ЧИРНЕҢ ОРТА ТУЗАЛАНЗА, ОЛ ПАРЫС АҒЫЛАР
28.01.2020
Хабарлар
Чир сурии. Тибіреділбинчеткен ис-пай хаҷан даа пӧзік паалалчаң. Аннаң орта тузаланза, хоза парыс алып аларға чарир. Хакасияны алза, хай пірее муниципалитеттерде тузаланминчатхан алай ба толдыразынаң тузаланминчатхан чирлер илееде. Аннаңар олар орындағы бюджетке хоза парыс ағылбинчалар
ПАСТАҒЫЗЫ. НОҒА НАЛОГ БЮДЖЕТКЕ КІРБИНЧЕ?
Хайди таныхталған ӱстӱнде, тибіреділбинчеткен ис-пай - ол хоза парыс. Закон хоостыра полған на объекттің ӱчӱн аның ээзі хазнаа налог тӧлирге кирек. Че хай пірее муниципалитеттерде налог хомай чыылча. Хайди таныхтапча Хакасияның ис-пай паза чир хайызығлары министрінің орынҷызы Евгения Темерова, республикада тибіреділбинчеткен ис-пай муниципалитеттер паза республика бюджеттеріне тиксі 300-че миллион салковай хоза парыс ағыларчых.
- Пу асхынах нимес ахча. Ол муниципалитеттернің илееде ағырсымнығ суриин пӧгерге чидерчік, - таныхтапча Евгения Темерова.
Ирткен чылда 1 июльда Россияның Хакасияҷа Росреестр управлениезі паза республиканың ис-пай паза чир хайызығлары министерствозы Хакасияның тибіреділбинчеткен ис-пайын, чирлерін санға алып пастааннар. Іди чарым чылға Росреестрзер кирілбеен 72 муң артиинаң ис-пай ілезіне сығарылған. Росреестр специалисттері полған на муниципалитетке тибіреділбинчеткен ис-пайның, чирлернің ээлерін санға турғыс саларға чахығ пиргеннер. Іди пу тоғысты иң чахсы Алтай, Боград паза Таштып аймахтары апарчалар. Шира аймаанда, Саяногорск, Харатас, Абаза городтарда Росреестрге кирілбеен ис-пай иң кӧп паза аны сайга кирер тоғыс пу муниципалитеттерде иң майың апарылча.
ІКІНӋІЗІ. ЧИРНЕҢ САБА ТУЗАЛАНҒАНЫ
Аал хонии чирлерінде хыра тартылбинча, промышленность чирлерінде, тізең, предпрпятиелер пӱдірілбинче. Хакасияда чирлер кӧрілген ниме-нооға тузаланминчатханда, муниципалитеттер паза республика бюджеттеріне налог ідӧк асхынах кірче. Кӧзідімге Шира аймаан алып аларбыс. Пу муниципалитет кӧллерінең сабланча. Чыл сай чайғы туста аның кӧллерінде Хакасияның паза хонҷых регионнарның чуртағчылары тынанчалар. Чайғызын идінҷектер чахсы парыстанып алчалар, че олардаң бюджетсер налог уғаа асхынах кірче.
- Кӧллер ибіре чирлер аал хонии чирлеріне саналча, аннаңар налог паазы даа тӧбін. Че пу чирлерні алынҷа хайраллалчатхан чирлерге айландырза, налог чылда 40 миллионға чит турарчых. Аны орындағы ӱлгӱ чахсы пілче, че чирлерні иптирге маңзырабинча, - чоохтапча Хакасияның ис-пай паза чир хайызығлары министрінің орынҷызы Евгения Темерова. - Чирлердең пасха, муниципалитеттерге ідӧк тибіреділбинчеткен ис-пайнаң парыстанарға чарир. Тузаланминчатхан алай ба толдыразынаң нимес тузаланчатхан чирлердең хоза парыстанчаң тоғыс иң уйан Шира паза Асхыс аймахтарында апарылча.
Хакасия пазы полған на муниципалитет пазына пӧгін турғыс салған - постың бюджедін хозар оңдайлар тілирге. Пу тоғысты чахсы апарча Ағбан пилтірі аймаа. Анда тибіреділбинчеткен ис-пайны санға турғызар тоғыс иң чапчаң парча паза чирлер орта тузаланылчалар. Аннаңар налогтар тӧлелче, орындағы бюджетке ахча кірче.
Автор :
Оксана СУНЧУГАШЕВА
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 29 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
