ІСТЕЗІГЛІГ ТОҒЫСТАРЫ НАУКАНЫ ТИЛІТЧЕ
07.02.2020
Хабарлар
Чиит учёнайлар. 5 февральда Хакасия правительствозының туразында наукада пастағы хаалағлар итчеткен оол-хыстарға Аарластығ пічіктер читірілген
ЧЫЛ САЙ НАУКА КӰНІ АЛНЫНДА ХАКАСИЯНЫҢ ПРАВИТЕЛЬСТВО ТУРАЗЫНДА РЕСПУБЛИКАДАҒЫ НАУКА КІННЕРІНІҢ, ХГУ-ның, ХТИ-ның УСТАҒҶЫЛАРЫ, ЧЫЫЛЫЗЫП, ЧИИТ УЧЁНАЙЛАРНЫ ЧЕЕСТЕПЧЕЛЕР.
ПӰӰЛ ХАКАС РЕСПУБЛИКА ПАЗЫ АДЫНАҢ СТИПЕНДИЯА АЛТЫ СТУДЕНТ ТУРЫСХАН. ОЛ - АНАТОЛИЙ АМЕЛЬЧАКОВ, ЕЛЕНА ГОРЛОВА, ВЛАДИСЛАВ ЗАРВА, МАРГАРИТА КУЗНЕЦОВА, ЮЛИЯ СОЛОМАТОВА, НИКИТА ЭНГЕЛЬ.
Олар - Хакас хазна университедінің паза Хакас техническай институттың студенттері. Хакасия пазы Валентин Коновалов, Аарластығ пічіктер читіріп, чиит істезігӌілернің пастағы чидіглерін хайди даа таныхтирға кирек тіп сағызынаң ӱлескен.
Хакасияның ӱгредіг паза наука министерствозының тоғынӌызы Наталья Кеберлеге кӧп чыл тӱзімніг тоғынчатхан ӱчӱн Аарластығ пічік читірілген. Хакас хазна университедінің профессоры, ветеринария наукаларының докторы Елена Безрукка, наукада пӧзік чидіглерге чидіп, наа технологияларны чуртасха кирчеткен ӱчӱн Хакасия пазының ахчалығ сыйии пирілген. Чиит учёнайлар Денис Портнягин паза Никита Энгель істезігліг тоғыста пӧзік чидіглерге читкен ӱчӱн Хакасия правительствозының ахчалығ сыйиинаң таныхтатханнар.
Сыйыхтар читірілген соонаң чоох тутхан Хакас хазна университедінің ректоры Татьяна Краснова. Аның таниинаң, пӱӱнгі кӱнде республикада 695 учёнай істенче. Ол санда университеттер ӱгретчілері паза аспиранттар. ХГУ-да наука 15 кӧстегӌе тоғынча.
Ідӧк тоғазығда учёнайлар науканың ағырсымнығ сурығларын ӱзӱргеннер. Ол санда социология саринаң сурастырығларны, олаңай ла иртірбин, наука істезіглеріне кирерге сурыныс полған учёнайларның. Паза, сурастырығларның салтарларына чӧленіп, регионның тилізіне хайығ айландырарға чӧп пирілген. Хакасия пазы Валентин Коновалов ол сурығ хайди даа ӱзӱрілер тіп чыылған чонны ізендірген.
Автор :
Ольга ИНДЫГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы