиоднай светильникке алыстырылған. Ағаа хоза, хаҷан даа фонарь полбаан 5 орамада чарытхы тартылған. Пу тоғыстарны «Ростелеком» ПАО паза «Юнит Сервис» ООО толдырғаннар.
Наа светодиоднай фонарьлар чарытхыны ӱзӱрлирге оңдай пирчелер. Оларнаң 11 азыра чыл тузаланарға чарир. Пис чыл пазынаң хорадығларның улуғ чардығы Ағбан пилтірі аал чӧбінзер айланар.
17 январьда, тізең, Ағбан пилтірі посёлокта чарытхы тартарынңа тоғыстар пайрамни алылғаннар. Анда Хакасияның пазы Валентин Коновалов, Ағбан пилтірі аймааның пазы Елена Егорова, Ағбан пилтірі посёлоктың пазы Нина Леонченко, чарытхы ӱзӱрлир кіннің директоры Алексей Фёдоров, подрядчиктер паза посёлок чуртағҷылары араласханнар.
- Чарытхы ӱзӱрлирінде пу улуғ чидіг полча. Ағбан пилтірі чарытхы ӱзӱрлирінде - пастағылар санында. Алтай аймаандағы Хубачарда мындағох контракт чуртасха кирілген. Амды чуртағӌыларға чарых орамаларӌа чӧрерге истіг полар. Ағаа хоза, муниципалитет чарытхы ӱчӱн хорадығларны ӱзӱрлеп алар. Муниципалитеттің устағ-пастаана паза ӧӧн подрядчик «Ростелеком» ПАО-ға толдырыл парған тоғыс ӱчӱн улуғ алғызым читірчем. Минің кӧрізімнең пу практиканы тиксі республикаа тарадарға кирек. Піс прайзы чылығда, чарыхта паза истіг оңдайларда чуртирға сағынчабыс нооза, - таныхтаан Валентин Олегович.
Хакасия пазы республиканың энергетика паза тарифтерні сыныхтағда тударынҷа хазна комитедінің кізілеріне ахча ӱзӱрлеҷең паза чонның чуртазын чахсыландырҷаң программалардаңар муниципалитеттерге искірерге чахығ пирген.
Ағбан пилтірі аймааның пазы Елена Егорованын чооғынаң, пу практиканы тиксі аймахта чуртасха кирерге сағынчалар.
- Пістің пӧгінібіс - истіг оңдайлар тӧстирі. Амғы туста посёлоктың прай орамаларында чарытхы пар. Амды иртен ӱгренӌілерге школаа парарға истіг полар, - таныхтаан Елена Егорова.
Ағбан пилтірі посёлоктың пазы Нина Леонченко ӧрініснең ӱлезерге килген кізілерге алғызын читірген. Аның чооғынаң, «Ростелеком» ПАО-наң контракт идерінең ікінҷілес полғанох, че чахсы сананып алғанда, чарытхы ӱзӱрлеҷең фонарьлар турғысхан соонда муниципалитет илееде ахча ӱзӱрлеп алар тіп чарадыға килгеннер. Амды Ағбан пилтірі посёлоктың орамалары уламох чарых пол парды.
Анаң Ағбан пилтірі посёлоктың администрация туразында Нина Леонченко паза «Ростелеком» ПАО-ның Хызылчардағы филиалы директорының орынҷызы Валерий Клейкин чарытхы тартарынңа тоғыстар толдырылғаннаңар актта хол салғаннар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы