САҒЫНҒАН САҒЫЗЫ ТОЛДЫ
24.01.2020
Хабарлар
Акция. Хакасия пазы Валентин Коновалов «Сағынған сағыстар сыбыӌаа» тиксі Россияның проектінде араласхан кинек оолағасха ноутбук сыйлап пирді
Оолахтың ады - Саша Астанин. Ол Ағбандағы 27 № школада 4 класста ӱгренче. Хакасия пазынаң тоғазарға Саша іҷезінең хада килген. Наталья Анатольевна Астанина республиканың иң улуғ пастығы ноға оларны тоғазыға хығырчатханын иркеҷеене чоохтабиндыр, чазытта туттыр.
- Александр, синің сағызың толды, - 10 частығ оолахсар айланған регион пазы. - Пӱӱн піс сағаа ноутбук сыйлапчабыс.
- О-о-о! - ӱрӱк парған Сашаҷах. -Улуғ алғыс Сірерге!
- Ноутбук сағаа ӱгредігде наа пілістер аларға тузалығ ползын, - теен Валентин Олегович.
- Мин школада ӱгренерге хынчам, аннаңар ноутбук мағаа тың кирек полған, - ӧрінізін чазырбаан кинек оолах.
- Паламның сағынған сағызын толдыр пирген ӱчӱн улуғ алғыс Сірерге, - Наталья Астанина даа иркеҷее ӱчӱн ӧрінген. - Піс сурынызыбысты аймах сайттарға чыл сай ысчаңмыс, че кирек киліспеҷең, аннаңар амғы айланызыбысха хайығ айландырарлар тіп ізенмеен дее полғабыс. Минің пір ӧӧрем Москвада чуртапча, минӧк чіли кинек палаҷаан ӧскірче. Ол мағаа «Сағынған сағыстар сыбыҷаа» проекте аралазарға чӧп пирген. Оолғыҷаам сах андох пічік пазыбысхан. Іди ам ол Сірернің полызиинаң, Валентин Олегович, ноутбукка чидінді.
Саша Астанин школада саңай пистерге ӱгренче. Ол шахмат школазына чӧрче. Ідӧк оолах, Интернеттегі аймах олимпиадаларда аралазып, сыбыра чиңісчі полыбысча. Пӱӱнгі кӱнде аның англия паза орыс тіллерінҷе, математикаҷа 90 азыра грамота пар.
- Ноутбук піске чорыхтарда тузалығ полар, - тіпче оолахтың іҷезі Наталья Анатольевна. - Пірее чирзер парчатсабыс, хада пір чемодан книга чӱктен чӧрҷеңміс. Ам Саша кирек книгаларны Интернетте хығырып ал турар.
- Я, ам кӧбізі электроннай книгалар хығырча, - чарасхан республика пазы, анаң Сашазар айланған. - Александр, сағаа пӧзік чидіглер алғапчам, чуртаста прай киректерің киліссін! Син хыйғаҷахсың!
«Сағынған сағыстар сыбыҷаа» полызығлығ проект имнелбес ағырығнаң ағырчатхан 3 - 17 частығ оолах-хызыҷахтарға хабасча. Олғаннар сағынған сағыстарынаңар пічіктер пасчалар. Іди Саша Астанин Наа чыл алнында позына ноутбук кирек тіп пічік пасхан. Амды аның сағызын республика пазы Валентин Коновалов толдырды.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы