ЧОН САҒААН ИМНЕГ КІНІ АЗЫЛДЫ
04.02.2020
Хабарлар
«Хазых хайраллиры» нацпроект. Ағбан пилтірі аймааңдағы Райковтар аалында чуртағӌылар хаӌаннаң сағаан наа имнег кіні азылды. Ол «Хазых хайраллиры» нацпроект хоостыра пӱдірілген
АҒБАН СУҒ ХАЗЫНДА ТУРЧАТХАН РАЙКОВТАР ААЛЫНДАҒЫ ЧИҢІСКЕ 30 ЧЫЛ ОРАМАДА НАА ИМНЕГ АМБУЛАТОРИЯЗЫ АЗЫЛҒАН. ЧЕ АНЫ ПӰДІРЕР ПАСТАҒЫ ӦЗЕКТЕРНІ 2019 ЧЫЛНЫҢ ОКТЯБРЬЫ СООНЗАР САПХАННАР. РАЙКОВТАРНЫҢ 1500 АРТИИНАҢ ЧУРТАҒҶЫЗЫНА ИМНЕГ ПОЛЫЗИИН ПИРҶЕҢ МОДУЛЬЛЫҒ ТУРА ӰС АЙҒА ТИМГЕ СЫХ ПАРҒАН.
САРЫҒ ӦҢНІГ ПРОФЛИСТНЕҢ ЧАБЫЛҒАН ТУРА АЛНЫНДА РЕСПУБЛИКАНЫҢ УСТАҒ-ПАСТАА ПАЗА РАЙКОВТАР ААЛЫНЫҢ ЧУРТАҒҶЫЛАРЫ ЧЫЫЛЫС ПАРТЫРЛАР.
ААРЛЫҒ ААЛҶЫЛАР САНЫНДА РОССИЯ ХАЗНА ДУМАЗЫНЫҢ ДЕПУТАДЫ НАДЕЖДА МАКСИМОВА, ХАКАСИЯ ПАЗЫНЫҢ ОРЫНҶЫЗЫ ТАТЬЯНА КУРБАТОВА, ХАЗЫХ ХАЙРАЛЛАҶАҢ МИНИСТР ВЛАДИМИР КОСТЮШ, АҒБАН ПИЛТІРІ АЙМААНЫҢ ПАЗЫ ЕЛЕНА ЕГОРОВА, РАЙКОВТАР ААЛ ЧӦБІНІҢ ПАЗЫ ВИТАЛИЙ КОВАЛЬЧУК ПОЛҒАННАР.
Аал чуртағҷыларына ӧріністіг кӱнде олар, имнег туразын азып, чоох тутханнар.
- Пӱӱн, сыннаң даа, уғаа танығлығ паза ӧріністіг кӱн, - чоох тутхан Хазна Думазының депутады Надежда Максимова. - Имнег туразы наа ла пӱдіріліп пастааннаң кӧп тус иртпеді, че ол амды тимге сых парды.
Пӱӱнгі кӱнде «Хазых хайраллиры» нацпроект хоостыра аал-городтарда наа имнег туралары пӱдірілчелер, азылчалар.
Наа объект федеральнай программа полызиинаң пӱдірілген. Хакасияның устағ-пастаа, тізең, чон хазиин пиктир ӱчӱн федеральнай ӱлгӱлердең полызығ сурча. Амды райковтардағылар мында имнег полызиин ал турарлар. Мин чонға ағырбасха, хазых чуртас алғапчам.
Татьяна Курбатова Хакасия пазының адынаң чуртағҷыларпы алғыстаан: «Хазна Думазының депутады паза Хакасия пазының кӱстенізінең сірернің аалда имнег кіні пӱдіріл парды. Сірер пу сурығны пӧгерінде ӧткін араласхазар. Ӱлӱкӱннең сірерні! Хазых полыңар!»
Владимир Костюш пу чағында имнег амбулаториязы тоғынып пастир тіп искірген. Федеральнай программа хоостыра 2020 чылда Ағбан пилтірі аймаанда ікі имнег туразы пӱдірілер. Аймах пазы Елена Егорова республика устағ-пастаана, пӱдірігҷілерге полызығ пирчеткеннері ӱчӱн алғызын читірген. Райковтар аал чӧбінің депутады Елена Райкова чон мындағ имнег амбулаториязы, пӱдіріліп, азыларын хаҷанох сағаан тіп искірген. Сағынған сағыс толар ӱчӱн устағҷылар ла нимес, ідӧк олаңай чон ӧткін хайынған.
Имнег амбулаториязы пайрамни азылған соонаң чыылған чонны аны істінең кӧріп аларға иртіргеннер. Алғым, чарых турада 15 пӧлік тоғынар: аптека пункты, кӱнӧрте чатчаң палата, улуғларны, кічіглерні сыныхтаҷаң кабинеттер, тоғынчатхан персонал пӧлии паза пасхазы...
Анда пір фельдшер Артём Павлов паза тӧрт мед-сестра - Наталья Кобыжакова, Надежда Голдулина, Екатерина Горелова, Светлана Майер - тоғынар. Олар диспансеризация, профилактика сыныхтаан иртір турарлар. Тӱрчедең анда аптека тоғынып пастир, че льготалығ имнер анда садылбас. Льготаҷа пирілчеткен имнерні имҷі пасхан рецепттерҷе ал турарлар. Электроннай имнег картазын азып аларға специалист-имҷізер пазын саларға оңдай пар. Андох гемоглобин, холестерин, сахар синін піліп ал турарлар. Тиксі практика имҷізі Алевтина Сагалакова неделяда пір хати Райковтар аалынзар Солнечнай поселоктаң кил турар.
Амбулатория пір сменаа андар айланған 21 кізее полызығ пирер оңдайлығ. Райковтардағы паза хости орныхчатхан Шурышев, Баиннер, Хоных ааллардаң кізілерні имнирлер.
Модульнай пӱдіріге федеральнай паза республика бюджеттерінең І2 644 миллион салковай позыдылған, имнег оборудованиезіне - 3155 миллион.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы