ЧАА ВУЗТАРЫНЗАР ӰГРЕНЕРГЕ ХЫҒЫРЧАЛАР
11.02.2020
Хабарлар
Ӱгредіг. Асхыс, Таштып аймахтарынҷа паза Абаза городча чааҷылар комиссариады школа тоосчатханнар аразында Россияның арачыланыс министерствозының чаа училищелерінзер паза институттарынзар таллағ иртірче
Хайди таныхтаан чааҷылар комиссариадының профессионально-психологическай таллағ пӧлиинің пастых орынҷызы Иван Карамчаков, ортымах ӱгредігліг чиит кізілерге чаа ӱгредіг заведениелерінзер кіріп аларға чарир. Таллағ иртірілче чаачы службазын иртпеен 16 - 22 частығ, хығыртығ хоостыра чааҷы службазын ирткен 24 часха читкелек чииттер аразында. Аннаң пасха, кандидаттар хазии хоостыра чааҷы службазына килізерге киректер. Таллағ физическай тимненіс хоостыра, психология саринаң иртірілче.
Чаа ӱгредіг заведениелерінде ӱгренерге сағынчатханнарға мындағ предметтерҷе ЕГЭ сыныхтағларын тудыбызарға киректелче: орыс тілі прай вузтарзар паза таллап алған специальность хоостыра математика, обществознание, химия, физика, биология. Вузтарның кӧбізі А категория хазыхтығ чииттерні ӱгренерге хығырча, че пірее вузтар В категориялығ чииттерні алча. Ағаа хоза чиит кізі чарғылатпаан поларға кирек.
- Пістің хазнада 35 чаа ӱгредіг заведениезі, ол санда арачыланыс министерствозының академиязы тоғынча. Че андар чааҷылар комиссариаттары пастыра ла кіріп аларға чарир. Чааҷылар комиссариады, кирек пічіктерін чыып алып, оларны чиит кізі ӱгренерге сағынчатхан вузсар ызыбысча. Чаа ӱгредіг заведениелерінде гражданская вузтардағыох специальностьтарға ӱгреніп аларға чарир, кӧзідімге, техническая специальностьтарға, чаа журналистиказына паза даа пасхазына. Прай выпускниктерге лейтенант звание пирілче, - таныхтаан Иван Владимирович. - Пылтыр Асхыс, Таштып аймахтарынча паза Абаза городча чааҷылар комиссариады 12 кізінің пічіктерін чаа вузтарынзар кірерге ысхан, оларның тӧрті ӱгренерге кіріп алған, 2018 чылда - сигіс кізі. Чааҷылар комиссариадының тоғынҷылары чииттерге вузтардаңар чарыда чоохтап пирзелер, олар кирек вузты постары таллапчалар.
Чаа ӱгредіг заведениелерінеңер чарыда искіріглерні паза хайди андар кіріп алардаңар Россияның арачыланыс министерствозының http://www.mil.ru сайтында «Образование»/«Высшее» пӧлікте піліп аларға чарир. Ідӧк Асхыс, Таштып аймахтарынҷа паза Абаза городча чааҷылар комиссариадынзар 8(39045)9-11-92 телефонҷа айланарға чарир. Таллағ 20 апрельге теере иртче.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы